Bìoball air-loidhne

Kolosika reè 1 - Bible Dzùùngoo Unicode

Sɛbɛɛn kaɔ nìì reè rè, ko dzwɛɛ̀

¹ Mun Polì, Yesù Kirisà rè kɛɛradzian Ŋaablà saɔ baraka rɔ̀n, ko neema kpiri Tsìmotè,

² nèe ɲe re sɛbɛn, è ka Ŋaablà re mòò rèè rè Kolosì wɔ̀ rɔ̀n, neema niì reè ɲɛɔ̀n Kirisà rà. Arì she, mùn Fà Ŋaablà ɲanwùɔ, ko jaanciàn, mùn Fà Ŋaablà yeè twɛy sìn e ra !

Polì baraka rìi sìun Ŋaablà ra, è ɲɛn Kùnàgoo Dziɔ̀ tsɛ

³ Ɲe re Ŋaabla mafyɛyn nèè doùn ye re, kudɛyn ɲe baraka sìan Ŋaablà ra, mùn Tsìfa Yesù Kirisà Fàà.

⁴ È ɲɛn à tsɛ, ye ɲɛɔ̀n Yesù Kirisà rà ɲɛun'n kur'liì rà, ko ye Ŋaablà re mòò rèè sapɛ kɛniɔ̀n kɛ̀nìùn'n kur'liì rà, ɲe torò jiu tɔ̀ ɲan.

⁵ Ye si xɔ nìi tsɛ, tɔ̀ yeè bà màrà tsùuŋnà ye re jìrànxɔɔ̀ doùn, tɔ̀ rii y'à saabu. Ye si to xɔ tɔ̀ niì tsɛ, ye tɔ̀ gooma myɛn dɔ̀un bɔrɔɔ sààbeen goomaa nì baraka ɲan, nìi Kùnàgoo Dziɔ̀.

⁶ Tɔ̀ Kùnàgoo Dziɔ̀ dziu ye sa tsɛ a ci à dziu dziɲaan min niì sapɛ nìi tsuru è bà dzin bèe jɔun. À tɔ̀ soo sa faa ye fi, fɔ jisee riì ye Ŋaablà ɲanwùɔ gooma myɛun, y'a tɔ̀ sààben na.

⁷ Epafarasì, ɲe faagoofasi kɛ̀niunmaà tɔ̀ rii tɔ̀ kàr'nà sìun ye ra. À Kirisà rè faagoofadzin vusootsi, è bà faagoò faa ye re.

⁸ Ŋaablà re Dzia kɛ̀nbààbe riì ka faagoò faa ye ɲan, à tɔ̀ jaa dèu ɲe ra.

⁹ È ɲɛn tɔ̀ tsɛ, fɔ jisee riì ɲe twɛy kùnàgoo reè myɛ̀un, kudɛyn ɲe ni Ŋaabla mafyɛɛ̀n nà ye re. Ɲe y'à gaa Ŋaablà re, è ye ɲantsyɛn e saɔ twɛ̀ɛ rà, è kòrò à re Dzia rè akiriblabeè sapɛ, ko à re akiridzibeè sapɛ ka.

¹⁰ Tà tsuru, e jiì saàn yè bà ni byɛn Tsìfaà sàɔ mà, e goo yè dzibe à ra kàjaa sapɛ tsɛ. E faadzii wuɔ yè dzin ì wɔ, ye bɔɔ bè jɔun Ŋaablà tɔɔ̀ ɲàn.

¹¹ È fààn wɔ ye ɲan kàjaa sapɛ tsɛ e re dzibaabee nɔɔrɔmaa baraka rɔ̀n, ye sàn yè bà ni gban, ye mɔ̀nɲɔunma yè to dzuunbwey rèè doùn. Taamadzibe ka,

¹² ye baraka sin Fà Ŋaablà ra, tɔ̀ niì y'à tou, ye dzi e nin jà à re mòò rèè shɛɛ̀n ɲàn, vyevyee rɔ̀n.

¹³ À mùn tsi bou tsitsiɛ̀ fàan suun, è bè mùn ka e Dzin Kpiri kɛniunmaà rè màsàbee gàne rɔ̀n,

¹⁴ Dzin Kpir'liì baraka ɲan, à mùn kùngɔ màbou, è mùn ne gooɲaantsiɛ mɛɛy bo mùn vu ra.

Polì nìi dèu Kirisà ko e re faagoò tsɛ

¹⁵ Ŋaablà riì na jaà waa, à tɔ̀ ɲɛɛ̀n nì, è bà gè ɲɛunma rèè sapɛ kungɔ̀ jɔnaa.

¹⁶ È ɲɛn à tsɛ, gè sapɛ ɲɛun wò rii baraka ɲan. Jìrànxɔ̀ dòùn gee sapɛ, ko dzɔ̀nxɔ̀ tsɛ̀ gee sapɛ. Gè nìì reè jàa, ko nìì reè na jaà waa. Màsàbe reè, ko tsìfàbe reè. Kùntsììbe reè, ko fààntsìbe reè. Gè sapɛ ɲɛun wò rii baraka ɲan, à sapɛ to ɲɛun wò rii laa.

¹⁷ À ni gè sapɛ jɔun, gè sapɛ to ni tsuù wò rii baraka ɲan.

¹⁸ Wò rii gɔɔ̀n kùngɔɔ̀, nìi ɲɛynamoo kur'là. Wò rii dzunjɔɔn, è bà fùn nèè kùngɔ̀ jɔna kpunaunmaà, gè riì ni à to è bà ni gè sapɛ jɔun.

¹⁹ È ɲɛn à tsɛ à dzibeu Ŋaablà ra, wò re ŋaablabee dziitsyɛunmaà sapɛ yeè e tsuùma bo à ɲan.

²⁰ À baraka ɲan, è gè sapɛ ko e fia lamɔnɔ̀n. È jaancin dɔ̀n e ko gè sapɛ fi jìrànxɔɔ̀ doùn, ko dzɔ̀nxɔɔ̀ tsɛ, à tsìɛn kounmaà baraka ɲan, gbaàn gɔɔ̀ rà.

²¹ Àwà dan, è kòrò ye kɛ̀sɛmàà ko ye faadzii ɲaan neè ka, ye na tɔnɔn ì Ŋaablà kajaa tsɛ, ye yè bà na à ɲan ì.

²² Ŋà dòònuùn, è ɲɛn à Dzin kpir'la saàn tsɛ gɔɔ̀n ɲàn, à ye ko e fia lamɔnɔun, ye yè bà ni kpadè à jaa dzuun mòdzin ì, nìì reè fɛnɛɔ̀, fyɛ̀ na ni è ra waa, jààma to na ni è ra waa.

²³ Ŋà, fɔ ye sàn gbaunma yè to ɲɛynaà tsɛ, goo sɔn pɛn mà dzi ye bo e shɔùn waa. Ye si to xɔ nìi tsɛ Kùnàgoo Dziɔ̀ doùn, e maà e bon wɔ tɔ̀ ra waa, e tɔ̀ Kùnàgoo Dziù rìi goomaa myɛ̀un, è bà dèu gè ɲɛunmaà sapɛ ra dziɲantsiɛ min niì sapɛ. Mun Polì, min bà bàu à faagoofabaa.

Pol'lè faagoò byɛnbee

²⁴ Àwà dòònuùn, min taama dzibee n ne byɛnbe reè doùn, ye kamà. Nìi to Kirisà fɔɔn e re byɛnbe reè doùn, mun tɔ̀ dzii tsyɛɛn n gɔɔ̀n ɲàn. Mun tɔ̀ faa à gɔɔ̀n kamà, tɔ̀ niì ɲɛynamoo kur'là.

²⁵ Mun bàu tɔ̀ ɲɛynamoo kur'là rìì lè faagoofabaa, è kòrò Ŋaabla faagoo rìi kɛ̀ɛ̀yfaɔ̀ mun mà ye kàjaa tsɛ, nìi yɛ min Ŋaablà re goomaa dè, m'a dzii tsyɛn.

²⁶ Tɔ gòndo, nìi na mɛnɛn tsùuŋnà fɔ waatsi gbaan waatsia sapɛ modzian mà, è bà kpàdèu dòònuùn Ŋaablà re mòò rèè rà.

²⁷ Ŋaablà sao ni twɛy y'à tɔ̀, tɔ̀ gòndoo nɔɔrɔɔ̀ nàfor'la nìi boò kun kpɛrɛ mòdzin neè fi, nìi yɛ Kirisà yè bà ni ye ɲan, tɔ goo nìi ye si xɔbee ci ye nà nɔɔrɔ nàkɔɔn tàrà.

²⁸ Ɲe Kirisà rìi gooma deè, ɲe yè mòdzian sapɛ lasɔ̀nmin, ɲe yè è kàràn akiriblabeè sapɛ ka, à wò rii. Ɲe tɔ̀ faa gè riì ni à to, ɲe yè mòdzian sapɛ dziitsyɛunma kpàdè Kirisà ɲàn.

²⁹ Tɔ̀ rii kamà, min bà n yɛrɛ siàn faagoò byɛnbee rà, min sikuan fa è kòrò à re faagoò ka mun ɲan, tɔ̀ niì faa dzibaabe ka.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan