Bìoball air-loidhne

Galatsika reè 4 - Bible Dzùùngoo Unicode

Ŋaablà dzinbee tàràù'n kur'la

¹ Àwà mun nìi dèe tɔ̀ rii siin: È shɛnsenbaà to dziinkòòmɛ̀yn, à bàu waatsi o waatsi, à to kɛ̀nsɛɛn ye ba gèè sapɛ tsifa, dànfaran pɛn na ni à ko jòn fi waa.

² Tɔ̀ waatsi rɔn, à re goò rèè bàa ni à kààwɔbaa ì, ko à re goo rèè jaabobaa ì rìì suun, fɔ è bè suu à fàà rè waatsi kpadèumaà dzu.

³ Tɔ̀ soo tsuru, è ɲe sa to dziin koomɛynbeè rà, ɲe yè bà na ni dziɲaan goo rèè suun, ɲe na jon ì rìì.

⁴ Ŋà waatsi riì na kpàdeò tɔ̀ dzii tsyɛun min niì, Ŋaablà yeè e Dzin Kpir'la ka na, è nà kere tàan re, sàrìyaa dzuun.

⁵ Tɔ fau gè riì ni à to, nìì reè ni sàrìyaa dzuun, è dzi twɛy kùngɔ màbo, mìn dzi Ŋaablà dzinbee tàrà.

⁶ Ye Ŋaablà dzin ì nìi fa, tɔ̀ kamà è Dzin Kpir'la rè Dzia ka na mùn dùsùkuan tsɛ, tɔ̀ yeè bà dziàn fààn na ci: «Bàa, mùn fàà»

⁷ Tɔ̀ tsuru, wo na jòn dɛ waa, ŋà wo dzin nì. Wo to ye ba dzin, wo shɛnsenbaa sa Ŋaablà baraka rɔ̀n.

⁸ Dan, ye naà Ŋaablà tɔ waa, ye to na ge ì rè jòn, nìì reè naà Ŋaablà takia waa.

⁹ Ŋà dòònuùn, Ŋaablà tɔumaà ye re, mìn dzin Ŋaablà yeè ye tɔ̀ sa kɛ̀, ye bàa dzùrù kɔn ye yè sèè twɛy gè fààn bɛy nafà bɛy reè ma, ye yè bà n'a re ye yè bà kɔn yeu twɛy rè jòn, a ci dan ?

¹⁰ Ye jisee reè, ko kuu rèè, ko waatsi reè, ko jii reè latsuɔ.

¹¹ Mun vyɛ̀ɛ̀ymaà na pɛn ye ka, à mà nà bà ci mun faagoo ɲaùn nìi fau ye kamà, tɔ bàu maana waa.

¹² Neema reè, mun y'à gaa ye re, ye bà a ci mun, kàtsu mun sa ni a ci ye. Ye na goo terenbɛy fa mun ka kàjaa pɛn tsɛ waa.

¹³ Àwà y'a tɔ̀ ci mun Kùnàgoo Dziɔ̀ dè jaa jɔ̀na nìi fau ye ra, mun tɔ̀ fau ɲìn'nì saabu ɲan.

¹⁴ Mun ne ɲìn'nà kpɛ̀ynto bàu byɛnbe brisi ye mà, ŋà tɔ̀ na à to ye yè mun ɲanfyɛnbe, tàmafa ye yè ɲii mun ɲan waa. Ye yɛ̀rɛ̀ to mun kùùntsiu ni a ci Ŋaablà re mɛ̀rɛ̀kɛ, arì Yesù Kirisà tsuru.

¹⁵ Taamadzibe rìi na ni ye ɲan tɔ̀ waatsi rɔn, tɔ dɔ̀un min ? È ɲɛn à tsɛ mun ye shɛɛrɛ, ci è ba na dzia fa, ye na nà goo sapɛ ko e kuru fa mun ne, arì ye yè e jaadzin neè bo sìn mun na.

¹⁶ Tà doùn, mun sààbeen dè niì faa ye ra, tɔ mun bàu ye ɲan gbɛ ?

¹⁷ Nìì reè yɛ e ɲanshiɔ̀ ye raa goò rà, è na à faa wùù tsɛ waa. È nìi gaa, tɔ̀ rii yɛ yè ye vyɛ̀ bo ɲe ra, ye yè bà ni e shi ye ra.

¹⁸ Nìi wù, tɔ̀ rii yɛ, ye yè bà shiɔ̀ wùɔ rà kudɛyn. À mà bà bàsɔùn ci mun ni ye fi waatsi riì bwèy waa.

¹⁹ Mun dzin nèè, mun byɛnkɔɔn siin ye ka a ci tàan donkunkɔɔn, fɔ Kirisà yè bè e tsuùma bo ye ɲan.

²⁰ Mun sàò na ni min bà ni ye ka mɔn nèe waatsi ree ɲan, min bà ni n goomau'n kuru tɔ ye ka, kàtsu mun na à tɔ̀, mun nà nìi fa ye kàjaa tsɛ dɛ.

Polì nìi dèu jòn taàn dziàn ko xɔrɔn taàn dziàn raa goò tsɛ

²¹ Ye nìì reè sào ni ye yè bà ni Sàriyaa dzuun, y'a dè n na, sàrìyaa nìi dèe ye na tɔ myɛ̀na ɔn ?

²² Àwà à sɛbɛɔ̀n ci Ibraximà dzin kpiri fii rìì tàrau. Soo jòn taàn raa, soo yè bà xɔrɔn taàn raa.

²³ Ŋà jòn taàn raa dzin kpir'la, tɔ kereu è kòrò gɔɔ̀n raa sàɔ ka. Xɔrɔn taàn raà, tɔ̀ ye kere è kòrò Ŋaablà re làyiri seunmaà ka.

²⁴ Tɔ goò tàànmàshɛ̀n goòmà nì, è ɲɛn à tsɛ, tàan fii rèe dzyèèsìbe fii rìì gooma dekɔɔn. Soo, tɔ Sinayiri jèèn raà, nìi Agarì è bà ker'là faa jònbee kamà.

²⁵ Agar'lì yɛ, Sinayirì jèn nìi ni Àràbù jamaan ɲàn. Wò rii dòònuùn naa Yerusalɛmùn, è ɲɛn à tsɛ, à ni jònbee rà ko e dzin nèè ka.

²⁶ Ŋà jìrànxɔɔ̀ raa Yerusalɛmùn, tɔ xɔrɔnbeo, wò rii to ɲe naà.

²⁷ È ɲɛn à tsɛ, à sɛbɛɔ̀n nèe tsuru ci: «Wo tàan nìi na dzin ker'là waa, ɔ̀ɔn, dzin na ni wo tàan nìi rè waa, a taama dzibe ! Ɔ̀ɔn, wo rìi na ker'là ɲìnìnbe tɔ jà waa, taamadzibe vu bo ! È ɲɛn à tsɛ, tàan bàtoumaà raa dzin nèè nà giribe, è geren kpiritsià raà tsɛ.»

²⁸ Tà doùn, n neema ì, ye làyir'là dzin nèè rìì, a ci Ishakà.

²⁹ Ŋà dan, dzin nìi kereu gɔɔ̀n baraka rɔ̀n, tɔ̀ na Ŋaablà re Dzia baraka rɔ̀n dzin kereumaà byɛɛn nìi tsuru, à ni tɔ̀ tsuru arì she.

³⁰ Ŋà Ŋaablà re goomaa fee dèe mùn na, à ci: «Jòn taàn ko e dzin kpir'la kaa, è ɲɛn à tsɛ, jòn taàn dzin kpir'la fa dzi shɛn sen xɔrɔn taàn dzin kpir'la ka waa.»

³¹ Tà doùn n neema ì, ɲe na jòn taàn dzin ì waa, ŋà ɲe xɔrɔn taàn dzin ì nì.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan