Bìoball air-loidhne

Tsìmotè fiiraa 3 - Bible Dzùùngoo Unicode

Polì ci nìi nà bà ni waatsi latan neè ɲàn

¹ Àyìwà Tsìmotè, e b'a tɔ̀ ci jisee latan neè ɲan, waatsi xɔ ì nà bà ni.

² Mòdzian taa fa bà ni mòò mà e yɛrɛ tɛy, è nà ɲɛɛn kɛ̀n, yè bà yɛ̀rɛ̀dèra ì, è blà e yɛr'le, è Ŋaablà tsoobarabaa ì, è na e ker'làgè blàbee, è goowuu tɔ bɛy ì, è màgoo na ni Ŋaabla ɲan.

³ Mòò ɲììɲii na e kuàn, è na matsur'la, è mòdzìn fìvyɛbaa ì, è na dzia e yɛrɛ kun, è ɲinmatààn, è na gaa goowùù ra,

⁴ è jàànfà moo ì, è goo fa beè e kun nè, è ɲantsyɛɔ̀n yɛ̀rɛ̀blàbeè rà, dziɲaan dzibee goo reè rìì dzi è ra, è geren Ŋaablà tsɛ.

⁵ Yè e yɛrɛ baà ci ye shia Ŋaablà jɔun, tɔ̀ to y'à tàrà è na e tsiiŋnà à ɲan dzibaabee rà waa. A dan gbànbe twɛy mòdzin neè rà.

⁶ È ɲan, swey dɔ̀n beè gba ì doùn, tàan nìì reè ŋɔn fyɛn, gooɲaan seen ni è kùùn, kur'la goo kaatsià sapɛ yeè bà ni è ɲan, yè twɛy kun e re yɔ̀ɔ̀ ka.

⁷ Kudɛyn twɛy taan rèè rìì ni kàr'nà, è to fa dzi sààbeen tɔ̀uma tàrà.

⁸ Àwà, Zhanɛsì ko Zhanbɛrɛsì yè e dzun wɔu Musà rà nìi tsuru dan, y'à sɔ̀swɛy, tɔ̀ soo tsuru, twɛy mòdzin neè sa yeè e dzun wɔɔ̀ sààbeen rà, y'à sɔ̀swɛy. È mòdzin akiri barauma ì, è to na gèsɔn wùbee ɲɛynaà kàjaa tsɛ waa.

⁹ Ŋà, bèma na ni è ra jɔun dɛ. È re akiribɛybeè dzuun nà bo mòdzian sapɛ jaa ra, a ci nèe mòkun fii rèe raà tsuru.

Polì ci Tsìmotè nìi kàraun, à shìuma yè to tɔ̀ rà

¹⁰ Ŋà nìi wo, wo mun sàn siin kàjaa sapɛ tsɛ, wo y'à gban mun kpɛyn. Kàr'nà kàjaa tsɛ, jìì saàn kàjaa tsɛ, goo farama rèè kàjaa tsɛ, ɲɛynaà kàjaa tsɛ, mɔ̀ɲɔɔn kàjaa tsɛ, kɛ̀nbààbee kàjaa tsɛ, ɲànshia kàjaa tsɛ.

¹¹ Goo xɔ xɔù nìì reè ko byɛnbe niì reè sapɛ mun tàrau Antsiyɔshì ko Ikoniyɔmùn ko Lisìrì wɔ̀ rèè ɲàn, twɛy yè bà à tɛ̀y. Tɔ̀ goo xɔù kɛ̀n ni ci mun na à tsi n ma ! Ŋà Tsìfaà mun tsi bou tɔ̀ sapɛ ɲan.

¹² Àwà, nìì reè sapɛ sao ni yè e re jaamabee fa Ŋaablà jɔun shiɲaanbe tsɛ Yesù Kirisà ɲàn, byɛnbe nà ɲɛn twɛy sapɛ tsɛ.

¹³ Ŋà nìi mòdzìn ɲan reè, ko mòdzìn sànfir'leè, twɛy nà bèe jɔun ɲaan faa rà, yè dzyee rèè sàn fìrì, è sa yeè bà mòdzin san fìriuma ì.

¹⁴ Àwà nìi wo, a nìi kàraun, e bà ɲɛɔ̀n à ra, tɔ̀ kun a si fii ka. È ɲɛn à tsɛ, nìì reè wo kàraun à ra, wo twɛy tɔ̀.

¹⁵ Fɔ wo dziinkoomɛyniinkɔɔn nà, wo Ŋaablà re Kìtaabuà tɔ̀. Tɔ̀ rii dzia wo bà akiritsi, wo yè bà ni tsi ɲɛynaà baraka rɔ̀n, Yesù Kirisà ɲàn.

¹⁶ Ŋaablà re Goomaa gè o ge, à sapɛ bou wò rii lè, à y'à wɔ e sɛbɛnbaa rèè dzu. Nàfà to ni à ɲan, è mòò kàràn, è mòò dzuun bo, è mòò teren, è mòò koron ji terenbee shia tsɛ,

¹⁷ gè riì ni à to, Ŋaablà re faagoofabaà yè bà mòdzin mɔunma, à dzii yè bà tsyɛɔ̀n faagoo wuu faa sapɛ dzyeèma kajaa tsɛ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan

﻿﻿Tsìmotè fiiraa 3 - Bible Dzùùngoo Unicode

Tsìmotè fiiraa 3 - Bible Dzùùngoo Unicode