Bìoball air-loidhne

Kolosika reè 2 - Bible Dzùùngoo Unicode

Polì ci wo sikuan faa nìì reè kamà, ko à fa kuàn

¹ Àwà mun sào ni y'a tɔ̀, mun ni sikun brisi rìi rà ye kamà, ye ko Lawodiseka reè, ko nìì reè sapɛ jaa na ɲɛn mun jaakɔrɔɔ̀n mà ŋe waa.

² Mun tɔ̀ faa, gè riì ni à to è vunun yè cin, è shìuma yè to e si ra kɛ̀nbààbee doùn, tà ko yè dzi akiritsifabe brisi dziitsyɛunma tàrà, yè Ŋaablà re gòndoo tɔ̀, nìi Kirisà,

³ akiriblabeè ko twɛ̀ɛ nàfor'la sapɛ mɛnɛn tsùuŋnà tɔ̀ niì ɲàn.

⁴ Mun tɔ̀ dèe gè riì ni à to mòò pɛn mà dzi ye sàn fìrì ko dzugooma dziù ì ka waa.

⁵ Àwà mun kɛ̀nsɛɛn ma ba ni ye ka mɔn gɔɔ̀n kàjaa tsɛ, akir'là ɲàn, mun ni ye ka. Mun taama to dzi, m'a jà ci goò sapɛ beù'n kuru wù ye ko e si fi, ye sàn to gbaɔn ɲɛynaà doùn, Kirisà ɲàn.

Polì ci jaamabe dziitsyɛunmaà tàr'la Kirisà rìì ɲàn

⁶ Tà doùn, a ci ye yè e tsiiŋ Tsìfa Yesù Kirisà rà nìi tsuru, ye jìì à yè e to à ɲan.

⁷ E jiɛ̀ gbaunma yè bà ni à ɲan, e re jaamabee gbàkur'la yè bà fuɔ̀ à tsɛ. E san gbaunma yè to ɲɛynaà ɲàn a ci à kàraun e ra nìi tsuru, ye baraka giri sìn Ŋaablà ra.

⁸ Ye e yɛrɛ kaàwɔ, mòò pɛn mà nà e kun dziɲaan akiri goòmà rèè myɛ̀ɛ̀n ka waa, yè e san fìrì gooma ì ka sàn gbanma na ni nìì reè rà waa, yè bà ni mòdzian rè làndà goo reè ko dziɲaan goo rèè tsɛ, nìi ko Kirisà raa goò na ni e si kpà waa.

⁹ È ɲɛn à tsɛ, Ŋaablà re ŋaablabee dziitsyɛunmaà sapɛ ni wò raa gɔɔ̀n rìì ɲàn.

¹⁰ Ye dziitsyɛunma ni à ɲan, wò riì kùntsii rèè ko fààntsi rèè sapɛ kuntsiɛ̀.

¹¹ Wò rii ɲàn sa, ye shɛun, ŋà nìi na mòdzin si ka shimaangoo fauma waa. À Kirisà rè shimaangoo rìì, nìi yɛ, è ye gɔn nɔ̀n gooɲaan bo ye ɲan.

¹² È ɲɛn jaara foo tsɛ, ye fun wɔu ko à ka, ye to yè sèè kpunan ko à ka, ye yè bo saàn ɲàn. Tɔ fau kàtsu ye ɲɛun Ŋaablà re dzibaabee rà, à tɔ̀ niì ka à kpunan bou saàn ɲàn.

¹³ Àwà, ye nìì reè na saɔn è ɲɛn ye re fìrìgoo rèè ko ye re shimaangoo fabɛybeè tsɛ, à ye sèè bàu jaama ko e ka. À mùn ne fìrìgoo rèè sapɛ mɛɛy bou mùn mà.

¹⁴ Sɛbɛn niì na faɔ̀ mùn kamà è bà mùn jààkia è kòrò à doùn sàrìya reè ka, à tɔ̀ tsùsa bou mɔn, à y'à gban gɔɔ̀ rà, è mɛɛy.

¹⁵ À tsitsiɛ̀ kùntsii rèè ko fààntsi rèè sa bou e raa kùntsììbe reè ko fààn reè ɲàn, à yè è bà jirangoo ge jàmaà rè, à yè e re dzi tar'la kpàdè è tsɛ.

¹⁶ È ɲɛn tɔ̀ tsɛ, e maà à to mòò pɛn yè e jaàki ɲwɛyn goo tàmafa mììngè goo ra. E to mà à to mòò pɛn yè e jaàki jaaravi goo ì rà, kuu dzin ye goo tàmafa ɲànwɔ̀ jisee ì goo ra waa.

¹⁷ Tɔ̀ sapɛ na goo nànàma rèè ɲɛɛ̀n nì. Ŋà à taki takià, tɔ Kirisà rìì.

¹⁸ E maà à to mòò pɛn yè e bo e re sàrà tàr'làmaà tsɛ, ci wò majàaŋnà, tàmafa ci wo mɛ̀rɛ̀kɛ rèè rìì jàa wò yeè è blàbe waa. Nìì reè ni tɔ̀ tsɛ, yɛ̀rɛ̀blàbe ni è ɲan, è kɛ̀sɛmàà yè bà adamàdzin mòdzin kɛsɛmà.

¹⁹ Kirisà, tɔ̀ niì kùngɔɔ̀, è na e shiɔ̀ tɔ̀ ra waa. Tɔ̀ to y'à tàrà, wò rii gɔɔ̀n sapɛ kuɔn e si ra soo xɔtsuma rèè ko fɛ̀r'lèè ka, è bà à dziira gaa è bɔɔ Ŋaablà re bɔɔ ɲan.

²⁰ Ye saunmaà shɔ̀ùn ko Kirisà ka ye sàn yè bo dziɲaan goo rèè ɲàn, fèe bèe à to ye yè e san ji sàrìya ì ɲàn kɔn, a ci ye re jaamabee ni dziɲaan nì suun ?

²¹ Twɛy sàrìya reè na goo kpɛrɛ fɔ: «Maà nèe sen, maà nèe nèè, a to mà a dzyɛn nèe ra.»

²² Tɔ̀ sapɛ gè bar'lama ì, è ka faagoò faumaà shɔ̀ùn. È adamàdzin mòdzin dzugooma tsuuŋma ì nì ko è re kàran ì.

²³ A kpɛyn nà dzin ci akiriblabe ni à goo rèè ɲàn, nìi yɛ e tɔ̀ blàbè kaatsià fa, a yɛrɛ majàà, e byɛnbe ɲɛn a gɔɔ̀n tsɛ. Ŋà, nàfa na ni tɔ̀ pɛn ɲan e gɔɔ̀n sàɔ fa boshɔ̀ùn.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan