Goo kpàdèuma rèè 10 - Bible Dzùùngoo Unicode

Mɛ̀rɛ̀kɛɛ̀ suun sɛbɛniɛ̀n raa goò

¹ Àyìwà, tà shɔ̀ùn, min mɛ̀rɛ̀kɛ kpɛrɛ barakama jaà bo nakɔɔn ja jìrànxɔ rɔ̀n. Mun'na y'à màminiunà, sunkunaà yè bà ni à kùùn. À jaakɔrɔɔ̀n ni a ci bwèè, à sàn nèè yè bà ni a ci gbà sun sàma ì.

² Sɛbɛniin na kuɔn à suun, tɔ̀ dzii yè bà saɔn. È sirama saan tsùù kòòyua tsɛ tɔ̀un, è ɲɔ̀nmà saan tsùù dzɔ̀nxɔɔ̀ tsɛ.

³ È vu bo fààn na a ci jɛ̀rɛ gɛyn boò. È vu bou tɔ̀ tsuru min niì, ŋaà sɛ̀ɛ̀y vu jaa ɲɛ̀ɛ̀nuàn y'à latsi.

⁴ Ŋaà sɛ̀ɛ̀y vu jaa ɲɛ̀ɛ̀nuàn nìi dèu, mun na n'a re min tɔ̀ sɛbɛn, ŋà, min vu sɔn myɛn jìrànxɔ rɔ̀n, tɔ dziàn ci: «Ŋaà sɛ̀ɛ̀y vu jaa ɲɛ̀ɛ̀nuàn nìi dèu, tɔ̀ to a duùn gòndo, maà à sɛbɛn waa.»

⁵ Tɔ̀ ɲan, mun mɛ̀rɛ̀kɛ nìi jàu è bà e tsiiŋnà kòòyua ko dzɔ̀nxɔɔ̀ tsɛ, m'a jà, tɔ̀ yeè e sirama sia ɲanseun jìran kèrè.

⁶ È kɛɛ̀y Ŋaablà ra, tɔ̀ niì jaama waatsi sen ɲɛn waatsi tsɛ, è bà ŋaablaxɔɔ̀ ko e doùn ge reè ɲɛun, è dzɔ̀nxɔɔ̀ ko e tsɛ gè rèè ɲɛn, è kòòyua ko e ɲan gè rèè ɲɛn. À ci waatsi pɛn fa shù dɛ !

⁷ Ŋà, mɛ̀rɛ̀kɛɛ̀ ɲɛ̀ɛ̀nùnaa nà vur'la fyɛ sii rìi sèè, Ŋaablà re gòndoo nà bo e shi tsɛ tɔ̀ sii sèè, a ci à y'à dèu e re jòn nèè rà nìi tsuru, nìi kɛɛra reè.

⁸ Àwà, mun vu rìi myɛ̀un è bo jìrànxɔ rɔ̀n, tɔ̀ yeè sèè, è dzin mun na kɔn ci: «Bè, e bè sɛbɛniin dzii saunmaà tsi mɛ̀rɛ̀kɛɛ̀ suun, nìi tsìiŋnà kòòyua ko dzɔ̀nxɔɔ̀ tsɛ.»

⁹ Àwà, min kpɛrɛ̀ bè mɛ̀rɛ̀kɛɛ̀ rà tɔ̀un, min dzin à ra, ci è sɛbɛniɛn sìn mun na. È dzin mun na ci: «À tsi a ɲɔn. À kpɛ̀yn nà wo duɔ̀n sonbe, ŋà wo dzu rɔ̀n, à nà bà tsiin a ci ga.»

¹⁰ Mun to yè sɛbɛniɛn tsi mɛ̀rɛ̀kɛɛ̀ suun, m'a ɲɔn. M'a ɲɔun min niì, è tsiinbe mun dzu a ci ga. Ŋà à wɔu mun duùn nɔ̀n, è tɔ̀ sonbe.

¹¹ Tà shɔ̀ùn, è dè mun na kɔn ci: «Nìi ni è dè jàmàan rèè mòdzin giri tsɛ, ko kun giri tsɛ, ko kungoòmà rèè giri mòdzin tsɛ, ko màsa giri tsɛ, fɔ wo yè kɛɛrabe fa kɔn, w'e tɔ̀ dè.»