Bìoball air-loidhne

Yudè 1 - Bible Dzùùngoo Unicode

Sɛbɛɛn kaɔ nìì reè rè, ko dzwɛɛ̀

¹ Mun Yudè, Yesù Kirisà rè jòn kpir'la, ko Yàkubà keresia, nèe mun ne sɛbɛn, è sìn Fà Ŋaablà re mòdzin kiriuma rèè rà, à twɛ̀y nìì reè kɛ̀niɔ̀n, è bà è màrà tsùuŋnà Yesù Kirisà rè.

² Arì she, Ŋaablà yeè màtsur'la, ko jaanciàn, ko kɛ̀nbààbee sìn e ra giri !

Yudè nìi dèu kààmoo doo de reè tsɛ
(Piyɛrì fiiraa 2.1-17)

³ Mun ne kɛ̀niunma rèè, mùn sa dzyèeŋnà tsii rìi mà, mun sàò na ni min goo sapɛ ko e kuru fa, min sɛbɛn ka ye re tɔ̀ kàjaa tsɛ. Ŋà, à bàu mun mà fààn, min nèe sɛbɛn nee ka ye re, m'a ka ye màxɔ̀n ye yè bà ni ɲɛynaà kaà fa, tɔ̀ niì sìun Ŋaablà re mòò rèè rà jaa soo pe.

⁴ È ɲɛn à tsɛ, mòdzìn ì dɔɔ̀n ye sàn dzuun, nìì reè na shia Ŋaablà jɔun waa, Ŋaablà re Goomaa nìì reè kitsi goo deò nòn, fɔ dan. Twɛy mòdzìn neè ɲe re Ŋaablà ɲanwùɔ goò lakere baɔ̀ seeybɛybe goo, yè bà e dziira tsɛɛ̀ Yesù Kirisà rà, mùn Kùntsii soo pee ko mùn Tsìfaà.

⁵ Àwà mun sào ni min ye taa to goo sɔn ne, ye to kɛ̀nsɛɛn ye ba à sapɛ tɔ nòn. Nìi yɛ, ci Tsìfaà rè e re mòò rèè tsi boumaà shɔ̀ùn Misiran jamaan doùn, nìì reè na ɲɛn à ra waa, à twɛy vuu.

⁶ Mɛ̀rɛ̀kɛ nìì reè na to e re kùntsììbee tsììma nɔn waa, ŋà è bou e yɛr'là gbaa doùn, twɛy shì ji tsuuŋma ni jɔ̀rɔ̀kɔ ì ka kudɛyn tsitsiì brìsià ɲàn, yè kitsia jisee blaa màshu ji tsuù.

⁷ Sodomùn, ko Gomɔrɔ̀n ko e dziire wɔ rèè sa tɔ̀ goò tsuru fau. È ɲànmɔ̀ɔ̀be fau, nìi yɛ kpiri ko kpiri gaa. Tà tsuru, sà dzibɛɛ byɛnbee bàu è nìn, è ka mòdzian sapɛ latsi.

⁸ Tɔ̀ soo tsuru taki, twɛy mòdzin neè sa gbaɔn e re sìràn goo reè kpɛyn, yè e gɔɔ̀n noo ko tɔ̀ ka. Yè e nɔn Tsìfaà rè kùntsììbee rè, yè jìrànxɔɔ̀ nɔɔrɔ ge reè tsoo bara.

⁹ Tɔ̀ to y'à tàrà, arì Mìnkayilù, mɛ̀rɛ̀kɛ rèè kùntsii blàa, waatsi riì bwèy tà ko Sànwɔbaà na e si sɔ̀ɔn yè ba e si sɔ̀swɛɛ̀ Musà fùàn tsɛ, à na e kuùn xɔbe è kitsi kunun à tsɛ, à y'à tsoo bara gooma ì ka waa. À dziun ni bàsɔùn ci: «Tsìfaà y'à koron !»

¹⁰ Twɛy mòdzin neè na nìi tɔ̀ waa, è tɔ̀ rii tsoo bar'la. È ko e dzwɛka akir'la to nìi tɔ̀, twɛy rìì yè bar'la.

¹¹ È raa barau ! È ɲɛn à tsɛ, è Kayinìn dɔ̀n shià seun, ɲɛyn goo yè bà saabu, yè e san fìrì a ci Bàlaamùn. È màbaunmaà doùn a ci Korè raà tsuru, è barau.

¹² Ye kɛ̀nbààbè ɲwɛyn nìì reè ɲɔɔ̀n esire, ye rìì twɛy bar'la. Twɛy ɲwɛyn nèè koùn, seey soo na ni è jaa ra, è ɲɔn cɛɛ̀n, è na ŋòoŋnà. È ni a ci ŋaa tsi ŋaa bɛy, fyɛɛn nìi sen beè. È ni a ci gɔ̀ɔ̀ku ì, dzin na jaà è ra e dzin bwèy. È san jaa fii fau, è ko e jii rèè yè fù.

¹³ È ni a ci kòòyua fù tèynkɔɔn ku reè, è kànkankɔɔn yè è seeyragoo reè bo jia. Yè bà ni a ci swɛyn tsyeerekɔɔn ì, tsitsiì tsìù bian nì màrà tsùuŋnà è tɛyn kudɛyn.

¹⁴ Nìi Enɔkì, Adamà tsua dzin ɲɛɛnunaa, tɔ̀ sa kɛɛrabee fau, è nèe gooma ree dè ɲɛn ye rìì tsɛ ci: «Tsìfaà nàuma siin e re mɛ̀rɛ̀kɛ rèè gbaayirika ka,

¹⁵ è bà ni kitsia kùnùn mòdzian sapɛ tsɛ. Nìì reè na shia Ŋaablà jɔun waa, è kitsi mɛɛy twɛy sapɛ tsɛ e faadzii ɲaan neè kamà, tà ko Ŋaablà jɔun shiɲaanbɛybeè doùn, twɛy gooɲaan fa reè gooma xɔù gè o ge dèu.»

¹⁶ Kudɛyn ŋùnùnŋùnùn vu na do jàa ye rìì dzu e re jaamabee kamà, è taama to na dzi. È yɛ̀r'leè kur'la goo ɲaan neè rìì yè kuru kuɔn, gooma bla blaa yè bà ni è dzu. Yè nɛɛ̀n wɔɔ̀ mòdzian dzuun e yɛr'la nàfaà kamà.

Yudè rè làtsìì latan neè

¹⁷ Ŋà nìi ye, mun ne kɛ̀niunma rèè, mùn Tsìfa Yesù Kirisà rè kɛɛradzin neè nìi dèu dan, ye taa to tɔ̀ re.

¹⁸ È na dziàn ye ra ci: «Waatsi latan neè ɲàn, ɲànŋmɛ̀ynfabaa ì nà bà ni, è yɛ̀r'leè kur'la goo ɲaan neè yè bà è kuru kuɔn è ɲɛn è re Ŋaablà jɔun shiɲaanbɛybeè tsɛ.»

¹⁹ À ye rìì. È mòdzian fi vyɛɛ̀, è adamàdzin mòdzin maana ì, Ŋaablà re Dzia na ni è ɲan.

²⁰ Ŋà nìi ye, mun ne kɛ̀niunma rèè, ye fààn wɔ e yɛrɛ ɲan è ɲɛn ye re ɲɛyna fɛnɛɛ tsɛ. Ye Ŋaablà mafyɛ̀n à re Dzi Fɛnɛɛ baraka rɔ̀n.

²¹ Ye to Ŋaablà re kɛ̀nbààbee doùn, ye bà ni mùn Tsìfa Yesù Kirisà rè màtsur'la màshua rà, jaamabe dziù dòbɛɛ raa.

²² Nìì reè yè e cir'la, ye màtsuru twɛy rà.

²³ Ye swey tòfa tsi sàà rà. Swey, e shiuma yè màtsuru twɛy rà. Arì è vura vyaa, è gɔɔ̀n ɲàn gooɲaan tɔ̀ niì nooŋnà, ye tɔ̀ sa xɔbe e ma.

Yudè tsoo dzi niì ɲɛun Ŋaablà tsɛ

²⁴ Arì she, nìi dzia ye màrà, è ye tààn mɛɛ̀ mà, è ye jààkìbɛy tsiiŋma to taamadzibeè ɲàn nɔɔrɔɔ̀ jaaterema,

²⁵ Ŋaablà soo pee, mùn Tsibaà, Yesù Kirisà, mùn Tsìfaà, tɔ̀ baraka ɲan, nɔɔrɔɔ̀, ko màsàbee, ko dzibaabee, ko kùntsììbee, twɛy yè ɲɛn à tsɛ è sen fɔ dan, è nà dòònuùn nà, è be suu fɔ waatsia sapɛ dzu. Àmiinà !

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan