Goo kpàdèuma rèè 2 - Bible Dzùùngoo Unicode

Sɛbɛn niì kau Efɛsì wɔ̀ɔ̀ ɲɛynamoo kur'là rè

¹ «Àwà ɲɛynamoo kur'lìi ni Efɛsì wɔ̀ rɔ̀n, sɛbɛn ka tɔ̀ mɛ̀rɛ̀kɛɛ̀ rè, a dè ci: "Swɛyn ɲɛ̀ɛ̀nuàn ni nìi sirama sia doùn, è bà jìɛ fìtsìnà ge sɛnuma ɲɛɛ̀nuàn fi, tɔ nìi dèe, tɔ̀ rii siin:

² Mun wo faadziɛ tɔ̀, min bà wo re faagoo blàa ko wo re mɔ̀ɲɔɔn tɔ̀. M'a tɔ̀ ci wo na mòdzìn ɲan reè raa goò kuà waa. Nìì reè ci ye kɛɛradzin, à to na tɔ̀ tsuru waa, wo twɛy dzuun bou, wo y'à jà ci è doodebaa ì.

³ Wo y'à mɔɲɔun, w'e byɛnbee ku a ɲan mun kamà, wo na byɛn waa.

⁴ Tà ko e sa ra, mun jàaŋnà wo ra, è ɲɛn a tsɛ, wo na ni a re kɛ̀nbààbee jɔ̀naà tsɛ waa.

⁵ Wo mɛɛy bou min niì, a taa to tɔ̀ re, e nimisa, e làkere dɔn a re jaamabee doùn. A na nìi faa bɔrɔɔ, e sèè tɔ̀ kpɛyn. Àwà, a ma nimisa, e làkere dɔn a re jaamabee doùn, n naà nà a kpɛyn, min nà a re fìtsìnà gee sen bo e gane rɔ̀n.

⁶ Tà ko e sa ra, goo soo ni wo re, nìi wù. Tɔ̀ rii yɛ, Nikola moo rèè faadziɛ xɔ wo mà, a ci à xɔ mun sa ma nìi tsuru.

⁷ Àwà, Ŋaablà re Dzia nìi dèe ɲɛynamoo kur'lèè rà, toro ì ye ba ni mòò riì rè è bà è ka myɛ̀yn faa, è toro wɔ cɛyn à y'à myɛ̀n ! Mòò riì ye ba dzibaa, jaamabee gɔ̀ɔ̀ku rìi ni Ŋaablà re àrìjinɛɛ̀ doùn, mun nà tɔ̀ dziàn sɔn sin tɔ̀ tsìfa ra, à y'à ɲɔn."»

Sɛbɛn niì kau Simirinìn wɔ̀ɔ̀ ɲɛynamoo kur'là rè

⁸ Àwà, ɲɛynamoo kur'lìi ni Simirinìn wɔ̀ rɔ̀n, sɛbɛn ka tɔ̀ mɛ̀rɛ̀kɛɛ̀ rè, a dè ci: «Mòo riì Jɔ̀naà è bà Lataan, nìi saun è sèè è jaamabe fa kɔn, tɔ nìi dèe, tɔ̀ rii siin:

⁹ Mun wo byɛɛn goò ko wo re gbaa tɔ̀. Ŋà, wo gètsi. Nìì reè dziàn ci ye Dzyèèsìbee mòdzin ì, à to na sààben waa, twɛy tsoo bara goòmà nìì reè dèe wo tsɛ, mun tɔ̀ tɔ̀. È Sùtan'naa blàbè gbaà mòdzin neè rìì.

¹⁰ Byɛnbe niì nà wo tàrà, maà shi tɔ̀ jɔun waa. Sànwɔbaà nà ye swey ji kàso doùn, è bà ni ye dzuun bo. Tà doùn, ye nà bwèy tsyeùn byɛnbe fa. Bà vusootsi è bè suu fɔ saàn dzu. Tà tsuru, mun nà jaamabee màsà baanflaa sìn wo ra.

¹¹ Àwà, Ŋaablà re Dzia nìi dèe ɲɛynamoo kur'lèè rà, toro ì ye ba ni mòò riì rè, è bà è ka myɛ̀yn faa, è toro wɔ cɛyn à y'à myɛ̀n ! Mòò riì ye ba dzibaa, saàn fiiraa fa tɔ̀ tàrà dɛ.»

Sɛbɛn niì kau Pɛrɛgamùn wɔ̀ɔ̀ ɲɛynamoo kur'là rè

¹² Àwà, ɲɛynamoo kur'lìi ni Pɛrigamùn wɔ̀ rɔ̀n, sɛbɛn ka tɔ̀ mɛ̀rɛ̀kɛɛ̀ rè, a dè ci: «Kaamunun dzii fii dzii dziɔ̀ ni mòò riì suun, tɔ nìi dèe, tɔ̀ rii siin:

¹³ Wo tsùuŋnà min niì, m'a tɔ̀. Sùtan'ne màsà gbaaniɛn ni mɔn nì. Wo shìuma tou mun na, wo na a dziira tsɛ mun na ɲɛynaà doùn waa. Arì Antsipasì, mun shɛɛrɛ vusootsià, tɔ vuu waatsi riì bwèy Sùtana tsùùmaà gàne rɔ̀n ye re mɔn, wo shìuma tou mun na.

¹⁴ Ŋà, mun jàaŋnà wo ra dɛyn. Mun jàaŋnà wo ra dɛyn, kàtsu swey ni ye ɲan, twɛy yè e gbaɔn Bàlaamùn naa kàr'nà kpɛyn. Bàlaamùn nì Bàlakì duùn wɔu è bà ni à to Isirayɛlidzin neè yè ɲɔ̀n kɔɔ shu rèè tàà, yè ɲànmɔ̀ɔ̀bè goo fa.

¹⁵ Mòdzin ì ni wo sa re, nìì reè sa yeè e gbaɔn Nikola moo rèè raa kàr'nà kpɛyn.

¹⁶ Tɔ̀ kamà, à to e nimisa, e làkere dɔn a re jaamabee doùn. Tà boshɔ̀ùn, n naà nà a kpɛyn tabe, min nà kaa fa è ka n dzu kaamun'nà ka.

¹⁷ Àwà, Ŋaablà re Dzia nìi dèe ɲɛynamoo kur'lèè rà, toro ì ye ba ni mòò riì rè, è bà è ka myɛ̀yn faa, è toro wɔ cɛyn, à y'à myɛ̀n ! Mòò riì ye ba dzibaa, mun nà manuàn sìn tɔ̀ tsìfa ra, manun mɛnɛunmaà. Min kpàà fyɛ sin à ra, tsoo ye sɛbɛɔ̀n tɔ̀ tsɛ, mòò pɛn na nìi tɔ̀ waa, fɔ à tàràbaà soo.»

Sɛbɛn niì kau Tsiyatsirì wɔ̀ɔ̀ ɲɛynamoo kur'là rè

¹⁸ Àwà, ɲɛynamoo kur'lìi ni Tsiyatsirì wɔ̀ rɔ̀n, sɛbɛn ka tɔ̀ mɛ̀rɛ̀kɛɛ̀ rè, a dè ci: «Ŋaablà Dzin Kpir'liì jaa rèè ni a ci sàden, à sàn nèè yè bà ni a ci dànɲàn myɛɛn maninin, tɔ nìi dèe, tɔ̀ rii siin:

¹⁹ Mun wo faadziɛ tɔ̀. Wo re kɛ̀nbààbee, ko wo re ɲɛynaà, ko wo re faagoò, ko wo re mɔ̀ɲɔɔn. M'a tɔ̀, wo re bònè goo fauma rèè giri jɔ̀na rèè mà.

²⁰ Ŋà, mun jàaŋnà wo ra. Mun jàaŋnà wo ra, kàtsu, tàan nìi kir'là Zhezabɛlì, tɔ̀ dzinkɔɔn ko e raà sa ci wo kɛɛra taan, wo y'à too mɔn. Tɔ̀ goò beò wɔ è re kàr'nà ka mun ne jòn nèè sàn fìrì, è jaa ka ɲànmɔ̀ɔ̀bee ko ɲɔ̀n kɔɔ shu rèè tàà rà.

²¹ Mun to waatsi siɔ̀n à ra, è bà ni nimisa, è làkere dɔn e re jaamabee doùn. Arì she, à sàò to na ni è nimisa è re ɲànmɔ̀ɔ̀bee dziibà waa.

²² Tɔ̀ kamà, mun nà à to ɲìnìn y'à ɲɛn. Nìì reè sapɛ to ni ɲànmɔ̀ɔ̀bee rà ko à ka, mun nà byɛnbe brisi ji twɛy sa tsɛ, fɔ è ye nimisa yè làkere dɔn e faadziɛ ɲàn boshɔ̀ùn.

²³ Mun nà à to à dzin nèè yè vu. Tà tsuru, ɲɛynamoo kur'lèè sapɛ nà à tɔ̀, ci mun nì mòdzian duungoo, ko è kɛ̀sɛmà rèè ɲansiɛ̀n, m'a tɔ̀. Mun to nà ye soo sookɔɔn sapɛ sarà, è kòrò ko ye faadziɛ ka.

²⁴ Àwà, nìi ye dzyee rèè mɔn Tsiyatsirì, ye gè o ge na e tsiiŋnà tɔ̀ kàr'nà nà, ye to na Sùtan'ne gòndò tsun neè tɔ̀ waa, a ci y'à dèe nìi tsuru, mun fa seyn kpɛrɛ tsùù ye kùùn dɛ.

²⁵ Ŋà nìi ni e re, ye tɔ̀ kun gban fɔ min bè nà.

²⁶ Mòò riì ye ba dzibaa, è dzi to mun ne goo rèè tsɛ fɔ à lataan, mun nà fààn sin tɔ̀ ra, è bà ni kun neè mòdzian kùùn.

²⁷ À nà è màrà ko myɛ̀ɛ̀nbere ka, à yè è ci ci a ci mòo dzùtsyɛn cià nìi tsuru.

²⁸ Mun nà fààn ree sìn à ra, a ci mun sa y'a tàrau n Fa Ŋaablà re nìi tsuru, tà ko min dzɔ̀n vì dziɛ rè swɛɛ̀n sìn à ra.

²⁹ Ŋaablà re Dzia nìi dèe ɲɛynamoo kur'lèè rà, toro ì ye ba ni mòò riì rè è bà è ka myɛ̀yn faa, è toro wɔ cɛyn, à y'à myɛ̀n.»