Bìoball air-loidhne

Dzyèèsìbee mòdzin neè 10 - Bible Dzùùngoo Unicode

Ŋaablà Jaara Modzìàn nì saaka dziitsyɛunmaà

¹ Tà doùn, goo dziù nànàma nìì reè màshua, Musà rè sàrìyaa na twɛy goo rèè taki takìà waa, à y'à ɲɛɛ̀n bàsɔùn nì. Sàrìyaa doùn, jii sapɛ, saaka nìì reè boò kudɛyn, twɛy rìì boò kudɛyn. Nìì reè ni tɔ̀ goò fyɛ̀ùn, yè bà tɔ̀ ka e kpɛr'la Ŋaablà ra, tɔ̀ fakɔɔn ko e raà sa, tɔ̀ na dzia à to yè bà mòdzin dziitsyɛunma waa.

² È Ŋaablà blabee tɔ̀ blàbèù'n kur'liì rà, tɔ̀ yeè bà na dzia è bà mòdzin dziitsyɛunma, kùn naà ni, yè sèe twɛy saaka rèè tsɛ kudɛyn dɛ. Tɔ̀ kùn naà ni dɛ, kàtsu, è fɛnɛbeumaà shɔ̀ùn jaa soo, è taa fa ni toò gooɲaantsii re e vu ra dɛ.

^3-4 Fyeu, nìì tor'la ì, ko bàkɔrɔ ì tsììn na dzia gooɲaantsiɛ bo mòò vu ra waa. Jii sapɛ, twɛy saaka rèè è taa rii toò è vu ra gooɲaantsiɛ rè.

⁵ Tɔ̀ kamà, Ŋaablà Jaara Modzìàn ci e ye nà dziɲaan doùn, à dziun Ŋaablà ra ci: «Wo na gaa mòò rè dzwɛka saaka ra, wo to na gaa mòò rè kwɛ̀yge ra, ŋà, wo mun ɲɛun gɔn yè bà ni mun ne.

⁶ Dzwɛkà nìì reè dzu kpaan saaka saakabomaà tsɛ ko saaka dzyee niì reè boò, gooɲaantsiɛ yè bà ni mɛɛy, twɛy pɛn na dzibe wo ra waa.

⁷ Tà doùn, min dzin ci: "Mun siin nèe Ŋaablà, mun nàa, min nà wo sàɔ fa, a ci à sɛbɛɔ̀n mun ne goò ɲàn kìtaabuà doùn nìi tsuru."»

⁸ Àwà, Ŋaablà Jaara Modzìàn dziun ŋe ci: «Wo na gaa mòò rè dzwɛka saaka ra, wo to na gaa mòò rè kwɛ̀yge ra. Dzwɛkà nìì reè dzu kpaan saaka saakabomaà tsɛ, ko saaka dzyee niì reè boò, gooɲaantsiɛ yè bà ni mɛɛy, twɛy pɛn na dzibe wo ra waa.» Àwà, à tɔ̀ dèu, tà to y'à tàrà twɛy saaka rèè boò, a ci sàrìyaa ci è fa nìi tsuru.

⁹ À to yè dzin kɔn ci: «Mun siin nèe Ŋaablà, mun nàa min nà wo sàɔ fa.» Tɔ̀ goomaa y'à kpàdèe, ci à saaka bɔrɔɔ reè mɛrɔun, è yeu ka è ɲancinan.

¹⁰ È bà à kpàdèe sa, ci Ŋaablà Jaara Moo Yesù Ŋaablà saɔ fau. È gɔɔ̀n siun saaka jaa soo pe, à y'à ka mùn fòò fyɛ bo e re gooɲaantsiɛ ɲàn.

¹¹ Màan ji o ji seroun, saakagoojaabobaà soo soo sapɛ ni e san tsɛ Ŋaablà re faagoò rà. Kudɛyn, è saaka soo niì reè boò, è twɛy rìì boò, twɛy pɛn to na dzia gooɲaantsiɛ bo mòò vu ra waa.

¹² Ŋà, Ŋaablà Jaa ra Moò, tɔ saaka jaa soo pe rii bou, nìi ni tsuù kudɛyn, è bà ni mòdzian rè gooɲaantsiɛ bo è vu ra. Tà shɔ̀ùn, è tsuù Ŋaablà sirama si jaa rè.

¹³ À ni mɔn, è bà à shùa, fɔ Ŋaablà yeè nà à ɲan rèè sapɛ wɔ à sàn dzuun.

¹⁴ À saaka jaa soo pe riì bou, tà baraka rɔ̀n, à nìì reè fòò fyɛ bou e re gooɲaantsiɛ ɲàn, yè bà Ŋaablà raa, à twɛy bàu mòdzin dziitsyɛunma kudɛyn.

¹⁵ Ŋaablà re Dzi Fɛnɛɛ sa tɔ̀ soo rìì dè kpàdeò mùn na, nìi doùn, à dziun ŋe ci:

¹⁶ «Mun Dzyèèsìbee Ŋaabla nà dzyèèsìbe riì wɔ è ka twɛy jisee reè shɔ̀ùn, tɔ̀ rii siin: Mun nà n ne sàrìya reè ji è duùn, mun y'à ɲììri è akir'là ɲàn.»

¹⁷ È bà ci kɔn ci: «Mun fa n taa to è re gooɲaantsii reè ko è re terenbɛygoo reè rè dɛ fyeu.»

¹⁸ Àwà, vu ra gooɲaantsiɛ ye mɛɛy nòn, saaka kpɛrɛ bo kùn na ni, ci è bo a vu ra dɛ. Mùn si xɔ nìi tsɛ, mùn mà bo tɔ̀ tsɛ waa.

¹⁹ Tà doùn, n neema ì, Yesù tsìɛn kounmaà saaka, tɔ̀ baraka rɔ̀n, mùn ko akiritsuu dzia dɔ̀n gàne fɛnɛ fɛnɛɛ doùn.

²⁰ Àwà, à bùù gba vyamaa shiɲaanfi kunun vyaa dzii saun, è shi ye bo mùn ne, nìi shi jaama. È yɛr'la sìn nìi fau saaka, tɔ̀ rii bàu teèn shiɲaanfi kunun vyaa dzii saunmaà.

²¹ Wò rii ɲe re Saaka Jɔundzin, è bà tsùuŋnà Ŋaablà re gbàà goo rèè sapɛ kuùn.

²² Tà sapɛ kamà, y'a to mùn yeè e kpɛrɛ̀ Ŋaablà ra ko duunfyɛ ka, mìn bà ɲɛɔ̀n à ra ɲɛun'n kur'la sapɛ ra, duungoo ɲaan sapɛ yeè fòò bo mùn duun, mùn màà yè fòò yu fɛnɛuma ka.

²³ Mùn ci mùn si xɔ nìi tsɛ, mùn mà bo tɔ̀ tsɛ waa, kàtsu, Ŋaablà riì làyir'là seòn mùn ne, tɔ vusootsi.

²⁴ Y'a to mùn yeè e taa to e si re, mìn si màxɔ̀n kɛ̀nbààbee ko goowuu faa rà.

²⁵ Mùn si ladzyee niì reè faa, n mà e raa bo tɔ̀ ɲan, a ci swey dɛ̀rɔɔ̀n y'à faa nìi tsuru waa. Mìn nìi fa, tɔ̀ rii yɛ, mìn si màxɔ̀n, kàtsu, ye jaà n'a na, ci Ŋaablà Jaara Modzìàn nà jisee yè e kpɛrɛɔ̀.

²⁶ Tà doùn, sààbeen tɔ̀umaà shɔ̀ùn, mìn ba e tsoò mìn gooɲaan faa kɔn, saaka pɛn na ni, nìi dzia gooɲaantsiɛ bo mùn vu ra dɛ.

²⁷ Nìi too, tɔ̀ rii yɛ, a shiuma brìsi yè Ŋaablà re kitsia màshu tsuù, sà brìsi to nà Ŋaablà ɲan rèè bà e fɔnɔn.

²⁸ Mòò ye kɛɛra Musà rè sàrìyaa ɲanshɛn, shɛɛrɛ fii tàmafa zhììgi yeè jà twɛy y'à kpàdè ci à sààben, tɔ̀ tsìfa vua, màtsuru na ni à ɲan waa.

²⁹ Àwà, tɔ̀ ye ba faa tɔ̀ tsuru, ye re o, mòò o moò Ŋaablà Dzin Kpir'la kɔɔ̀n, byɛnbe niì nà ɲɛn tɔ̀ tsìfa tsɛ, tɔ̀ fa xɔbe è geren Musà rè sàrìyaa ɲanshɛnbaà raà tsɛ fyeu ɔ ? À nà xɔbe è geren à tsɛ, kàtsu Ŋaabla tsììn niì ka dzyèèsìbee wɔu mòdzian ka, tɔ̀ tsììn niì y'à tsìfa fɛnɛbeu, è bà Ŋaablà raa, à tɔ̀ bàu gè nàfà bɛy. Ŋaablà ɲan Dzi riì to y'à toò mìn Ŋaablà ɲanwùɔ tàrà, à tɔ̀ sa ɲɛun.

³⁰ Mòò riì dziun nèe tsuru ci: «Wɛyn boo mun nì naa. Mun nì nà tsìì sar'la fa», mùn tɔ̀ tsìfa tɔ̀. È bà ci kɔn: «Mun Tsìfaà, mun nà kitsia kùnùn n ne mòò rèè tsɛ.»

³¹ Ŋaablà jaamaa y'à kun, tɔ̀ tsuru goo xɔù na ni.

³² Àwà, ye e taa to e re goo rèè dzii kun waatsia rìì lè. Ye Ŋaablà re vyevyeè tàrau, à na waatsi bo waa byɛnbe xɔ xɔɔ̀ yè ye dzii kun, ŋà, y'a tsiu e ma.

³³ Waatsi reè swey ɲàn, è na ye ɲɛ̀ɛn, yè ye byɛn cɛyn mòdzian jaa ra. Waatsi reè swey ɲàn kɔn, nìì reè na ni twɛy goo rèè gè doùn, à bàu ni ye sa ma, ye yè è dzun kun tà doùn.

³⁴ Ɔ̀ɔn, kàsòdzin neè raa byɛnbee, ye tɔ̀ fau twɛy ka. Nìi to bàu ye suun ge reè tsiumaà, ye taama dzibeu tɔ̀ ra, kàtsu y'a tɔ̀ ci ye gè tàraɔ̀ nìì tsuru na ni waa, dò to na ni à mà waa.

³⁵ Ye e si xɔbe niì faɔ̀ Ŋaablà tsɛ, e maà bo tɔ̀ tsɛ waa, kàtsu sàrà blà rii ni tɔ̀ doùn.

³⁶ E ye dzin ci ye Ŋaablà saɔ fa, è bà ni e re làyiri seunmaà bo e shi tsɛ, à wù y'a tsi e ma.

³⁷ Àwà, à sɛbɛɔ̀n Ŋaablà re Goomaa Kìtaabuà doùn ci: «À tou dɛ̀ɛnin, waatsi kiɲaanin bàsɔùn, mòò riì wù è nà, tɔ nà nà. À fa cin dɛ.»

³⁸ Ŋaablà ci: «Mòò riì tereòn mun jaa ra, tɔ nà jaamabee fa ɲɛynaà baraka ɲan. Ŋà, è seè e dzun ne, à tsìfa na dzi mun na dɛ.»

³⁹ Nìi ɲe, nìi reè sèe e dzun ne, yè bè fìrì dɔn bè, ɲe na twɛy sɔn waa. Ŋà, nìì reè ɲɛɔ̀n Ŋaablà ra, yè bà ni tsi, ɲe ni twɛy rìì ka.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan