Bìoball air-loidhne

Galatsika reè 1 - Bible Dzùùngoo Unicode

Sɛbɛɛn kaɔ nìì reè rè, ko dzwɛɛ̀

¹ Àwà mun Polì, mun bàu kɛɛradzin. À na adamàdzin mòdzin ì nè kɛɛradzinbe waa, à to na boo adamàdzin mòdzin ɲan waa, fɔ Yesù Kirisà ko Fà Ŋaablà, tɔ̀ niì y'à kpunan bou fùn nèè fi.

² Nèe sɛbɛn, mun ko n neema niì reè sapɛ ni mun ka, ɲe nìi kaà Galatsi mar'la ɲɛynamoo kur'lèè rè.

³ Arì she, Ŋaablà ɲanwùɔ ko jaanciàn, mùn Fà Ŋaablà, ko Tsìfa Yesù Kirisà yè twɛy sìn e ra,

⁴ tɔ̀ niì yè e yɛrɛ siun mùn ne gooɲaantsiɛ kamà, gè riì ni à to mùn yeè tsi bo nèe dziɲan ree gooɲaan suun, è kòrò mùn Fà Ŋaablà saɔ ka.

⁵ Nɔɔrɔ yè ɲɛn à tsɛ waatsi sen ɲɛn waatsi tsɛ ! Àmiinà !

Polì nìi dèu Galatsika reè rà, è ɲɛn Kùnàgoo Dziɔ̀ ko à re shɛɛrɛbee tsɛ

⁶ À jiu mun dzii tsɛ, m'a jà ci mòò riì ye kiriu Kirisà ɲanwùɔ baraka rɔ̀n, ye tabe seè bou tɔ̀ kpɛyn, ye yè e gban kùnàgoo dziù kpɛrɛ kpɛyn.

⁷ À na ni a ci kùnàgoo dziù kpɛrɛ ni dɛ, ŋà mòdzin ì nì ni ye ɲan, nìi reè ye akir'là gbiimaan, yè bà ni à re, yè Kirisà rè Kùnàgoo Dziɔ̀ kùnàgblen.

⁸ Ŋà arì nìi ɲe, tàmafa jìrànxɔɔ̀ doùn mɛ̀rɛ̀kɛɛ̀ sɔn ye na kùnàgoo dziù kpɛrɛ dè ye ra, nìi ko ɲe re jɔ̀na dèumaà na soo, tɔ̀ tsìfa yè danga !

⁹ Àwà a ci ɲe y'a dèu nìi tsuru nòn, n naà sèè à tsɛ kɔn dòònuùn m'a dè, ci mòò ye kùnàgoo dziù kpɛrɛ dè ye ra nìi ko ye re jɔ̀na tàraumaà na soo fyeu, tɔ̀ tsìfa yè danga !

¹⁰ Àwà dòònuùn m'a gaa min byɛ̀n mòdzian nì mà ràà, tàà min byɛ̀n Ŋaablà rii mà ? Mun y'à gaa min dzibe mòdzian nì nà ɔ̀ ? Min ba na à gaa min dzibe mòdzian nì nà, mun fa bà Kirisà rè faagoofadzin waa.

¹¹ Neema reè, mun nà nìi dè ye ra, ye bà ni à tɔ̀, tɔ̀ rii yɛ ci mun Kùnàgoo Dziù rìi dèu ye ra, à na adamàdzin mòdzin naa waa.

¹² È ɲɛn à tsɛ, mun na à tàrà adamàdzin mòdzin ne waa, mòò to na à kàràn mun na waa. À kpàdèu mun na, è bo Yesù Kirisà rìì ɲàn.

¹³ Mun na nìi faa dan Dzyèèsìbee mòdzin neè rè dzinɛ shià doùn, ye tɔ̀ gooma myɛun. Y'a tɔ̀ ci mun na fuɔ̀ Ŋaablà re ɲɛynamoo kur'là kpɛyn min byɛnbe ɲɛn à tsɛ cɛyn, min bà na à gaa m'a bara.

¹⁴ Mun na bèe jɔun Dzyèèsìbee mòdzin neè rè dzinɛ shià jìɛ̀ doùn, min bà ni n jaasi kur'là mòò giri jɔun ɲe kuan ɲàn. Wɔ̀dzùùnta na ni mun ɲan fɔ à si yè bè tsi mun fà rèè rè goo bɔrɔɔ shi rèè jìɛ̀ doùn.

¹⁵ Ŋà fɔ mun ni n naà duùn, Ŋaabla mun bo jiu n si, è mun kiri e ɲanwùɔ baraka rɔ̀n.

¹⁶ À dzibeu à ra è Dzin Kpir'la kpàdè mun ɲan, min bà ni à gooma de kun kpɛrɛ mòdzin neè rà. Tɔ fau min niì, mun na adamàdzin mòdzin ne làtsii gaa waa.

¹⁷ Nìì reè to bà dɔ̀un mun jɔun kɛɛradzin, mun na be twɛy tsu re Yerusalɛmùn waa. Mun bèu Àràbù jamaan nɔn nì suu, min kòmànà n kpɛyn sèè Dàmasì wɔ̀ rɔ̀n.

¹⁸ Jii zhiigi tɔ̀ rii shɔ̀ùn, min kòmànà bè Yerusalɛmùn, min bè bo Piyɛr'lè, min bwèy teeŋ nun fa ko à ka.

¹⁹ Ŋà mun na kɛɛradzin kpɛrɛ jà mɔn Tsìfaà tseyn kpiri Yàkubà tɛ̀y waa.

²⁰ Ŋaabla mun shɛɛrɛ, ci mun yɛ nìi sɛbɛn siàn ye ra, à na doo goòmà waa.

²¹ Tà shɔ̀ùn min kòmànà bè Siiri ko Silisi mar'leè ɲàn.

²² Àwà tɔ̀ sapɛ ɲan, ɲɛynamoo kuru nìì reè na ni Yude mar'lɔùn Kirisà ɲàn, twɛy naà mun jaɔ̀ ŋe yè mun tɔ̀ waa.

²³ È na nìi bàsɔùn myɛ̀ɛn, tɔ̀ rii yɛ ci: «Mòò riì na byɛnbe ɲɛɛn ɲe tsɛ jɔ̀na, tɔ̀ rii yè e lakereò dòònuùn è ɲɛynaà Kùnàgoo Dziɔ̀ dèe, à na baragoò faa tɔ̀ riì ɲàn dan.»

²⁴ È to na nɔɔrɔ ɲɛɛn Ŋaablà tsɛ, è ɲɛn mun goò tsɛ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan