Bìoball air-loidhne

Yùxanà 13 - Bible Dzùùngoo Unicode

Yesù yè e re kàràndzin neè sàn nèè fòoŋ min niì

¹ Àyìwà, Geren n tsɛɛ̀ sɛr'là ni gbey tsuru, Yesù yè bà na à tɔ̀, ci wò yeè bo dziɲaan doùn, w'e bè e Fa Ŋaablà re, tɔ̀ waatsi na wɔɔ nòn. Tà doùn, nìì reè y'à raa dziɲaan doùn, à na twɛy kɛ̀niɔ̀n kudɛyn. À to yè è kɛ̀n kɔn fɔ e daùn.

² Àwà, Yesù ko e re kàràndzin neè ni fene fɔnɔn ɲɔɔn nà, à re kàràndzin neè ɲàn, nìi tsoo Yudasì, à fàà tsoo yè bà Shimɔ̀n Sikariyɔtsì, Sànwɔbaà na Yesù jàànfaà jiɔ̀ tɔ̀ duùn nòn.

³ Yesù na à jaa tɔ̀, ci Fà Ŋaabla goò sapɛ dzyeèma wɔɔ wò suun, wo daun w'e bo Ŋaablà rii lè, wò to nà e kpɛyn sèè wò rii lè.

⁴ Àwà, Yesù yè fù bo ɲwɛɛ̀n kùùn tɔ̀un, è vu ra mɛ̀yɛ blaa bo tsùù, è vya sɔn sen, è tɔ̀ ka e ɲanshì.

⁵ Tà shɔ̀ùn, è yu ji koonfaa doùn, è maa, è kàràndzin neè sàn nèè fòo, à na vya rìi ka e ɲanshiɔ̀, è tɔ̀ ka è tsùsaa.

⁶ À bèu wɔ Shimɔn Piyɛrì tsɛ, tɔ̀ yeè dzin à ra ci: «Tsìfaà, wo takia yè mun sàn nèè fòò ɔ̀ ?»

⁷ Yesù yè dzin à ra ci: «Mun nìi faa, wo na à tɔ̀ dòònuùn ŋe waa, ŋà, wo nà nà à tɔ̀ bònè rìì.»

⁸ Piyɛrì yè dzin à ra ci: «Mun naa sàn nèè ɔ̀, wo fa twɛy fòò fyeu !» Yesù yè dzin à ra ci: «Mun ma wo sàn nèè fòò, wo dzii na ni mun ka goo sɔn pɛn ɲan dɛ waa.»

⁹ Shimɔn Piyɛrì yè dzin tɔ̀ rii ɲàn ci: «Tsìfaà, maà dàn n san nèè bàsɔùn mà waa, n si rèè ko n kungɔɔ̀ sa foò.»

¹⁰ Yesù yè dzin à ra ci: «Mòò riì yè e fooŋnà nòn, à na wɔɔ̀, tɔ̀ yeè e foò kpɛrɛ dɛ. À kpɛ̀yn dzia e san nèè bàsɔùn nì fòò sa, tà boshɔ̀ùn, à min niì sapɛ bàa fyɛɔ. Ye sa fyɛɔ, ŋà, à na ye sapɛ dɛ.»

¹¹ Mòò riì nà à jàànfa, à na tɔ̀ tɔ̀ nìi fa, tɔ̀ rii kamà, è dzin ci: «Ye sapɛ na fyɛɔ waa.»

¹² Yesù nàu e re kàràndzin neè sàn nèè fòò do waatsi riì bwèy, è re mɛ̀yɛ blaa sèè ji, è tsuù ɲwɛɛ̀n nà e shɔùn. È dzin è ra tɔ̀un ci: «Mun nìi fau ye ra nèe, y'a dzuun tɔ ɔ̀ ?

¹³ Ye mun kiri nìi faa "kàrànfaà" ko "Tsìfaà" tɔ ni e shi tsɛ, kàtsu mun tɔ̀ rii.

¹⁴ Tà doùn, mun nìi Tsìfaà, min bà kàrànfaà, min ba ye sàn nèè fòoŋ, à wù ye sa yeè e si san ì fòò.

¹⁵ Mun nèe fau nì, mun y'à ka ye jaa kpàdè, sànko, ye sa y'a fa e si ra, a ci mun y'à fau ye ka nìi tsuru.

¹⁶ Sààben na, mun nì ci e ra, jòòn na blà e tsifaà mà waa, kɛɛraa to na blà e kabaà mà waa.

¹⁷ E ye ba twɛy goo rèè jaa tɔ̀, e y'a shi jiì tɔ̀ tsuru, e raà wùbeu.»

Yesù ci min niì ci wò re kàràndzian soo nà wò jàànfa
( Matsiyù 26.20-25 ; Marikì 14.17-21 ; Lukì 22.21-23 )

¹⁸ «À na ye sapɛ gooma dekɔɔn dɛ, mun nìi reè boo n jaa ra, mun twɛy tɔ̀. Ŋà, fɔ Ŋaablà re Goomaa doùn gooma de dɔ̀unma bɔrɔɔ sɔn yeè bo e shi tsɛ, nìi yɛ ci: "Mòò riì na mun ne ɲwɛɛ̀n ɲɔɔ̀n mun ka, tɔ̀ yeè e jaa kereu mun kpɛyn."»

¹⁹ «Mun y'à dè tsùɔ ye ra dòònuùn, sani à goò yè nà wɔ. Tɔ̀ tsuru, è na wɔ, ye nà ɲɛn à ra ci à Mun nì.

²⁰ Sààben na, mun nì ci e ra, mun mòò riì kaɔ, mòò riì yè e tsiɛ tɔ̀ ra, tɔ̀ yeè e tsiiŋ mun nì nà. Mòò riì to yè e tsiɛ mun na, tɔ̀ yeè e tsiiŋ mun kabaà rìì là.»

²¹ Àwà, Yesù tɔ̀ dèu min niì, à akiri yè gbiiman fɔ è bè geren. À y'à dè fyɛ tɔ̀un ci: «Sààben na, mun nì ci e ra, mòò sɔn nà mun jàànfa ye ɲan.»

²² À tɔ̀ dèu min niì, kàràndzin neè yè e si siin siin bè, è ba mòò riì gooma dekɔɔn.

²³ Tɔ̀ y'a tàrà, kàràndzin neè mòò sɔn na ni, Yesù na nìi kɛ̀niɔ̀n. È tsùuŋmaà ɲwɛɛ̀n nà yè e nɔnkɔ̀nma, tɔ̀ kàràndzian na sàraɔ̀ Yesù ra ceu.

²⁴ Shimɔn Piyɛrì yè e si ŋààn tɔ̀ ra, ci è Yesù tey, è ba mòò riì gooma dekɔɔn.

²⁵ Tɔ̀ sa yeè e kanman be Yesù ɲìɛ̀ kpàkèrè, à y'à tey ci: «Tsìfaà, wo dziàn tsì rii là ?»

²⁶ Yesù yè dzin ci: «Mun ye bur'la tsun, mun y'à sìn mòò riì rà, à tɔ̀ tsìfa rìì.» È bur'la tsun tɔ̀un, à y'à sìn Yudasì rà, Shimɔn Sikariyɔtsì dzin kpir'la.

²⁷ Tɔ̀ bur'la dziu sìn Yudà rà min niì, Sùtana yè dɔ̀n à ɲan. Yesù yè dzin à ra tɔ̀un ci: «Wo sào ni wo yè nìi fa, tɔ̀ fa tabe !»

²⁸ Àwà, gè o ge na ni ɲwɛyn ɲɔnma nɔ̀n, è pɛn na à tɔ̀, à tɔ̀ deò kùn nìi nà waa.

²⁹ Yudasì ɲɛyn marabaà nìi fa, swey na à siɛ̀n, ci Yesù dziɔn à ra rii, ci è bè Geren n tsɛɛ̀ sɛr'là gè rèè fì, tàmafa è bè gbakɔɔn reè kɔ̀.

³⁰ Tɔ̀ bur'la wɔu Yudasì suun min niì, Yudasì yè bo suu, tɔ̀ y'a tàrà tsitsiɛ̀ ni.

³¹ Àyìwà, Yudasì boumaà shɔ̀ùn, Yesù yè dzin ci: «Dòònuùn, Adamà dziàn blàbee nà tɔ̀, è bà saabu Ŋaablà blabee yè tɔ̀.

³² [À saabu rɔ̀n Ŋaablà blabee ye tɔ], Ŋaablà yɛr'la sa nà à to, à blàbee yè tɔ̀ wò saabu rɔ̀n. À nà tɔ̀ fa dòonen.

³³ N dzyeèsi ì, mun kpɛ̀yn ni ye ka ŋe, ŋà, tɔ̀ na cian goo dɛ. Ye nà mun gaa, ŋà, mun soo riì dèu Dzyèèsìbee mòdzin neè rà, mun nà tɔ̀ dè ye sa ra dòònuùn, ci mun bèe min niì, ye fa dzi be mɔn waa.

³⁴ Mun nà dzugooma xɔù yeu de ye ra nìi yɛ ci: Ye e si kɛ̀n. Mun ye kɛ̀niun kɛ̀nìùn'n kur'liì rà, e sa yeè e si kɛ̀n tɔ̀ tsuru.

³⁵ Ye ye ba e si kɛ̀niɔ̀n, è sapɛ nà à tɔ̀ tɔ̀ rii là, ci ye mun ne kàràndzin ì.»

Yesù dziun min niì ci Piyɛrì nà dzin ci à na wò tɔ̀ waa
( Matsiyù 26.31-35 ; Marikì 14.27-31 ; Lukì 22.31-34 )

³⁶ Shimɔn Piyɛrì y'à tey ci: «Tsìfaà, wo bèe min ni ?» Yesù yè dzin à ra ci: «Mun bèe gàne rìi ɲàn, wo fa dzi a gban bè mun kpɛyn mɔn dòònuùn waa. Ŋà, bònè rìì wo nà nà bè mun kpɛyn.»

³⁷ Piyɛrì yè dzin à ra ci: «Tsìfaà, feera mun fa dzi n gban bè wo ra dòònuùn ? À ni mun mà, mun yè n xɔɔn sìn wo kamà !»

³⁸ Yesù yè dzin ci: «À taki ni wo mà wo y'à xɔɔn sìn mun kamà ɔ̀ ? Sààben na, mun nì ci a ra, sani tsɛ̀keen yè ben she, wo nà bà à dè jaa zhììgi faɔ̀ nòn, ci wo na mun tɔ̀ waa.»

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan