Bìoball air-loidhne

Tsìmotè fiiraa 2 - Bible Dzùùngoo Unicode

Polì ci Tsìmotè yè bà Yesù Kirisà rè kaadzin wuu

¹ Tà doùn, n dzin kpiri, Ŋaablà ɲanwùù riì ni Yesù Kirisà ɲàn, fààn tarà bo tɔ̀ ɲan.

² Wo nìi myɛ̀un mun dzu shɛɛrɛ giri jaa ra, tɔ̀ kɛ̀ɛ̀yfa mòdzin ì mà a ɲɛɔ̀n nìì reè rà, è sa yeè bà dzia à kàràn mòò kpɛrɛ ì rà.

³ A nin byɛnbee fa, a ci Yesù Kirisà rè kaadzin wuu.

⁴ Kaadzin niì y'à gaa wò goo yè dzibe e kuntsiɛ̀ rà, tɔ̀ na jaamabee goo kpɛrɛ ì ka e vyɛɛ waa.

⁵ Tɔ̀ soo tsuru, si dan vwɛɛ̀ doùn, vwɛ̀ynfabaà na dzia jɛ̀r'la tàrà tàràu'n kuru pɛn na, à mà bà vwɛ̀ɛ̀ sàrìya reè latsuuŋnà waa.

⁶ Fɛɛfabaa rìi byɛɛn è fɛɛ fa, tɔ̀ rii jɔ̀na wù è nin tarà shìmaan ɲàn.

⁷ N nìi dèe, à jàtsi kun. È ɲɛn à tsɛ Tsìfaà nà wo kɔ̀ akiri, wo y'à sapɛ faànmun.

⁸ A taa to Yesù Kirisà rè, màsà kpiri Dawudà tsua dziàn, tɔ̀ niì kpunan bou fùn nèè fi, a ci mun yɛ Kùnàgoo Dziù rìi dèe.

⁹ Tɔ̀ Kùnàgoo Dziɔ̀ kamà, mun byɛɛn, fɔ min bè shì jɔ̀rɔ̀kɔ ra a ci gookoronfabaa. Ŋà Ŋaablà re goomaa na shiɔ̀ waa.

¹⁰ Tɔ̀ rii y'à to mun goò sapɛ ladzyèèmaa tsià n ma, Ŋaablà jaara moo rèè kamà, gè riì ni à to Yesù Kirisà baraka ɲan, twɛy sa yeè tsiuma tàrà, yè nɔɔrɔ dòbɛɛ tàrà.

¹¹ Nèe gooma, mòò dzia ɲɛn nìi rà: «Mìn ba saun ko à ka, mùn nà jaamabee fa ko à ka.

¹² Mùn sàn gbaunma ye to à kpɛyn, mùn nà màsàbee fa ko à ka. Mùn to ye e dziira tsɛ à ra, à sa nà e dziira tsɛ mùn nà.

¹³ Ɲe ma ba vusootsi, à vuusootsi, kàtsu, à na dzia e dziira tsɛ e yɛr'la waa.»

Polì ci Tsìmotè yè bà faagoofadzin wuu

¹⁴ Mòdzian taa to twɛy goo rèè rè, a dè màxɔbe è ra Ŋaablà jaa ra, ci è mà gooma ì kùùn si sɔswɛy gir'là fa waa. È ɲɛn à tsɛ à yè e lamyɛ̀nbaa rèè màgoo bara boshɔ̀ùn, à na gèsɔn wùbee waa.

¹⁵ A maxɔbe, a yɛrɛ kpadè faagoofadzin wuu Ŋaablà ra, nìi fa seey tàrà waa, è bà sààbeen goomaa dèe e shi tsɛ.

¹⁶ Gooma nafà bɛy niì reè ko Ŋaabla goòmàà na byɛɛ̀n waa, twɛy jɔun bo. Nìì reè ni è fyɛ̀ùn, twɛy bèe jɔun Ŋaablà jɔun shiɲaanbɛybeè ɲàn.

¹⁷ È dzugooma reè ni a ci ɲuun ɲaùn jee ji bekɔɔn. Imɛnɛ̀ ko Filetɔsì sa twɛy mòdzin neè sɔn ni.

¹⁸ Twɛy sààbeen shia bàjiu è dzinkɔɔn doùn ci fùn nèè sèè kpunaun nòn. È ɲɛn tɔ̀ tsɛ, è swey rè ɲɛyna bar'la.

Polì ci Ŋaabla dzunbama nìi tsùuŋnà, tɔ̀ na dzia bo e shɔùn waa

¹⁹ Tɔ̀ ko e sa ra Ŋaabla dzunbama nìi tsùuŋnà, tɔ ni e shɔùn kpan, nèe gooma ree reè yè bà sɛbɛɔ̀n à tsɛ tàànmàshɛn, nìi yɛ ci: «Tsìfaà yè e raa rèè tɔ̀.» Tà ko «Mòò o moò Tsìfaà tsoo kir'là, è dan gbànbe terenbɛybee rà.»

²⁰ Gbà blàa doùn, tàànge sɛnuma ì ko warifyɛma ì bàsɔùn na ni waa. Swey gɔ̀ɔ̀ma ì, swey yè bà dzùma ì. Swey jisee bla blaa faagoo faara ì, swey yè bà jisee maana reè faagoo faara ì.

²¹ Tà doùn, mòò riì nà e foò fyɛ bo twɛy goo rèè sapɛ ɲan, tɔ nà bà jisee bla blaa faagoo faa tàànge, nìi fɛnɛɔ̀, è tsifaà màgoo wubee, à mà yè bà byɛ̀n tsùuŋnà faagoo wuu faa sapɛ kamà.

²² Vwɛ̀yn dzunwɛynbeè kur'la goo reè jɔun. Nìì reè yè e vu boò Tsìfaà rà ko duun fyɛ ka, e terenbee, ko ɲɛynaà, ko kɛ̀nbààbee, ko jaanciàn gaa twɛy ka.

²³ Sɔ̀swɛy gɔ̀rɔ̀, akiribɛy goòmà rèè jɔun bo. W'a tɔ̀, ci twɛy nàa kaà rìì ka.

²⁴ Tɔ̀ to y'à tàrà, Tsìfaà rè faagoofadzian na wù è bà kaafabaa waa, ŋà è bà mòdzin, nìi vunun ma dzi mòdzian sapɛ ka, à dzia kàràn sian nà, è bà dzia goo ku e ɲan.

²⁵ Sɔ̀swɛ̀y fa reè, è twɛy kàràn ko vununmacin ka. Gè sɔ̀n ge Ŋaabla dzia cinan è mà, yè e re jaamabee lakere, yè sààbeen tɔ̀.

²⁶ Tà tsuru è akir'là sèeŋmaà è mà, è nà tsi bo Sànwɔbaà rè yɔ̀ɔ̀ dzu tɔ̀ niì na è kuɔn, yè bà à sàɔ faa.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan

﻿﻿Tsìmotè fiiraa 2 - Bible Dzùùngoo Unicode

Tsìmotè fiiraa 2 - Bible Dzùùngoo Unicode