Efɛsika reè 6 - Bible Dzùùngoo Unicode

Dziin nèè ko ker'làgè rèè fia

¹ Dziin nèè, ye e ker'là gè rèè dzugoomaa blàbe Tsìfaà ɲàn, kàtsu tɔ goo, nìi tereòn.

² È ɲɛn à tsɛ «A faà ko a naà blàbe», tɔ̀ rii Ŋaablà dzugooma xɔù jɔ̀naà, làyiri sen ɲɛɔ̀n nìi tsɛ,

³ nìi yɛ: «E bà ni xɛɛrɛ ko sì gbààn tarà dzɔ̀nxɔɔ̀ tsɛ.»

⁴ Ye fà rèè sa, e tsu mà e dzin nèè vunun ta waa, ŋà ye è ladɔn nì, ye è koron è kòrò Tsìfaà rè làtsìì goòmà rèè ka.

Jòn nèè ko e kuntsii rèè fia

⁵ Jòn nèè, e kuntsii nìì reè ni dzɔ̀nxɔɔ̀ tsɛ, ye è dzugoomaa blàbe. Ye tɔ̀ fa shiɲaanbe ko màsɔɔn ko duun fyɛ ka, a ci y'a faa Kirisà rìì lè.

⁶ À mà bà è jaa ra goo bàsɔùn, a ci y'a faa ye yè dzibe mòdzin ì nà waa. Y'a fa rii, ci ye Kirisà rè jon ì, è bà Ŋaablà saɔ fakɔɔn ko e duɔ̀n sapɛ ka.

⁷ Ye faagoò fa è re duun fyɛ ka, a ci y'a faa Tsìfaà rìì lè, ye na à faa mòdzin ì nè waa.

⁸ Ye bà à tɔ̀ ci mòdzian soo soo sapɛ, xɔrɔn sen jòn tsɛ, a wùù riì fau, a naà tɔ̀ sàr'là rìì tàrà Tsìfaà rè.

⁹ Ye kùntsii rèè sa, e sa yeè tɔ̀ soo fa è re, nìi yɛ, e maà ɲanbe è mà waa, ye bà à tɔ̀ ci Tsìfa soo rìì ni ye sa re, nìi ni jìrànxɔɔ̀ doùn, à na mòò boò mòò ɲàn waa.

Ɲɛynamoò rè kaa faa gè rèè

¹⁰ Dòònuùn, ye fààn wɔ e yɛrɛ ɲan Tsìfaà ɲàn dzibaabee fàan ka.

¹¹ Ye Ŋaablà re kaa faa gè rèè sapɛ ji e ma, gè riì ni à to e san gbaunma yè dzi to Sànwɔbaà rè nanmara goo reè sapɛ jɔun.

¹² È ɲɛn à tsɛ, ɲe na ni kaà rà ko adamàdzin mòdzin ì ka waa, ŋà ɲe ko nìì reè ni à ra, tɔ kùntsii rèè rìì, ko fààntsi rèè, ko dziɲaan tsitsiɛ̀ kùntsii rèè, ko gooɲaan kwey nìì reè ni jìrànxɔ rɔ̀n.

¹³ Tɔ̀ kamà, ye Ŋaablà re kaa faa gè rèè sapɛ sen, e san gbaunma yè bà ni to jisee ɲaan sii sèè. Goò sapɛ fa douma shɔ̀ùn, ye bà ni tsuù e san tsɛ.

¹⁴ Tà doùn ye san gban ! Sààbeen yè bà e dzun na ɲànshìàge, terenbee yè bà e vu ra myɛ̀ɛ̀n mɛyɛ.

¹⁵ Jaanciàn Kùnàgoo Dziɔ̀ dèè ɲantsuɔ̀, tɔ̀ yeè bà e san nà seereyn.

¹⁶ Ɲɛynaà myɛ̀ɛ̀njɔ̀ɔ̀nshuagèè, kudɛyn tɔ̀ yeè bà ni e suun. Tɔ rii nà à to ye yè dzi ɲaàn rè shidzin sama reè sapɛ sa dzi.

¹⁷ Mùn tsià myɛ̀ɛ̀n baanflaa yè bà ni e kuùn, Ŋaablà re Dzia kaamunun gbàan yè bà ni e suun, tɔ̀ niì Ŋaablà re goomaa.

¹⁸ Ye Ŋaablà mafyɛ̀ɛn kudɛyn à re Dzia baraka rɔ̀n, màfyɛ̀yn kaatsià sapɛ ka. E taa yeè bà ni tɔ̀ mà kudɛyn, e ɲan yè bà shiɔ̀ à ra fau'n kur'la sapɛ. Ye màfyɛɛ̀n faa Ŋaablà re mòò rèè sapɛ re.

¹⁹ Ye Ŋaablà mafyɛ̀n mun sa re gè riì ni à to, mun ye n dzu san ci mun nà gooma, min dzi Kùnàgoo Dziɔ̀ gòndoo dè fyɛ ko akiritsuu ka.

²⁰ Mun ni tɔ̀ Kùnàgoo Dziɔ̀ rìì lè ni ɲan, jɔ̀rɔ̀kɔɔ yè bà wɔɔ mun na, min bà ni à gooma de akiritsuu ka, a ci mun wù m'a dè nìi tsuru.

Pol'lè gooma lataan

²¹ Àwà, ye yè bà ni à tɔ̀ goo nìì reè ni mun ne, ko mun nìi faa, nìi Tsishikì, mùn neema kpiri kɛniunmaà, Tsìfaà rè faagoofabaa vusootsià, tɔ nà bè ye toro kɔ̀ tɔ̀ sapɛ ra.

²² Mun y'à kaà ye re è ɲɛn tɔ̀ rii tsɛ. È ɲe kùnàgoo de ye ra, è ye màxɔ̀n.

²³ Mùn Fà Ŋaablà ko mùn Tsìfa Yesù Kirisà, arì she, twɛy yè jaanciàn, ko kɛ̀nbààbee, ko ɲɛyna sìn neema reè rà !

²⁴ Nìì reè sapɛ mùn Tsìfa Yesù Kirisà kɛ̀niɔ̀n, kɛ̀nbààbe dobɛy ka, arì she, Ŋaablà yeè e ɲanwùɔ kpàdè twɛy sapɛ ra !

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan