1 AbaseKhorinte 1 - iBhayibhili Elingcwele 1978

Isibingelelo

¹ Mina Pawuli, obizwe ngentando kaNkulunkulu ukuba ngumphostoli kaJesu Kristu kanye lomzalwane uSostenesi,

² sithi kulo ibandla likaNkulunkulu eliseKorinte, kubo abahlukaniselwe kuKristu Jesu, ababizelwe ukuba ngabangcwele, kanye labo bonke abakhuleka ebizweni leNkosi yethu uJesu Kristu endaweni zonke, iNkosi yabo leyethu:

³ Kakube kini umusa lokuthula okuvela kuNkulunkulu uBaba laseNkosini uJesu Kristu.

⁴ Ngiyambonga uNkulunkulu ngesikhathi sonke ngani ngenxa yomusa kaNkulunkulu eliwuphiweyo kuKristu Jesu,

⁵ ukuthi ezintweni zonke linothisiwe kuye, ekukhulumeni konke lekwazini konke,

⁶ njengalokhu ubufakazi ngoKristu buqinisiwe kini.

⁷ Ngakho kalisileli lasinye isiphiwo somusa, lisalindele ukwambulwa kweNkosi yethu uJesu Kristu,

⁸ yena ozakuliqinisa kuze kube sekupheleni, lingabi lacala ngosuku lweNkosi yethu uJesu Kristu.

⁹ UNkulunkulu uthembekile, owalibizela ekuhlanganyeleni leNdodana yakhe, uJesu Kristu iNkosi yethu.

Ukuphikisana ebandleni laseKorinte

¹⁰ Ngiyalincenga, bazalwane, ngebizo leNkosi yethu uJesu Kristu, ukuthi lonke likhulume ilizwi libe linye, kungabi khona ukwahlukana phakathi kwenu, kodwa lipheleliswe emqondweni munye lasekuboneni kunye.

¹¹ Ngoba ngitsheliwe ngabantu bakoKlowe ukuthi kukhona ukuxabana phakathi kwenu, bazalwane bami.

¹² Ngitsho lokhu kokuthi ilowo lalowo wenu uthi: Mina ngingokaPawuli; mina ngingokaApolosi; mina ngingokaKefasi; mina ngingokaKristu.

¹³ UKristu wahlukanisiwe yini? UPawuli wabethelwa ngenxa yenu na? Labhaphathizwa ebizweni likaPawuli na?

¹⁴ Ngiyambonga uNkulunkulu ngoba kangibhaphathizanga lamunye wenu, kuphela oKrispusi loGayusi,

¹⁵ funa kube khona othi labhaphathizwa ebizweni lami.

¹⁶ Kodwa ngabhaphathiza abendlu kaStefana; ngaphandle kwalabo kangikhumbuli ukuthi ngabhaphathiza omunye.

¹⁷ Ngoba uKristu kangithumanga ukuba ngibhaphathize, kodwa ukuba ngitshumayele ivangeli kungesikho ngokuhlakanipha kwamazwi, funa isiphambano sikaKristu senziwe ize.

Ukuhlakanipha kukaNkulunkulu lokomhlaba

¹⁸ Indaba yesiphambano iyibuthutha kulabo ababhubhayo, kodwa kithi abasiliswayo ingamandla kaNkulunkulu.

¹⁹ Ngoba kulotshiwe ukuthi: Ngizakuchitha ukuhlakanipha kwabahlakaniphileyo, lokuqedisisa kwabaqedisisayo ngizakukwenza ize.

²⁰ Singaphi isihlakaniphi? Ungaphi umbhali? Ungaphi umphikisi na? Kayisibo balesisikhathi na? UNkulunkulu kakwenzanga kube yibuthutha ukuhlakanipha komhlaba na?

²¹ Ngoba kuthe ekuhlakanipheni kukaNkulunkulu umhlaba kawumazanga uNkulunkulu ngokuhlakanipha, kwaba kuhle kuNkulunkulu ukusilisa abakholwayo ngobuthutha bentshumayelo.

²² AbaJuda babiza izibonakaliso, lamaGriki afuna ukuhlakanipha,

²³ kodwa thina sitshumayela uKristu obethelweyo, okuyisikhubekiso kubaJuda, lobuthutha kwabezizwe,

²⁴ kodwa kulabo ababiziweyo, abaJuda lamaGriki, uKristu ungamandla kaNkulunkulu lokuhlakanipha kukaNkulunkulu.

²⁵ Ngoba ubuthutha bukaNkulunkulu buhlakaniphile kulokuhlakanipha kwabantu; lobuthakathaka bukaNkulunkulu bulamandla ukwedlula amandla abantu.

²⁶ Khangelani ukubizwa kwenu, bazalwane; kini kababanengi abahlakaniphileyo ngokomhlaba, kababanengi abalamandla, kababanengi abayizikhulu;

²⁷ kodwa uNkulunkulu ukhethile izinto zobuthutha zomhlaba ukuba ayangise abahlakaniphileyo; uNkulunkulu ukhethile okubuthakathaka komhlaba ukuba ayangise okulamandla;

²⁸ lezinto eziphansi zomhlaba lezinto ezidelelekayo uNkulunkulu uzikhethile, lezinto ezingekho ukuba achithe izinto ezikhona,

²⁹ ukuze kungabi khona umuntu ozincomayo phambi kukaNkulunkulu.

³⁰ NgoNkulunkulu lina likuKristu Jesu, ngoba uNkulunkulu wamenzela thina ukuhlakanipha lokulunga lokwahlukaniselwa lokukhululwa.

³¹ Ngakhoke njengokulotshiweyo: Ozincomayo kazincome eNkosini.