Bìoball air-loidhne

Marikì 13 - Bible Dzùùngoo Unicode

Yesù nìi dèu Ŋaablà re gbà blàa ci goo tsɛ
( Matsiyù 24.1-2 ; Lukì 21.5-6 )

¹ Àyìwà, Yesù bokɔɔn Ŋaablà re gbà blàa doùn, à re kàràndzin neè soo yeè dzin à ra ci: «Kàrànfaà, w'e Ŋaablà re gbà blà ree siin ! À kpàà reè wùù wuu, à jiu'n kuru wù.»

² Yesù ci à ra ci: «Wo jaa ni tɔ̀ gbà blàa jiumaà nà ɔ̀ ? Àwà à kpàà dzin soo fa to soo tsɛ waa, à sapɛ nà jee bo e si tsɛ.»

³ Tà shɔ̀ùn, Yesù yè bè e tsuù oliviku rèè jèèn tsɛ, à jaa yè bà kereò Ŋaablà re gbà blàa rà. À ni mɔn, Piyɛrì, ko Yàkubà, ko Yùxanà, ko Andère yeè b'a tey e si.

⁴ È ci: «Tɔ nà fa waatsi riì, tɔ̀ dè mùn na. Tàànmàshɛn kɛn ni nà à to ɲe y'à tɔ̀, ci twɛy goo rèè sapɛ fa waatsi wɔu ?»

Yesù ci goo nìì reè nà bà dziɲan doo tàànmàshɛn
( Matsiyù 24.4-44 ; Lukì 21.8-33 )

⁵ Àwà, Yesù yè e maa tɔ̀un, è dziàn è ra ci: «Ye e yɛrɛ kaàwɔ, mòò pɛn mà nà e san fìrì waa.

⁶ Mòò giri nà nà mun tsoo ka, yè nà dzin ci ye rìì Ŋaablà Jaara Modzìàn. È to nà mòò giri sàn fìrì.

⁷ E ye na kaa goo ɲan gooma reè myɛ̀ɛn waatsi riì bwèy, kaa blà blaa màànkaan yè bà ni, e maà shi waa. Fɔ tɔ̀ yeè fa ŋe, ŋà tɔ̀ fa bà dziɲaan dò bwey ŋe waa.

⁸ Kun ko kun nà fù e si kpɛyn, màsà gane ko màsà gane yeè fù e si kpɛyn. Dzɔ̀nxɔ̀ɔ̀mà kpin'na ko dzuà yè bà ni gàne giri. Twɛy goo rèè sapɛ nà bà byɛnbee dziikuan nì, a ci ɲìnìnbe riì ni tàan donkunkɔɔn tsɛ.

⁹ Ye e yɛrɛ kaàwɔ ! È nà ye wɔ kitsikun'neè suun, è to nà ye dɔrɔ e re ŋaablabegba rèè doùn. Mun kamà, è nà bè ye ka jàmààntsi rèè ko màsa reè rè. Tɔ nà bà saabu, ye yè mun shɛɛrɛbe fa twɛy rè.

¹⁰ Àwà, fɔ Kùnàgoo Dziɔ̀ goomaa yè dè be dziɲantsiɛ kun neè sapɛ ra ŋe.

¹¹ È ye e kun waatsi riì bwèy yè bè e wɔ kitsikun'neè suun, e naà gooma niì dè, e maà tɔ̀ ka e vyɛɛ̀y waa. Ŋaabla nà gooma niì wɔ ye dzu tɔ̀ waatsia yɛ̀r'la ɲàn, ye tɔ̀ rii dè. Àwà, à fa bà ye yɛ̀r'leè goomakɔɔn waa, ŋà à nà bà Ŋaablà re Dzi Fɛnɛɛ rìì.

¹² Keresi nà e keresi wɔ mòdzin ì suun y'à vu, fà yè e dzin wɔ mòdzin ì suun y'à vu. Dzin ì yè fù e fa ì kpɛyn, y'à to yè vu.

¹³ Mun tsoò kamà ye goo nà xɔbe mòdzian sapɛ ma. Ŋà mòò riì sàn gbaunma nà to fɔ è bè suu fɔ à lataan dzu, tɔ nà tsi.

¹⁴ Àwà, ye na gè cɛnbarabaa kurushiumaà tsìiŋma jà gàne ɲan waatsi riì bwèy à na wù è bà ni min niì waa, nèe gooma ree kàrànbaà y'à dzin sen. Tɔ̀ waatsia ye wɔ, nìì reè ni Yude mar'la ɲàn, twɛy yè vwɛ̀yn be jèn nèè kpàkèrè.

¹⁵ È mòò tàrà e re gbàma tsɛ, tɔ mà jàà, ci wo nà gè sen gbàà doùn waa.

¹⁶ À to ye mòò riì tàrà jòon nɔ̀n, tɔ mà dzin ci wo sèè naà, w'e nà e re mɛ̀yɛ blaa sen waa.

¹⁷ Twɛy jisee reè sii sèè, tàan fwɛynma reè, ko dzina rèè, à na naà bà byɛnbe san twɛy tsɛ.

¹⁸ Ye Ŋaablà mafyɛ̀n, à mà na fa mùnkɛɛ̀ waatsi ɲan waa.

¹⁹ Àwà, byɛnbe riì nà bà ni twɛy jisee reè sii sèè, fɔ Ŋaablà yeè dziɲan ɲɛn è bè suu dòònuùn dzu, à tsuru na fa ja ŋe waa, à tsuru to yɛ̀rɛ̀ fa fa ja dɛ.

²⁰ Àwà, Tsìfaà ma ba na sɔn boo twɛy jisee reè rà fyeu, mòò pɛn fa ni tsi waa. Ŋà à nìì reè boo e jaara, twɛy kamà, à sɔn boo twɛy jisee reè rà.

²¹ Tà doùn, mòò ye dzin e ra ci: "Ŋaablà Jaara Modzìàn yɛ mìin", tàmafa "à yɛ nuu", e maà ɲɛn tɔ̀ ra waa.

²² E maà ɲɛn tɔ̀ ra waa, kàtsu doodebaa ì nà fù, ci ye rìì Ŋaablà Jaara modzìàn, doodebaa ì yè fù, ci ye kɛɛra ì. È nà tàànmàshɛn ì ko kabagoo goo ì fa, yè bà ni mòdzian sàn fìrì. Arì Ŋaabla nìì reè boo e jaara, yè ba na dzia twɛy sa san fìrì, è na nà tɔ̀ fa.

²³ Tà doùn, ye e yɛrɛ kaàwɔ. Ye bà à tɔ̀ ci mun ye toro kɔ̀u twɛy goo rèè sapɛ ra nòn !

²⁴ Àwà, twɛy jisee reè sii sèè, tɔ̀ byɛnbee dɔ̀n bouma shɔ̀ùn, bwèè nà tsitsiì wɔ, kuɔ̀ sa yeè to e vyeè bo bɛy.

²⁵ Ŋaablaxɔɔ̀ rà swɛyn nèè nà mɛɛy, jìrànxɔ rɔ̀n dzibaabe reè sapɛ yeè yuuyuu bo e shɔùn.

²⁶ Tɔ̀un, è nà Adamà dziàn nàkɔɔn ja è bo mun'na ɲàn, dzibaabe brisi ko nɔɔrɔ doùn.

²⁷ Tà doùn, à nà e re mɛ̀rɛ̀kɛ rèè ka dziɲaan nɔ̀nkɔn nààleèn min niì sapɛ, à nìì reè boo e jaara, yè twɛy ladzyeè, è sen ŋaablaxɔɔ̀ kùngɔ soo rà, è bè fɔ kùngɔ soo rà.»

²⁸ Àwà, Yesù yè geren goomaa rè ci: «Ye nèe goo rèe kaan kɛɛy fiigikuà tsɛ siin: À sààn neè ye e maa yè tsɔɔ gbaa nìi bwèy, ye y'à tɔ̀ɔ tɔ̀ bwèy, ci kpaan tsyɛnbeò.

²⁹ Tɔ̀ soo tsuru, e ye na twɛy goo rèè fakɔɔn ja waatsi riì bwèy, ye bà à tɔ̀, ci Adamà dziàn nà waatsia sa tsyɛnbeò, à ni dɔ̀nmàdzii reè rà nòn.

³⁰ Sààben na, mun nì ci e ra, nèe waatsi ree mòdzian sapɛ fa san dò fyeu, twɛy goo rèè sapɛ mà bà faɔ̀ waa.

³¹ Ŋaablaxɔɔ̀ ko dzɔ̀nxɔɔ̀ sa nà dɔ̀n bo, ŋà mun naa gooma reè, twɛy fa dɔ̀n bo fyeu.

³² Àwà, nìi y'à jisee ko à waatsia, mòò pɛn na à tɔ̀. Jìrànxɔ rɔ̀n mɛ̀rɛ̀kɛ rèè na à tɔ̀ ɔ, Ŋaablà Dzin Kpir'la tsu to na à tɔ̀, fɔ Fà Ŋaablà soo pe.

³³ Tà doùn, ye e yɛrɛ kaàwɔ, ye to tsùù e jaa ra, kàtsu à waatsi riì soo goo, ye na tɔ̀ tɔ̀ waa.

³⁴ À ni a ci nèe kpir'lee raa goò kaatsi: à ci e ye bè jìì rà, è re gbàà goo rèè kùntsììbe sin to e re jòn nèè rà, è faagoo farama sìn è soo soo sapɛ ra. Dziɛ̀ kplatsuubaà, è dzin to tɔ̀ ra, ci è to tsùù e jaa ra.

³⁵ Tɔ̀ soo tsuru, e sa yeè to tsùù e jaa ra, kàtsu gbàtsià nà nà waatsi riì bwèy, ye na tɔ̀ tɔ̀ waa. À nà nà ɲɛ̀rɛɛ̀rà rìì ò, à wɔ̀taama nì ò, à tsɛ̀kèn ben bwey rìì ò, à to gbishɛɛ̀mà nì ò, ye na tɔ waa.

³⁶ Ye to tsùù e jaa ra, à mà nà bàràma e ɲan, à y'à jà ye cìiŋnà waa.

³⁷ Mun nìi dèe ye ra, mun tɔ̀ rii dèe dzyee rèè sapɛ ra. Ye to tsùù e jaa ra.»

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan