Bìoball air-loidhne

Goo kpàdèuma rèè 1 - Bible Dzùùngoo Unicode

Kìtaabuà doùn kùnàgòò jɔnaa

¹ Àyìwà, nèe Yesù Kirisà rè goo kpàdèuma, Ŋaabla nìi wɔu à suun, è bà ni à kpàdè e re jòn nèè rà, nìi nà fa sani dɛyn. Tà doùn, Yesù sa yeè e re mɛ̀rɛ̀kɛɛ̀ ka e re jòn kpiri Yùxanà rè, à y'à goò rèè kpàdè tɔ̀ ra.

² Yùxanà sa yeè bà shɛɛrɛ, à y'à kpàdè ci wo nìi sapɛ jau, à Ŋaablà re goomaa nì, è bà Yesù Kirisà rè shɛɛrɛbe.

³ Mòò riì nèe kɛɛra goòmà rèe rèè sɛbɛunmaà kàr'na, ko nìì reè yè e toro wɔɔ̀ à re y'à to e duùn, twɛy raa wùbeu. Twɛy raa wùbeu, kàtsu è fa waatsi tsyɛnbeò.

Yùxanà dzwɛ nìi jiu Azhi mar'la ɲɛynamoo kuru ɲɛ̀ɛ̀nuàn nà

⁴ Àwà, ɲɛynamoo kuru ɲɛ̀ɛ̀nun nìi ni Azhi mar'la doùn, nèe mun Yùxanà rè sɛbɛn, è ka twɛy rè. Ŋaablà riì ni, à na ni tsuù, è bà nàa, arì she, tɔ̀ yeè e ɲanwùɔ ko jaancin sìn e ra. À re dzi ɲɛɛ̀nun nìi to ni à re màsà gbaaniɛn jaaterema,

⁵ ko Yesù Kirisà, Shɛɛrɛ vusootsià, fùn jɔna kpunaunmaà, dzɔ̀nxɔɔ̀ tsɛ màsa reè raa Màsaa, twɛy sa yeè tɔ̀ fa e re. Àwà, Ŋaablà Jaara Moo Yesù rìi mùn kɛ̀niɔ̀n, è bà mùn tsi bou e re gooɲaantsiɛ ɲàn e tsiɛn baraka rɔ̀n,

⁶ tà ko è mùn bà màsàbe doùn mòdzin ì ko saakagoojaabobaa ì e fa Ŋaablà re, nɔɔrɔɔ̀ ko dzibaabee yè bà tɔ̀ raa waatsi sen ɲɛn waatsi tsɛ. Àmiinà !

⁷ À siin nèe, à nàa mun'na ɲàn. Jaadzin sapɛ nà à jà, arì nìì reè y'à vɔ̀ tsɔu. Dzɔ̀nxɔɔ̀ tsɛ tsua sapɛ nà gɛyn à kamà. Àmiinà !

⁸ Mùn Tsìfa Ŋaablà ci: «A y'a myɛ̀n Alifà ko Omegà, nìi dzuɔn Jɔ̀naà ko Lataan, tɔ mun nì. Nìi ni, à na ni tsuù, è bà nàa, dzia sapɛ dzyeèma tsifaà.»

Nìi kpàdèu Yùxanà nà, è bà ni Patsimɔsì

⁹ Àyìwà mun Yùxanà, ye neema kpir'la, ko ye byɛnbefasià è ɲɛn Yesù rè goo rèè tsɛ, ye ko mun sa yeè bà soo à re màsàbee doùn, mìn bà e mɔɲɔɔ̀n à kamà, mun kun bèu Patsimɔsì kòòyua fi dzɔ̀nxɔ̀ gane sɔn ɲan, Ŋaablà re Goomaa ko Yesù rè shɛɛrɛbee yè bà saabu.

¹⁰ Àwà Tsìfaà rè jisee sii sèè, Ŋaablà re Dzia dɔ̀un mun ɲan, min vu blà sɔn myɛn n bonè, a ci vuru fyɛ vu.

¹¹ À ci: «Wo nìi jàa, tɔ̀ sɛbɛn sɛbɛn doùn, a sìn be nèe wɔ̀ ɲɛ̀ɛ̀nun nèe ɲɛynamoo kur'lèè rà, nìi yɛ Efɛsì, ko Simirinìn, ko Pɛrigamùn, ko Tsiyatsirì, ko Saridzì, ko Filadɛlifì, ko Lawodzisè.»

¹² Àwà, vu nìi goomaa mun ka, min jaa kere tɔ̀un, ci mun nà tɔ̀ siin. Min jaa kereu min niì, min fìtsìnà ge sɛnuma ɲɛɛ̀nun jà.

¹³ Twɛy fìtsìnà ge reè shiɲaanfi, min gèsɔn ja, tɔ boo mòdzin ne. À mɛ̀yɛ gbaan sɔn wɔɔ, è bà e ɲanshiɔ̀ e ɲiɛ̀ rà ko ɲànshìàge sɛnuma ka.

¹⁴ À kùngwɛ̀ɛn fyɛɔ tɛrɛ tɛrɛ tɛrɛ a ci kpaantsɔ ko sàà sùù fyɛ, à jaadzin neè yè bà ni a ci sàden.

¹⁵ À sàn nèè den deèn a ci dànɲan niì jɛ̀rɛ̀n boo sa rɔ̀n, à noo yè bo, à vuà yè bà ni a ci yu blà tsuuru vu.

¹⁶ Swɛyn ɲɛ̀ɛ̀nun kuuna à sirama sia doùn, kaamunun dzii fii dzii swɛyswɛy yè bà bouna à dzu. À jaakɔrɔɔ̀n den deèn a ci bwèytaaruùn fàxe rɔ̀n bwèè.

¹⁷ Àwà m'a jàu min niì, min mɛɛy ji à sàn dzuun, min bà a ci fùn. Tɔ̀un è sirama sia tsùù mun tsɛ, è dzin ci: «Maà shi waa, mun nì Jɔ̀naà, min bà Lataan.

¹⁸ Mun jaama. Mun saun, ŋà mun yɛ jaama, waatsi sen ɲɛn waatsi tsɛ. Saàn ko fùn nèè tàà sa neèdzian ni mun suun.

¹⁹ Tà doùn, wo goo nìì reè jàu, è sɛbɛn. Nìi reè ni dòònuùn ko nìì reè nà nà twɛy bònè, e sa sɛbɛn.

²⁰ Wo swɛyn ɲɛ̀ɛ̀nun nìi jàu mun sirama sia doùn, ko fìtsìnà ge sɛnuma ɲɛɛ̀nuàn, tɔ̀ gòndoo dzuɔn nì siin: Swɛyn ɲɛ̀ɛ̀nuàn, tɔ ɲɛynamoo kuru ɲɛ̀ɛ̀nun nèè raa mɛ̀rɛ̀kɛ rèè, fìtsìnà ge ɲɛɛ̀nun nèè, twɛy yè bà ɲɛynamoo kuru ɲɛ̀ɛ̀nun nèè.»

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan