Goo kpàdèuma rèè 11 - Bible Dzùùngoo Unicode

Kɛɛra fii rèè raa goò

¹ Àyìwà, tà shɔ̀ùn, yè gè sɔn wɔ mun suun, tɔ boo kɔ̀n nè, gè gɔɔn raa. È dè mun na ci: «Fù e Ŋaablà re gbà blàa gɔ̀n, e saakabomaà gɔ̀n, nìì reè Ŋaa blàbee gbà blàa doùn, e twɛy dan.

² Ŋà, Ŋaablà re gbà blàa fɔɔn, maà tɔ̀ gɔ̀n waa, kàtsu tɔ siɔ̀n kun kpɛrɛ mòdzin neè rà. È nà wɔ̀ fɛnɛɛ tɔ̀rɔ̀ e san dzuun kuu dzyèè ko dzin fii doùn.

³ Mun nà dzi sin n shɛɛrɛ fii rèè rà, yè kɛɛra goòmà ì dè bwèy gbaa soo ko càànmoò fii ko mùey doùn, nìi byɛɔ̀n kuu dzyèè ko dzin fiɛ̀ mà, bɔ̀tɛ̀ funun ì yè bà è mà vya.»

⁴ Twɛy shɛɛrɛ fii rèè rìì yɛ oliviku fii rèè, ko fìtsìnà ge fii rèè, nìì reè tsìiŋnà dzɔ̀nxɔɔ̀ Tsìfaà jaaterema.

⁵ Mòò riì sàò ye ba ni è ɲaan fa è ra, sa boò è dzu, è ɲan rèè dzu bo mɔn. Ɔ̀ɔn, mòò riì ye ba à gaa w'e ɲaan fa è ra, tɔ saàn tɔ̀ rii tsuru.

⁶ À dzi ni twɛy rà yè ŋaablaxɔɔ̀ tsyee, ŋaa pɛn mà nà è re kɛɛra goòmà rèè waatsi rɔn waa. À dzi yeè bà ni è ra, yè yu rèè lakere ba tsììn, tà ko yè gooɲaan kaatsià sapɛ jaa ka dzɔ̀nxɔɔ̀ rà, a ci à dzi è ra nìi tsuru.

⁷ Àyìwà, yè na dò e re shɛɛrɛbee goomaa nà waatsi riì bwèy, kparan teyn bokɔɔn kɔ̀ɔ̀ tsun gbloùntòò doùn, tɔ nà è dzii kun kaà rà. À to nà dzi è ra, à yè è vu.

⁸ È fùn nèè nà maa ji to wɔ̀ blàa shiɲaanfi, tɔ̀ niì kiri ŋɛ̀nɛ̀ɲaɔ̀n Sodomùn, ko Misìran jaa ka, è Tsìfaà sa gbaun gɔɔ̀ rà min niì.

⁹ Mòdzin ì nà è fùn nèè siin bwèy zhììgi ko tara doùn. Jàmàan rèè sapɛ modzin ì ni è ɲan, tsua sapɛ modzin ì ni è ɲan, kungoòmà rèè sapɛ modzin ì, kuan sapɛ modzin ì yè bà ni è ɲan. È fa à to è fùn nèè yè wɔ kɔ̀ɔ̀ doùn waa.

¹⁰ Kɛɛra fii rèè saunmaà kamà, dzɔ̀nxɔɔ̀ tsɛ mòdzian nà e taama dzibe cɛyn. È nà e taama dzibe fɔ yè ge ì sìan e si ra blàbe, kàtsu kɛɛra fii rèe yè è byɛn gereun.

¹¹ Ŋà, bwèy zhiigi ko tar'la dɔ̀unmaà shɔ̀ùn, Ŋaablà re jaamabee ŋɔ̀n yè nà dɔ̀n è ɲan, yè fù yè e tsiì e san tsɛ. Tɔ̀un, è siinbaa rèè sapɛ yeè shi fɔ è bè geren.

¹² Tà doùn, kɛɛra fiɛ̀ yè gooma vu blà sɔn myɛn è bo jìrànxɔ rɔ̀n, tɔ dziàn è ra ci: «Ye tèyn mìin !» Yè tèyn jìrànxɔ rɔ̀n tɔ̀un, mun'na ɲàn, è ɲan rèè yè bà è siɛ̀n.

¹³ Tɔ̀ waatsia yɛ̀r'la ɲàn, dzɔ̀nxɔ̀ɔ̀mà kpinin bla yeè fa, tɔ̀ yeè wɔ̀ɔ̀ tara tsyeòn tara soo mɛɛy. Mòdzian gbaakoron ɲɛ̀ɛ̀nun yè vu tɔ̀ dzɔ̀nxɔ̀ɔ̀mà kpin'na ɲàn. Dzyee nìì reè tou, twɛy yè shi, yè jìrànxɔɔ̀ Ŋaablà nɔɔrɔɔ̀ kpàdè.

¹⁴ Gooɲaan fiiraa dɔ̀n bou, à zhììgìraa nàkɔɔn siin sani dɛyn.

¹⁵ Àyìwà, mɛ̀rɛ̀kɛɛ̀ ɲɛ̀ɛ̀nùnaa yè vur'la fyɛ tɔ̀un. Gooma vu blà ì yè bo jìrànxɔɔ̀ doùn, twɛy dziàn ci: «Dòònuùn, dziɲaan màsàbee wɔu mùn Tsìfa Ŋaablà ko e Jaara Moò suun. À nà màsàbee fa waatsi sen ɲɛn waatsi tsɛ.»

¹⁶ Tɔ̀un, mòòbɔɔ mòo nààlen nìì reè tsùuŋnà e re màsà gbaaniin neè tsɛ Ŋaablà jaaterema, twɛy yè e kunun gban ji yè e jaa rèè kuu, yè Ŋaablà blabe.

¹⁷ Yè dziàn ci: «Tsìfaà, Dzitsi Ŋaablà, wo rìi ni, tà ko wo yè bà na ni, mùn baraka siàn wo ra. Mùn baraka sìan wo ra, kàtsu, wo y'à re dzibaabe brisià kpàdèu, wo y'à tsuù màsàbee tsɛ.

¹⁸ Kun neè mòdzin neè yè e vunun tau, ŋà, wo raa vununtaà wɔu dòònuùn. Fùn nèè kitsi waatsi wɔu, wo re jòn nèè, ko kɛɛra reè, ko wo re mòdzin neè, ko nìì reè shia wo jɔun, mòdzin kiɲaanin sen ɲɛn mòdzin bla tsɛ, twɛy sàrà waatsi yeè bà wɔu. Dzɔ̀nxɔɔ̀ barabaa rèè sa bara waatsi wɔu.»

¹⁹ Àwà, Ŋaablà re gbà blà riì ni jìrànxɔɔ̀ doùn, tɔ̀ dzii yè san. Dzyèèsìbee sùàn yè jà à re gbà blàa doùn. Tɔ̀un ŋaà yè myɛ̀ɛ̀n, gooma vu ì yè bo, ŋaà yè sɛ̀ɛ̀y, dzɔ̀nxɔɔmaà yè kpìnìn, sankaamadzian yè jàà giri.