Bìoball air-loidhne

Piyɛrì fiiraa 1 - Bible Dzùùngoo Unicode

Sɛbɛɛn kaɔ nìì reè rè, ko dzwɛɛ̀

¹ Mun Shimɔn Piyɛrì, Yesù Kirisà rè jòn kpir'la ko a re kɛɛradzian, nèe mun ne sɛbɛn, è sìn mòdzin ì nà, ɲe ko nìì reè sa ɲɛyna soo tàrau nìi kpaxɔ, mùn ne Ŋaablà ko mùn Tsibaa Yesù Kirisà rè terenbee baraka ɲan.

² Arì she Ŋaablà ɲanwùɔ ko jaanciàn, twɛy yè sìn e ra giri, Ŋaablà ko mùn Tsìfa Yesù tɔ̀umaà baraka rɔ̀n !

Piyɛrì ci goo nìì reè wù yè bà ni ɲɛynamoò ɲàn

³ Goo nìì reè baraka ɲan mùn jaamabee faa, Ŋaablà jɔun shiɲaanbe yè bà ni mùn ɲan, à re ŋaablabee dzibaabee twɛy sìun mùn na, à y'à to mìn kiribaà tɔ̀, tɔ̀ niì mùn kiriu e yɛr'la nɔɔrɔɔ̀ ko e re wùɔ baraka rɔ̀n.

⁴ Twɛy baraka ɲan, gè blà kpaxɔù nìì reè làyiri seun mùn ne, twɛy sìun mùn na. Tà tsuru goo fyeeŋma nìì reè ni dziɲaan doùn, kur'la goo ɲaan yè bà saabu, ye nà dzi e tsi twɛy rà, ye yè e nin tàrà Ŋaablà juɔ ɲàn.

⁵ È ɲɛn tɔ̀ kùàn yɛ̀r'la tsɛ, ye maxɔbe, ye goò sapɛ ko e kuru fa, ye wùɔ bà ɲɛynaà tɛ̀y, ye twɛ̀ɛ bà wùɔ tɛ̀y,

⁶ ye yɛ̀rɛ̀kuan bà twɛ̀ɛ tɛ̀y, ye mɔ̀ɲɔɔn bà yɛ̀rɛ̀kuan tɛ̀y, ye Ŋaablà jɔun shiɲaanbeè bà mɔ̀ɲɔɔn tɛ̀y,

⁷ ye neemabee bà Ŋaablà jɔun shiɲaanbeè tɛ̀y, ye kɛ̀nbààbee bà neemabee tɛ̀y.

⁸ Àwà twɛy goo rèè ye ba ni ye ɲan yè bà buu bèe, è fa à to ye yè bà mòdzin faadzii bɛy, nàfa na ni nìì reè ɲàn waa. Tà tsuru ye nà mùn Tsìfa Yesù Kirisà tɔ̀ cɛyn.

⁹ Ŋà twɛy goo rèè na ni mòò riì ɲan, tɔ ni a ci jaana, à na gèsɔn jàa waa. À fòò fyɛ bo rìi fau e re dan gooɲaantsiɛ ɲàn, à taa myɛ̀un tɔ̀ re.

¹⁰ Tɔ̀ kamà n neema ì, Ŋaabla ye kir'lìi fau è ye bo e jaara, ye e maxɔbe, ye tɔ̀ sàn gban. Tɔ̀ ye fa, goo sɔn pɛn fa à to ye yè e san nà ban dɛ.

¹¹ Tɔ̀ tsuru, mùn Tsìfaà ko mùn Tsibaa Yesù Kirisà rè màsà gane dobɛɛ dziɛ̀ nà san ye re brìsi, ye yè bà ni dɔn.

¹² Tɔ̀ rii y'à to ye kɛ̀nsɛɛn ye ba twɛy goo rèè jaa tɔ̀, ye sàn yè bà gbaɔn tɔ̀ sààbeen ɲàn, à wù min ye taa toò è re kudɛyn.

¹³ Ɔ̀ɔn, è mun to gɔɔ̀n ɲàn dzɔ̀nxɔɔ̀ rèe tsɛ, m'a jàa ci à tereòn min ye taa ra tsìì, ye taa tokɔɔn doùn twɛy goo rèè rè.

¹⁴ È ɲɛn à tsɛ m'a tɔ̀ ci sani dɛyn mun nà bo gɔn nèe ɲan, a ci mùn Tsìfa Yesù Kirisà y'à kpàdèu mun na nìi tsuru.

¹⁵ Tɔ̀ kamà, mun nà goò sapɛ ko e kuru fa, gè riì ni à to arì mun dɔ̀n bèuma shɔ̀ùn, ye taa yeè toò twɛy goo rèè rè waatsi sapɛ.

Piyɛrì ci ye jaadzin ɲɛun Kirisà nɔɔrɔɔ̀ mà

¹⁶ Ɲe na e gban mòdzin ì kɛ̀sɛmà raa sina cee goòmà ì kpɛyn ɲe yè mùn Tsìfa Yesù Kirisà rè dzibaabee ko à nàa gooma de ye ra dɛ, ŋà, ɲe yɛ̀r'la jaadzin ni ɲɛun à blàbee mà.

¹⁷ È ɲɛn à tsɛ, à blàbee ko nɔɔrɔɔ̀ tàrau è bo Fà Ŋaablà re waatsi riì bwèy, vu sɔn daun è bo Ŋaablà ko e nɔɔrɔ wùɔ rè, tɔ̀ ye dzin ci: «Nèe mun Dzin Kpir'la rìì yɛ nèe, mun nìi kɛ̀niɔ̀n fɔ è bè geren, è bà dzibeu mun na.»

¹⁸ È ɲe to jèn fɛnɛɛ tsɛ ko a ka, ɲe yɛ̀r'leè tɔ̀ vuà myɛ̀un è bo jìrànxɔ rɔ̀n.

¹⁹ È bà tɔ̀ tɛ̀y, kɛɛra reè rè goomaa sa ni mùn ne, nìi gooma san gbaunma, à dzi yè bà ni ye re, y'a kààwɔ cɛyn. Tɔ ni a ci fìtsìnà vyee, nìi deèn tsitsii gane ɲan è bè suu fɔ dzɔ̀n via dzu, fɔ dzɔ̀nvìdziɛ rè swɛɛ̀n yè nà vyevyeè bo ye dùsùkun neè tsɛ.

²⁰ Soore, ye bà à tɔ̀ ci tɔ̀ kɛɛra goòmà na ni Ŋaablà re Goomaa doùn, adamàdzin mòdzin soo ko e soo dzia nìi dzuun de e yɛrɛma waa.

²¹ Àwà, tɔ̀ kɛɛrabe goòmà na ni, adamàdzin mòdzin dziu nìi dè e yɛr'la sàò ka waa. Ŋà Ŋaablà re Dzi Fɛnɛɛ rìì baraka ɲan, adamàdzin mòdzin ì dziu gooma, Ŋaablà re gooma ɲan.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan

﻿Piyɛrì fiiraa 1 - Bible Dzùùngoo Unicode

Piyɛrì fiiraa 1 - Bible Dzùùngoo Unicode