Goo kpàdèuma rèè 9 - Bible Dzùùngoo Unicode

¹ Àyìwà, mɛ̀rɛ̀kɛɛ̀ nùnaa yè vur'la fyɛ tɔ̀un. M'a jà, swɛyn sɔn bou jìrànxɔ rɔ̀n, tɔ̀ yeè nà mɛɛy dzɔn nɔ̀n. Kɔ̀ɔ̀ tsun gbloùntòò nèèdzian yè wɔ tɔ̀ suun.

² È kɔ̀ɔ̀ rèe dzii san. À y'à saun min niì, sàtsuru brisi sɔn yeè tèyn bo a ci sà blà satsuru. Sàtsur'lee yè bwèè ko fyɛɛn sa tsi bin.

³ Dzwɛ ì yè bo tɔ̀ sàtsur'la ɲàn, yè jee ji dzɔ̀nxɔɔ̀ tsɛ. Dzi yeè sìn twɛy dzwɛ rèè rà a ci dzɔ̀nxɔɔ̀ tsɛ ɲaaloun neè ɲàn raa dzia.

⁴ È dè è ra ci è mà e dzyɛn vuàn nà, è mà e dzyɛn gèku ra, è mà e dzyɛn gɔ̀ɔ ra, fɔ mòdzin niì reè ni, Ŋaablà re tàànmàshɛɛn na jiɔ̀ è ten na waa.

⁵ Twɛy mòdzin neè vua shi naà siɔ̀n è ra waa, ŋà yè è byɛn ni cɛyn, fɔ kuu nùn. È cin dziikɔɔ ɲìnìnbee ni a ci ɲaaloun ne mòò ciuma.

⁶ Twɛy jisee reè sii sèè, mòdzian nà saàn gaa e si fii ra, ŋà è fa à tàrà waa. È nà à gaa ye yè san, ŋà saàn nà vwɛ̀yn è dan gbànbe è ra.

⁷ Dzwɛ rèe rèè na boo shu ì rè, nìì reè mabyɛɔ̀n kaà kamà. À na ni a ci màsà baanfla sɛnuma ì nì ni è kùùn, è jaakɔrɔɔ̀n yè bà boo mòdzin ì jaakɔrɔun ne.

⁸ È kùngwɛ̀ɛn na ni a ci tàan kùngwɛ̀yn, è ɲin nèè yè bà ni a ci jɛ̀rɛ̀ ɲin ì.

⁹ È ɲìì rèè ni a ci myɛ̀ɛ̀n mɛyɛ ɲɛɔ̀n twɛy tsɛ, è tànman rèè vuà yè bà ni a ci shù giri ì wɔuma kaa faa vwɛ̀ɛ̀ràge ì rà, yè bà vwɛ̀yn beè kaà rà.

¹⁰ È kpla reè ni a ci ɲaaloun kpla ì, à dziɛ̀ ni swɛy swɛy. Dzia ni twɛy kpla reè rìì ɲàn, yè dzi ɲaan fa mòdzian nà fɔ kuu nùn.

¹¹ È re màsaa rìì yɛ kɔ̀ɔ̀ tsun gbloùntòò mɛ̀rɛ̀kɛɛ̀, tɔ̀ tsoo Abadɔ̀n Dzyèèsìbee mòdzin neè rè kungoòmàà ɲàn, è bà Apoliyɔn gɛ̀rɛ̀kì goòmàà ɲàn, nìi dzuɔn baragoofabaà.

¹² Àwà, gooɲaan jɔ̀naà dɔ̀un. Tà shɔ̀ùn, fii kpɛrɛ nàa kɔn.

¹³ Àyìwà, mɛ̀rɛ̀kɛɛ̀ tsùnmɛ̀naa yè vur'la fyɛ. Tɔ̀un min vu sɔn myɛn, tɔ boo saakaboma sɛnumaa bin tsuru nɔ̀nkɔn nààleèn kpàkèrè, tɔ̀ niì ni Ŋaablà jaaterema.

¹⁴ Vur'la ni tɔ̀ mɛ̀rɛ̀kɛ tsùnmɛ̀na niì suun, vu rèe yè dzin tɔ̀ ra ci: «Ba blà riì kir'là Efaratsì, mɛ̀rɛ̀kɛ nààlen nìì reè shiɔ̀ mɔn, twɛy foro.»

¹⁵ Twɛy mɛ̀rɛ̀kɛ nààlen nèè mabyɛ̀n tsuuŋnà jii niì, ko kuu nìi, ko jisee niì, ko waatsi niì kamà, tɔ̀ wɔumaà, twɛy yè foro tɔ̀un, yè bà ni dzɔ̀nxɔɔ̀ mòdzian tara zhiigia tara soo sapɛ vu.

¹⁶ È re kaadzin shutsi rèè dzii dèu, min tɔ̀ myɛ̀n: kaadzin shutsi miriyo caànmoò fii.

¹⁷ Àwà, mun ne jɛ̀ɛ doùn, mun shù rèè ko e tsɛ tèynbaa rèè jàu nìi tsuru, tɔ̀ siin: È ɲìì tsɛ myɛ̀ɛ̀n mɛyɛ reè na xeò a ci sà, yè bà gblama a ci sɛnuma ge kpààma sɔn, yè bà neefama a ci gìrìbi. È re shù rèè kùngɔ rèè ni a ci jɛ̀rɛ̀ kungɔ, sàà ko sàtsur'la ko gìrìbià yè bà boò è dzu.

¹⁸ Tɔ̀ sàà, ko sàtsur'la, ko gìrìbi rìi na boò shù rèè dzu, tɔ̀ gooɲaan zhiigia yè mòdzian tara zhiigia tara soo sapɛ vu.

¹⁹ Shù rèè raa dzia na ni è dzu rɔ̀n nì, ko è kplaa ɲàn. È kpla reè na ni a ci myɛn ì, kùngɔ ì ni è ra, è nìì reè ka ɲaan faa mòdzian nà.

²⁰ Àwà, mòdzin niì reè dzyee tou twɛy gooɲaan neè shɔ̀ùn è na san waa, twɛy na nimisa yè làkere dɔn e re jaamabee doùn, yè sèè bo e yɛr'leè si ka gè lamɔnɔunma rèè kpɛyn waa. È na kwey rèè ko ɲɔ̀n rèè kɔ̀ɔ̀ dzii bà waa. Twɛy ɲɔ̀n nìì reè faɔ̀ sɛn'na, ko warifyɛɛ, ko dànɲaan, ko kpàa, ko gɔɔ̀ ka, è na jɛ̀y faa, è na myɛ̀yn faa è to na dzia jìì, è na twɛy kɔ̀ɔ̀ dzii bà waa.

²¹ Yè bà ni nimisa, yè làkere dɔn e re jaamabee doùn, yè e re mòdzìn vu reè, ko e re tɔ̀ goo reè, ko kɛ̀kɛ̀ɛ̀y goo reè, ko shɔnbe rèè dzii bà, è na tɔ̀ fa waa.