Bìoball air-loidhne

Dzyèèsìbee mòdzin neè 13 - Bible Dzùùngoo Unicode

Mìn goo jaawuen fa e re jaamabee doùn

¹ Àwà, e re neemabee doùn, y'a to kɛ̀nbààbee yè bà ni e ko e si fi kudɛyn.

² Tɔnɔn ye na jàà e re, y'a kuun'n kuru wuu fa. E maà e taa myɛn jà tɔ̀ re waa, kàtsu, mɛ̀rɛ̀kɛ ì jàà jàu swey rè, yè è kuun'n kuru wube, è na à tɔ̀, ci à mɛ̀rɛ̀kɛ ì waa.

³ Ye e taa to kàsòdzin neè rè, a ci ye sa yeè è sɔn ni. Nìì reè to kuun'n kuru ɲaan faɔ̀, ye e taa to twɛy sa re, kàtsu, tɔ̀ gɔn soo rìì ni ye sa re, à dzia nìi sa tarà.

⁴ Mòdzian sapɛ yeè blà wɔ fur'la ɲàn. Kpir'la ko taàn pɛn na wù yè ɲànmɔ̀ɔ̀be fa waa, kàtsu, Ŋaabla nà kitsia kunun kɛ̀kɛ̀ɛ̀yra reè ko ɲànmɔ̀ɔ̀bè fa reè tsɛ.

⁵ E maà ɲɛɛn kɛ̀n, fɔ tɔ̀ yeè bè bà e re jaamabee kùngɔ waa. Nìi ni e suun, y'a to tɔ̀ yeè e jaa cɛn, kàtsu, Ŋaablà yɛr'la dziun ci: «Mun fa n si bo jà wo dzuun kuraa. Fyeu, n fa n bon wɔ jà wo ra waa.»

⁶ Tà doùn, ɲe akiri tsùuŋma dzia à dè nèe tsuru ci: «Mun Dzwɛ̀mabaà rìì Tsìfa Ŋaablà, mun fa shi gèsɔn pɛn jɔun waa. Adamàdzin mòdzin nà dzi fee rìì fa mun na.»

Ye e toro wɔ e jɔundzin neè rè

⁷ E jɔundzin bɔrɔɔ niì reè yè è toro kɔ̀ dɔ̀un Ŋaablà re goomaa nà, ye e taa to twɛy rè. È re jaamabee lataun nìi tsuru, ye tɔ̀ siin, e sa yeè ɲɛn Ŋaablà ra è raà tsuru.

⁸ Ŋaablà Jaara Moo Yesù na ni nìi tsuru kuru, à ni tɔ̀ rii tsuru she, à to nà to tsùù tɔ̀ rii tsuru kudɛyn.

⁹ E maà à to mòò pɛn yè e san fìrì ko kàràn kpɛrɛ ì ka, e na nìi tɔ̀ waa. Àwà, à wùɔ rìì yɛ, Ŋaablà ɲanwùɔ yè fààn wɔ mùn ɲan, sani ɲwɛyn goo shi yeè tɔ̀ fa. Nìì reè gbaɔn ɲwɛyn goo shià raa goo rèè kpɛyn, tɔ̀ na gèsɔn pɛn wùbee twɛy mà waa.

¹⁰ Saakagoojaabobaa nìì reè faagoò faa Ŋaablà re bùù gba vyamaa doùn, saakaboma ni ɲe re, nìi ɲwɛɛ̀n na dàaŋnà twɛy mà waa.

¹¹ Àwà, dzwɛkà nìì reè vua, yè bà saaka, gooɲaantsiɛ mɛɛ̀ raa, Saaka Jɔundzin blaa dɔ̀ɔn twɛy tsìɛn ka bùù gba vyamaa gàne fɛnɛ fɛnɛɛ doùn. Shuà, tɔ̀ yeè bè dzu kpaan da rɔ̀n, bùɔ̀ bònè.

¹² Tɔ̀ kamà, Yesù sa yeè bè byɛn è san wɔ̀ɔ̀ bònè, sànko, à yɛ̀r'la tsìɛn baraka rɔ̀n mòdzian yè fɛnɛbe.

¹³ Tà doùn, mùn sa yeè bo b'a ra mɔn wɔ̀ɔ̀ bònè, seey rìi y'à tàrau, tɔ̀ yeè mùn sa tarà.

¹⁴ Mìin dzɔ̀nxɔɔ̀ tsɛ, wɔ̀ na ni ɲe re, nìi nà bà ni tsuù kudɛyn waa. Ɲe wɔ̀ nìi gaa, tɔ̀ rii yɛ, gbey raa wɔ̀ nàkɔɔn.

¹⁵ Yesù baraka rɔ̀n, mùn yeè tsoo dzi ɲɛɛn Ŋaablà tsɛ kudɛyn, tɔ̀ yeè bà mùn ne saaka bokɔɔn à re. Tɔ̀ dzuɔn, Ŋaablà tsoò yè bà ni mùn dzu waatsi sapɛ.

¹⁶ E maà e taa myɛn goowuu faa rè waa, ye bà e si dzwɛ̀maa, kàtsu, tɔ̀ tsuru saaka rèè rìì dzi Ŋaablà ra.

¹⁷ Ye e toro wɔ e jɔundzin neè rè, ye e majàà è re, kàtsu, ye rìì ye kààwɔɔ̀ kudɛyn. È taa n'a mà, ci sii sɔn see, ye nà e re faagoò kpunan bo Ŋaablà re. Ye ye tɔ̀ fa, tɔ̀ rii nà à to, yè e re faagoò fa taamadzibe ka, à fa bà taamaŋununbe ka waa. Tà boshɔ̀ùn, è fa taamaŋununbe ka, ye re mɛɛy rìì ni tɔ̀ ɲan.

Tswɛ̀ɛ

¹⁸ Ye Ŋaablà mafyɛ̀ɛn mùn ne, kàtsu, ɲe ɲɛɔ̀n à ra, ci ɲe na jàaŋnà e yɛr'la kàjaa pɛn tsɛ waa. Ɲe kpɛ̀yn nìi gaa, tɔ̀ rii yɛ, goo o goo, ɲe jìì saàn yè bà tereòn.

¹⁹ M'a gaa sa, ye Ŋaablà mafyɛ̀n n ne, sànko, min bà ni n kpɛyn tabe seè e re.

²⁰ Ŋaablà, tɔ̀ niì jaanciàn sìnbaà, tɔ mùn Tsìfa Yesù kpunan bou saàn ɲàn, è bo fùn nèè fi. À y'à bàu e re sàà rèè kplatsuubaa blà, à tsìɛn kounmaà baraka rɔ̀n, è bà saaka tɔ̀ niì dzyèèsìbe dobɛy dɔun Ŋaablà ko mòdzin neè fi.

²¹ Ŋaa yè fààn sin mùn na, mìn dzi wùɔ fa, fau'n kur'la sapɛ ra, m'à sàɔ bo e shi tsɛ. Arì she, nìi dzi Ŋaablà ra, à yè tɔ̀ fa mùn ɲan e Jaara Moo Yesù baraka rɔ̀n, blàbee tɔ̀ niì raa, waatsi sen ɲɛn waatsi tsɛ. Àmiinà !

²² N neema ì, mun yɛ nèe gooma niì reè sɛbɛn kaɔ ye re, m'a ka ye màxɔ̀n, m'a gaa e re, ye e toro wɔ à re, y'a ku e ɲan. À to yɛ̀rɛ̀ na baɔ̀ gooma gbaan tsu waa.

²³ Àyìwà, ye bà à tɔ̀, ci è mùn neema kpiri Tsìmotè bàjiu. À ye dzi mun tsɛ tabe, à ko mun nà bè ye kpà, mìn bè ye siin.

²⁴ Ye e jɔundzin neè sapɛ tswa. Nìì reè sapɛ to Ŋaablà raa, ye twɛy sapɛ tswa. Itali jamaan kàràndzin neè yè e tswau.

²⁵ Arì she, Ŋaablà ɲanwùɔ yè bà ni e sapɛ tsɛ!

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan