Bìoball air-loidhne

Yùxanà 2 - Bible Dzùùngoo Unicode

Yesù rè kabagoo goo fauma jɔ̀naà Kanà wɔ̀ rɔ̀n

¹ Àyìwà, twɛy goo rèè faumaà bwèy zhììgìraa sii sèè, kɔnɲɔn goo na ni Galile mar'la wɔ̀ sɔn ɲan, ci Kanà. Yesù naà na ni tɔ̀ kɔnɲɔn goo rè.

² Yesù ko e re kàràndzin neè, yè bà na twɛy sa kiriɔ.

³ Àwà, waatsia sɔn ci e ye wɔ, mììngeè yè gba. Yesù naà yè dzin à ra tɔ̀un ci: «È re mììngeè gbaɔ̀.»

⁴ Ŋà, Yesù yè dzin à ra ci: «Naà, tɔ̀ goò ni mun ko wo sɔn suun ɔn ? Mun naa waatsia na wɔ ŋe waa.»

⁵ Yesù naà yè dzin faagoofadzin neè rà tɔ̀un ci: «À ye goo o goo dè e ra, y'a fa.»

⁶ Yu Dziniin kpaàma tsunmɛn na ni mɔn. Dzyèèsìbee mòdzin neè na twɛy doùn yuà rìì ka e yɛrɛ fɛnɛbeè, è bè è re làndà shià tsɛ. Yuà litsiri càànmoò tsuru dɔ̀ɔn twɛy dzin'neè soo sookɔɔn sapɛ doùn.

⁷ Yesù yè dzin faagoofadzin neè rà ci: «Ye dzin'nee reè tsyɛn yuà rà.» Faagoofadzin neè yè è tsyɛn fɔ e dzii ra.

⁸ Yesù yè dzin tɔ̀un ci: «Ye dɛyn bo dòònuùn, mòò riì ni ɲwɛyn goo jɔun, ye b'a sìn tɔ̀ ra.» Yè tɔ̀ fa.

⁹ Tɔ̀ yu rìi lakere baɔ̀ mììnge, ɲwɛyn goojaabobaà yè tɔ̀ nèè. À naà à tɔ̀, tɔ̀ mììngeè boo min niì waa. Ŋà, faagoofadzin neè na à tɔ̀, kàtsu, ye rìì yua tsyɛun. Ɲwɛyn goojaabobaà yè kɔnɲɔn kpir'là kiri tɔ̀un,

¹⁰ è dzin à ra ci: «Mòdzian sapɛ mììnge dziɔ̀ rìì sìan mòdzian nà ŋe. Yè min cɛn waatsi riì bwèy, nìi na dzi waa, yè kòmànà tɔ̀ sìn è ra. Ŋà nìi wo, wo mììnge dziɔ̀ rìì màrà tsùuŋ, fɔ dòònuùn !»

¹¹ Tɔ̀ rii bàu Yesù rè kabagoo goo fauma jɔ̀naà. À fau Kanà wɔ̀ rɔ̀n nì, Galile mar'la ɲàn. Tà tsuru, è nɔɔrɔɔ̀ kpàdè, à re kàràndzin neè yè ɲɛn à ra.

¹² Tà shɔ̀ùn, Yesù ko e naà, ko à tseyn nèè ko à re kàràndzin neè yè jàà dɔn bè Kapɛrinaxumùn wɔ̀ rɔ̀n. Yè bwèy dan bàsɔùn nì fa mɔn.

Yesù gwɛy fa reè kaaŋ min niì Ŋaablà re gbà blàa rà
( Matsiyù 21.12-17 ; Marikì 11.15-17 ; Lukì 19.45-46 )

¹³ Àyìwà, Dzyèèsìbee mòdzin neè rè Geren n tsɛɛ̀ sɛr'là na tsyɛnbeò. Tà doùn, Yesù yè dɔ̀n be Yerusalɛmùn.

¹⁴ À bèu wɔ mɔn, à y'à jà, swey ni Ŋaablà re gbà blàa doùn, twɛy nìì rèè, ko sàà rèè, ko màsàker'leè gɔɔ̀ mɔn saaka bo goo rà. Ɲɛyn niì jàmàan kpɛrɛ ɲɛyn, è twɛy ɲancinanbaa ì sa ja, twɛy tsùuŋnà e raa ɲɛyn ɲancinaan tàbàr'leè tɛyn.

¹⁵ Yesù yè fɛɛdzin ì sen tɔ̀un, à y'à bà bɔbwɛy, è sapɛ kaa bo Ŋaablà re gbà blàa fɔɔn doùn, è ko e re sàà rèè, ko nìì rèè. È ɲɛyn ɲancinan reè raa ɲɛɛn kon ji dzɔn nɔ̀n, è re tàbàr'leè kùnàgblen

¹⁶ È dzin màsàkèrè gɔɔ reè rà ci: «Ye nèe sapɛ bo mìin ! E maà n Faà rè gbàà bà duru fama dɛ !»

¹⁷ À re kàràndzin neè taa yeè to Ŋaablà re Goomaa doùn gooma de dɔ̀unma bɔrɔɔ sɔn ne, nìi yɛ ci: «Tsìfaà, wo re gbàà goò dzi mun na, fɔ è bè geren. Mun y'à kɛ̀n nìi faɔ̀ tɔ̀ tsuru, tɔ̀ mun dzu dzua a ci sà.»

¹⁸ Àwà, Dzyèèsìbee mòdzin neè jɔundzin neè yè Yesù tey tɔ̀un ci: «Wo dzia kabagoo goo kɛɛn nì fa, tɔ̀ y'a kpàdè ɲe ra, ci wo yɛ nìi faa nèe, tɔ̀ shi ni wo suun ?»

¹⁹ Yesù yè dzin è ra ci: «Ye Ŋaablà re gbà rèe ci, m'a sèè jia e shɔùn bwèy zhììgi doùn.»

²⁰ Yè dzin à ra ci: «Ci fee ? Jii dzyeè ko dzin tsunmɛn ni fau gbà rèe jia rà, wo dzia tɔ̀ sèè ji bwèy zhììgi doùn dzùrù ?»

²¹ Ŋà, Yesù na Ŋaablà re gbà rìi gooma deè, tɔ̀ na à yɛ̀r'la gɔɔ̀n rìì.

²² Yesù nàu sèè kpunan bo saàn ɲàn waatsi riì bwèy, à re kàràndzin neè taa yeè kòmànà to, ci à na tɔ̀ gooma ree deò. Tɔ̀un, Ŋaablà re Goomaa doùn gooma de dɔ̀unma sɔn yeè bo e shi tsɛ, yè ɲɛn Yesù rè gooma deuma rèè sa ra.

²³ Àwà, è Yesù to Yerusalɛmùn Geren n tsɛɛ̀ sɛr'là waatsia bwèy, mòò giri yè ɲɛn à ra, à re kabagoo goo reè fakɔɔn kamà.

²⁴ Ŋà Yesù, tɔ̀ naà ɲɛɔ̀n è ra waa, kàtsu à na è sapɛ duungoo tɔ.

²⁵ À naà wɔɔ̀ mòò yè nà mòò gooma de à ra waa, kàtsu mòdzin duungoo nìi, à yɛ̀r'la naà fìriɔ̀ tɔ̀ mà waa.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan