Goo kpàdèuma rèè 4 - Bible Dzùùngoo Unicode

Nìi kpàdèu Yùxanà nà blàbee fakɔɔn tsɛ jìrànxɔ rɔ̀n

¹ Àyìwà, twɛy goo rèè shɔ̀ùn, min goo kpɛrɛ jà kɔn, nìi dzii sɔn, tɔ saɔn jìrànxɔ rɔ̀n. Tɔ̀un, mun vu jɔna niì myɛ̀un a ci vuru fyɛ vu, è bà goomaa mun ka, tɔ̀ yeè dzin ci: «Tèyn na mìin, nìi nà fa nèe shɔ̀ùn, min tɔ̀ kpàdè a ra.»

² Tɔ̀ nɔ̀nkɔɔrɔn, Ŋaablà re Dzia yè dɔ̀n mun ɲan, min màsà gbaaniin sɔn ja jìrànxɔ rɔ̀n, sɔn tsùuŋnà tɔ̀ tsɛ.

³ Nìi na tsùuŋnà, tɔ̀ màà na den deèn a ci sɛnu ma ge swey, nìì reè kir'là ci zhasipè ko sariduwanìn. Sunkuna sɔn yeè bà màsà gbaaniɛn laguruunà, tɔ den deèn a ci sɛnu ma ge sɔn, nìi kir'la ci emerodzì.

⁴ Màsà gbaaniɛn lagur'la ɲàn, màsà gbaaniin moo nààlen kpɛrɛ na ni, mòòbɔɔ mòo nààlen yè bà tsùuŋnà twɛy tsɛ. Mɛ̀yɛ̀ fyɛ na ni twɛy sapɛ ma, màsà baanfla sɛnuma yeè bà kuuŋna è kùùn.

⁵ Ŋaà myɛ̀ɛ̀nkɔɔn, ko gooma vuà, ko ŋaà kpìnìn vuà na boò màsà gbaaniɛn nà, sàden ɲɛ̀ɛ̀nun yè bà na deèn à jaaterema. Tɔ Ŋaablà re dzi ɲɛɛ̀nun nèè rìì.

⁶ Màsà gbaaniɛn jaaterema, yu jaa yereyere bosi gè sɔn ni a ci vɛɛrɛ. Màsà gbaaniɛn shiɲaanfia ko lagur'la ɲàn, gè jaama naàlen ni, jaadzin neè twɛy jaateremaà ko è bònèè sa laboo.

⁷ Àwà, twɛy gè jaama reè ɲàn, jɔ̀naà na boò jɛ̀r'le, fiira boò nìì tòr'lɛ̀rii re, zhììgìraa jaakɔrɔɔ̀n ni a ci mòdzin naa, nààlènaa yè bà ni a ci bibi ye e tsyɛɔn.

⁸ Tànman tsùnmɛn tsunmɛn ni gè ree reè soo sookɔɔn sapɛ re, jaadzin neè yè bà ni twɛy lagur'la min niì sapɛ, ko è dzuun. Ɲànwɔ na ni gè ree reè mà waa, feèn ko bwèè sa, è dziàn nì ci: «Mùn Tsìfa, Dzitsi Ŋaabla fɛnɛɔ̀, à fɛnɛɔ̀, à fɛnɛɔ̀. Wò rii na ni tsuù, à ni, è bà nàa.»

⁹ Mòò riì tsùuŋnà màsà gbaaniɛn tsɛ, è bà jaama waatsi sen ɲɛn waatsi tsɛ, gè jaama naàlen nèe ye ba na yee cèeŋ waatsi o waatsi, y'à ka à nɔɔrɔɔ̀ kpàdè, yè blà wɔ à ɲan, yè tswɛ̀y fa à re,

¹⁰ mòòbɔɔ mòo nààleèn sapɛ na e kunun gbaàn màsà gbaaniɛn tsɛ tsùùbaà bììn. È sapɛ yeè e kuu tɔ̀ waatsi sen ɲɛn waatsi tsɛ jaamaa bììn, y'à blàbe, yè e re màsà baanfla reè maa màsà gbaaniɛn jaaterema, yè dzin ci:

¹¹ «Mùn Tsìfaà ko mùn ne Ŋaablà, wo wù nɔɔrɔɔ̀ ko blàbee, ko dzibaabee ka. Wo wù tɔ̀ ka, kàtsu wo gè sapɛ ɲɛun. À bàu wo sàò yè bà ni, wo to yè è ɲɛn.»