Bìoball air-loidhne

Matsiyù 3 - Bible Dzùùngoo Unicode

Mòdzìn Jààràfoobaa Yùxanà rè waajibia gooma reè
( Marikì 1.1-8 ; Lukì 3.1-20 ; Yùxanà 1.19-34 )

¹ Àyìwà, tɔ̀ waatsi rɔn, Mòdzìn Jààràfoobaa Yùxanà yè e kungɔ bo Yude mar'la jènjàà kor'nà doùn, è bà waajibia faa.

² À dziàn ci: «Ye e tsiì e re gooɲaan nà, ye e re jaamabee fau'n kur'la lakere, kàtsu Jìrànxɔɔ̀ Màsàbee waatsi tsyɛnbeò.»

³ Kɛɛra Esayì Yùxanà nì gooma deu, à dziunmaà nèe tsuru ci: «Mòdzin sɔn sɛɛ̀y vu boò jènjàà kor'nà doùn ci: "Ye mùn Tsìfaà rè shia lamɔnɔ̀n tsùù ! Ɔ̀ɔn ye shi ì sɔ̀nbyɛ̀n tsùù à re, yè bà tereòn cɛyn !"»

⁴ Vya rìi na ni Yùxanà vu ra, tɔ̀ na faɔ̀ ɲɔ̀ɔ̀nmɛ̀n suɔ̀ rìì ka, à re ɲànshìàgee yè bà na tsùn. Kɛ̀ynjàko reè, ko jòon nɔ̀n gaà rìì na à re ɲwɛyn.

⁵ Mòdzian na nàa à re, yè bo Yerusalɛmùn wɔ̀ rɔ̀n, ko Yude mar'la min niì sapɛ, ko Yuridɛn baa màr'là min niì sapɛ.

⁶ È na e tsiɛ e re gooɲaan fauma rèè rà y'à dè. Y'à to, Yùxanà yè è jaara foò Ŋaablà re shia goo rèè rà Yuridɛn ba rɔn.

⁷ Àwà Yùxanà y'à jàu Faridziɲɛn rèè giri, ko Sadusiɲɛn rèè giri nàa, sànko wò yeè è jaara foò Ŋaablà re shia goo rèè rà, è dzin è ra ci: «Fɔnfwɛyn kuru ì, tsì rii vwɛ̀yn jaa kpàdèu ye ra, Ŋaablà re vununta nàkɔɔn jɔun ?

⁸ Ye goo rìì fa, nìi nà à kpàdè, ci ye yè e re jaamabee fau'n kur'la lakereò.

⁹ E maà à ji e duùn, ye dzin ci ye Ibraximà tsua dzin ì dɛ ! Àwà, mun nì ci e ra, è ba tɔ̀ rii, arì kpàà niì reè yɛ nèe, Ŋaabla dzia è lakere ba Ibraximà tsua dzin ì.

¹⁰ Nìi kpɛ̀yn flàa, tɔ̀ ɲansen ji tsuuŋmaà nì ni nòn, gɔ̀ɔ rèè jèè boò kamà fɔ e jiɛ̀ rà. Gɔ̀ɔ o gɔ̀ɔ na dzin wùù wɔɔ̀, è sapɛ nà jèè bo, yè maa sa rɔ̀n.

¹¹ Mun kpɛ̀yn ye jaara foo yu rìì ka, è kpàdè ci ye yè e re jaamabee fau'n kur'la lakereò. Ŋà mòo nàa mun shɔ̀ùn, fàan ni nìi ɲàn, è geren mun tsɛ. Arì min bà ni tɔ̀ re seereyn neè bo à sàn nà, mun na wù tà tsu ka waa. Tɔ nà ye jaara foò Ŋaablà re Dzi Fɛnɛɛ ko sàà rìì ka.

¹² À re shìmàn fyɛɛ gèè kuuna à suun, à nà tɔ̀ ka shìmaan ɲààn fyɛ bo dziàn ɲàn. Tɔ̀un, è dziàn tsɛ̀ ji bòndoo doùn. Ɲààn, è tɔ̀ fla bo e re kpèndee doùn, à y'à dzu sà ka, sà rìi na dzià waa.»

Yesù jaara fòoŋ min niì
( Marikì 1.9-11 ; Lukì 3.21-22 )

¹³ Tɔ̀un, Yesù yè dan è bo Galile mar'lɔùn, è nà Yùxanà rè Yuridɛn baa rà, sànko è wò jaara foò Ŋaablà re shia goo rèè rà.

¹⁴ Yùxanà sàò na ni wò yeè e nɔn. À ci: «Mun nì màgoo ni à ra, mun jaara yeè fòò wo re. Wo to ye ba nàa mun ne kɔn do ?»

¹⁵ Yesù yè dzin à ra ci: «À to tɔ̀ yeè fa dòònuùn. Àwà, Ŋaablà ci nìi sapɛ tereòn farama, à wù ɲe yè tɔ̀ bo e shi tsɛ tà tsuru.» Tɔ̀un, Yùxanà yè e tsiì, à jaara yeè fòò.

¹⁶ Àwà, Yesù jaara fòò dòu min niì, è bo yu rɔ̀n. À bou min niì, jìrànxɔɔ̀ dzii yè san. Tɔ̀un, è Ŋaablà re Dzia jàà nakɔɔn ja a ci màsàkere, è nà à tsɛ.

¹⁷ Vu sɔn yeè bo ŋaablaxɔ rɔ̀n tɔ̀un, tɔ̀ yeè dzin ci: «Min Dzin Kpir'liì kɛ̀niɔ̀n, nèe tɔ̀ rii. À goò dzi mun na fɔ è bè geren.»

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan