Bìoball air-loidhne

Marikì 4 - Bible Dzùùngoo Unicode

Yesù nìi dèu shìmàndzin sɛnkɔɔn tsɛ
( Matsiyù 13.1-9 ; Lukì 8.4-8 )

¹ Àyìwà Yesù yè sèè be e shɔùn Galile yu blàa dzii kpɛyn, è bè e maa è mòdzian kàr'na kɔn yeu. Jàmaà yè nà e ladzyèè à tɛyn mɔn giri, fɔ è bè wɔ è dɔ̀n è tsuù konkoron sɔn doùn, è bà ni yuà tsɛ, jàmaà sapɛ yeè bà tsìiŋnà kpee rà.

² À na goo giri kàr'na è ra gooma bɔɔ ɲan. À re kàr'nà doùn è dzin è ra ci:

³ «Ye e toro wɔ ! Àwà fɛɛfabaa sɔn bou, ci wo bèe shìman sɛn e re dzù rɔ̀n.

⁴ Shìmaan sɛ̀nkɔɔn doùn, shìmàndzin neè swey yè tɔrɔn tɔrɔn shi dziɛ rè. Kɛ̀yn neè yè nà, yè twɛy fɔn.

^5-6 Swey yè tɔrɔn tɔrɔn faa ganee ɲàn, dzùà tsun fyɛn min niì. Tɔ̀ nɔ̀nkɔɔrɔn twɛy yè xe. Dzùà tsùn fyɛ̀nbee kamà, è jiɛ̀ na gbama waa. Tɔ̀un, bwèè nàu bo min niì, è twɛy shìmànku rèè flàn, yè gɔ̀rɔ̀.

⁷ Shìmàndzin neè swey tɔrɔnmà yè bè kòrò daaku ì ka. Twɛy xeu, daaku rèè yè bɔɔ fù, twɛy yè è kun, è na dzi dzin wɔ waa.

⁸ Shìmàndzin neè swey yè bè tɔrɔn dzù wùù gane ɲan. Twɛy xeu, yè bɔɔ, yè shìmàntan ì wɔ. Swey dzin mòòtsyeùn, swey mùey, swey yè bà càànmoò.»

⁹ Tà shɔ̀ùn, Yesù yè dzin ci: «Toro ì ye ba ni mòò riì rè, è bà è ka myɛ̀yn faa, è toro wɔu'n kuru wube dɛ !»

Gooma bɔɔ rèè dè kuàn
( Matsiyù 13.10-17 ; Lukì 8.9-10 )

¹⁰ Àyìwà, Yesù nàu bo jàmaà tɛyn waatsi riì bwèy è bà ni e soone, nìì reè dɛ̀rɔɔ̀n yè bà ni à ka, ko à re kàràndzin teeŋ fiɛ̀, twɛy y'à tey gooma bɔɔ rèè dzuun ma.

¹¹ È dzin è ra ci: «Nìi ye, Ŋaablà re màsàbee gòndoo tɔ̀ɔ twɛ̀ɛ sìun ye ra, ŋà dzyee rèè, twɛy y'à sapɛ myɛɛ̀n gooma bɔɔ rèè rìì ɲàn.

¹² Tà tsuru, "è dzia siin fa cèreoma, ŋà è fa gèsɔn pɛn jà. È dzia myɛ̀yn fa cèreoma, è to fa gèsɔn pɛn dzin sen. Tɔ mà nà to bà saabu, yè lakere, è re gooɲaantsiɛ yè mɛɛy bo è vu ra waa."»

Yesù shìmàndzian gooma bɔɔ̀ dzuun deu min niì
( Matsiyù 13.18-23 ; Lukì 8.11-15 )

¹³ Tà shɔ̀ùn è dzin è ra kɔn ci: «Ye ma nèe gooma bɔɔ rèe dzuun tɔ, ye nà dzyee rèè sapɛ dzuun tɔ dzùrù.

¹⁴ Shìmànsɛnbaà, tɔ Ŋaablà re Goomaa nì sɛ̀ɛn.

¹⁵ Mòdzin neè swey ni, a ci shìmàndzin neè tɔrɔun shi dzii niì rè. Ŋaablà re goomaa myɛ̀nkɔɔn yɛ è re, tɔ Sùtana nàuma, è nà à sen bo è ɲan.

¹⁶ Swey ni, a ci shìmàndzin neè bèu tɔrɔn faa gane riì ɲàn. È ye Ŋaablà re goomaa myɛ̀n nìi tsuru, tɔ̀ nɔ̀nkɔɔrɔn yè tsiɛ à ra ko taamadzibe ka.

¹⁷ Ŋà, à na baà e jii gbaɔn è ɲan waa. Tà tsuru è toò à tsɛ waatsi dɛɛnin bàsɔùn doùn, ŋà goo xɔù ye è ji nìi tsuru, tàmafa mòdzian yè fù è kpɛyn gooma ree kamà, tɔ̀ yeè è sèè bouma à kpɛyn.

¹⁸ Swey ni, a ci shìmàndzin niì reè bèu tɔrɔn daaku ganee ɲàn. Twɛy mòdzin neè Ŋaablà re Goomaa myɛ̀ɛn,

¹⁹ ŋà è vyɛ̀ɛ̀yràgoo reè dziɲan ree doùn, ko nàfor'la raa sànfir'la, ko è kur'la goo giri kpɛ̀rɛ̀kuru bàa saabu è gooma ree ŋòò è ɲan, à na dzia dzin wɔ waa.

²⁰ Swey yè bà ni a ci shìmàndzian bèu tɔrɔn dzù wùù gane riì ɲàn. Twɛy rìì Ŋaablà re Goomaa myɛ̀ɛn, yè e tsiì à ra. Twɛy dziàn tɔ̀un. Swey dzin mòòtsyeùn, swey mùey, swey yè bà càànmoò.»

Yesù nìi dèu fìtsinaà tsɛ
( Matsiyù 8.16-18 )

²¹ Àwà twɛy gooma reè shɔ̀ùn, Yesù yè dzin è ra ci: «Mòò sa fìtsina dzu wɔ naà è nà gèè sɔn kuu à tsɛ, tàmafa à y'à tsùù ɲaangee dzuun ɔn ? À na dzu wɔɔ̀ è tsùù fìtsìnà tsuuma nɔ̀n nì ɔ̀ ?

²² Tà doùn, goo o goo mɛnɛɔn, à sapɛ nà bo da. Goo o goo to gòndo, à sapɛ nà bo ji vyevyeè rà.

²³ Toro ì ye ba ni mòò riì rè è bà è ka myɛ̀yn faa, è toro wɔu'n kuru wube dɛ !»

²⁴ Tà shɔ̀ùn è dzin è ra kɔn ci: «E nìi myɛ̀ɛn, ye tɔ̀ kààwɔ cɛyn. Ye dzyee rèè raà gɔ̀ɔn gè niì ka, tɔ̀ rii nà ka ye raà sa gɔn. Sɔn sa nà bà ye raà tɛ̀y.

²⁵ Àwà sɔn ni nìi rè, ge nà bà tɔ̀ raà tɛ̀y. Ŋà pɛn na ni nìi rè, kiɲaanin nìi ni à re, tɔ̀ sa nà tsi à ra.»

Yesù ci Ŋaablà re màsàbee boo shìmàndzian bɔrɔun'n kur'la rè

²⁶ Yesù yè dzin kɔn ci: «Ŋaablà re Màsàbee boo gè niì rè tɔ̀ rii siin: Àwà kpiri sɔn shìmàndzin sɛun e re dzù rɔ̀n.

²⁷ Fen sen ɲɛn bwèy tsɛ, à cìiŋ ò, à to tou e jaa ra o, shìmàndzin nee xeè è bɔɔ bèe nìi tsuru, à na tɔ̀ tɔ̀ waa.

²⁸ Dzɔ̀nxɔɔ̀ y'à xe boò e yɛrɛ ŋe, è kòmànà bà gèku. Tà shɔ̀ùn è tan wɔ, è dziàn wɔ tɔ̀ ra.

²⁹ À ye bɔɔ dzi waatsi riì bwèy, è kòmànà kììna gaa à kpɛyn è tsyɛ, kàtsu shìmàn gaa bwey wɔu.»

Yesù ci Ŋaablà re màsàbee boo kaanindzin ne
( Matsiyù 13.31-32 ; 13.34-35 ; Lukì 13.18-19 )

³⁰ Yesù yè dzin tà shɔ̀ùn kɔn ci: «Mùn nà Ŋaablà re màsàbee gɔ̀n fee ka kɔn ? Gooma bɔɔ kɛ̀n ni dzia à kpàdè mùn na ?

³¹ À boo kaanindzin ni nè: à sìumaà, wò rii dzyɛ̀n dzɔ̀nxɔɔ̀ tsɛ gèdzian sapɛ ma.

³² À to ye xe, à bɔɔ̀, è blàbe naankɔɔ rɔ̀n nangekuà sapɛ ma. À sààn neè blàbee, fɔ jìran nɔ̀n kɛ̀yn neè yè nà e taàn ji à cin nɔ̀n.»

³³ Àwà Yesù na tɔ̀ tsuru gooma bɔɔ giri ka Ŋaablà re Goomaa kàr'na mòdzian nà, è nà dzi nìi dzin sen.

³⁴ À naà gooma pɛn dèe è ra gooma bɔɔ shɔ̀ùn waa. È ba à ko e re kàràndzin neè bàsɔùn waatsi riì bwèy, è kòmànà à sapɛ dzuun de twɛy rà.

Yesù fyɛn blaa màɲɛun min niì yuà tsɛ
( Matsiyù 8.23-27 ; Lukì 8.22-25 )

³⁵ Àyìwà, tɔ̀ sii sèè ɲɛ̀rɛɛ̀ rɔ̀n ko e sa, Yesù yè dzin e re kàràndzin neè rà ci: «Y'a wa mìn yu blàa fuu, m'a wa à kɛ̀yn.»

³⁶ Yesù ko e re kàràndzin neè jàmaà tou mɔn tɔ̀un, Yesù na ni konkoron niì doùn, yè dɔ̀n tɔ̀ doùn, konkoron kpɛrɛ ì sa yeè bà ni è ka.

³⁷ À yè è bèkɔɔn to yuà tsɛ, fyɛn bla sɔn yeè bàràma fu. Tɔ̀ fyɛɛn rè yuà pàngòpangokɔɔn yè yuà sɛrɛ sɛrɛ jia konkor'na doùn, fɔ à gaa tsyɛn.

³⁸ Tɔ̀ y'a tàrà, Yesù ɲɛɔ̀n konkor'na bònè, à kùngɔɔ̀ ni kùngɔ̀tsuuraà tsɛ, è bà ciɛ̀. Tɔ̀un, kàràndzin neè y'à kpunan, yè dzin à ra ci: «Kàrànfaà, yuà nàkɔɔn yɛ mùn ɲɔn, tɔ̀ to yè bà wo vyɛ̀rɔɔ̀n kɛ̀ ?»

³⁹ Yesù kpunaun tɔ̀un, è cerè fyɛɛn tsɛ, è dzin yuà rà ci: «A maɲɛn, a y'a ŋɔn nìn !» Tɔ̀un fyɛɛn yè e maɲɛn tɛ, màànkaan sapɛ yeè dò.

⁴⁰ Tà shɔ̀ùn è dzin è ra ci: «Fee y'à to ye yè bà shia nèe tsuru ? Arì she ye na ɲɛn Ŋaablà ra ŋe o ?»

⁴¹ Kàràndzin neè yè shi fɔ è bè geren, yè dziàn e si ra ci: «Nèe tsì rii tɔ̀ tsuru, fyɛɛn ko yuà sa yeè bà à re dèumaà myɛ̀ɛn, y'à shi jiì ?»

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan