Bìoball air-loidhne

Efɛsika reè 5 - Bible Dzùùngoo Unicode

Polì ci ɲɛynamoo rèè yè e re jaamabee fa vyevyeè ɲàn

¹ Tà doùn, Ŋaabla ye nìì reè kɛ̀niɔ̀n e dzin, ye bà à shɔ̀ùnminanbaa ì.

² Ye e re jaamabee fa kɛ̀nbààbee tsɛ, a ci Kirisà sa mùn kɛ̀niun nìi tsuru, è yɛrɛ sin mùn kamà kwɛ̀yge ko saaka, nìi kinìn dzi Ŋaablà ra.

³ Kɛ̀kɛ̀ɛ̀ybeè ko goo nooŋmaà kaatsi gè o ge, ko jaacɛnbɛybeè, twɛy tsoo tsu mà kiri e fi waa, kàtsu tɔ̀ na dàaŋnà Ŋaablà re mòò rèè fi waa.

⁴ Seey bɛy goòmà rèè, gooma kuntan neè ko gooma kor'nèè, twɛy tsu na dàaŋnà, fɔ gooma niì reè baraka sìan Ŋaablà ra.

⁵ Ye b'a tɔ̀, ci mòdzin kɛkɛ̀ɛ̀yraa, ko mòdzin nooŋmaà, ko mòdzin jaacɛnbɛɛ, tɔ̀ niì ko ɲɔ̀nkɔbaa sa soo, twɛy pɛn dzii na ni Kirisà ko Ŋaablà re màsàbee ɲàn waa.

⁶ E maà à to mòò pɛn yè e san fìrì e re gooma nafà bɛy ì ka waa. Tɔ̀ rii y'à to Ŋaablà re vununtaà wɔɔ̀ à dzugoomaa shi jiì bɛy reè tsɛ.

⁷ Tà doùn, e maà dzyèè è ka goo sɔn pɛn na waa.

⁸ Dan, ye na ni tsitsiɛ̀ ɲàn, ŋà dòònuùn, Tsìfaà ɲàn, ye bàu ni vyevyeè ɲàn. Tà doùn, ye e re jaamabee fa a ci vyevyee dzin ì.

⁹ È ɲɛn à tsɛ, vyevyeè dziàn nì yɛ goowùɔ sapɛ, terenbee sapɛ, sààbeen sapɛ.

¹⁰ Goo nìi dzi Tsìfaà rà, ye tɔ̀ gaa tɔ.

¹¹ Tsitsii dzuun goo nafà bɛy reè, e maà e san ji twɛy ɲàn waa, ye è dzuun ni bo.

¹² È ɲɛn à tsɛ, twɛ̀y mòdzin neè goo nìì reè faa mɛnɛn doùn, è dèkɔɔn sa seey.

¹³ Ŋà è dzuun ye dzi bo nòn, è kpàdèu vyevyeè rà.

¹⁴ Goo o goo to ye dzi kpadè nòn, tɔ bàu vyevyee. Tɔ̀ kamà è bà deò nèe tsuru ci: «Wo rìi ni ciɛ̀ rà, kpunan e fù bo fùn nèè fi, Kirisà nà e vyevyeè bo wo tsɛ.»

¹⁵ Ye e yɛrɛ kaàwɔ taki e re jaamabee fau'n kur'la rà. E maà bà mòdzin akiribɛy ì waa, ye bà mòdzin akiritsi ì.

¹⁶ Ye waatsia kùngɔ màbo, kàtsu mùn ni jisee ɲaan ì ɲàn.

¹⁷ È ɲɛn tɔ̀ tsɛ, e maà bà mòdzin akiribɛy ì waa, ŋà Tsìfaà sàɔ nìi, ye tɔ̀ rii gaa tɔ.

¹⁸ E maà mìɛn fa tɔ̀ yeè e cɛn waa, tɔ nàa màgòò san ka. Ye cɛn Ŋaablà re Dzia rìì là.

¹⁹ Ye zàbùrù ye ì, ko màkìrì ye ì, ko Ŋaa blabe ye ì cèè, y'a ka gooma e si ra. Ɔ̀ɔn ye ye ì cèè Tsìfaà rè, ye tsoo dzi ɲɛn à tsɛ e duɔ̀n sapɛ ka !

²⁰ Ye baraka sìan mùn Fà Ŋaablà ra waatsi sapɛ, goo sapɛ doùn, mùn Tsìfa Yesù Kirisà tsoo ra.

Tsùɔ̀ fau'n kur'la kpir'leè ko tàan rèè fi

²¹ Kirisà jɔun shiɲaanbe kamà, ye e majàà e si re.

²² Tàan rèè yè e majàà e re kpir'leè rè, a ci yè e majàaŋnà Tsìfaà rè nìi tsuru.

²³ È ɲɛn à tsɛ, kpir'la rìì taàn kùntsii a ci Kirisà sa ɲɛynamoo kur'là kùntsii nìi tsuru. Ɲɛynamoo kur'là y'à gɔɔ̀n, è bà ɲɛynamoo kur'là Tsibaa.

²⁴ Tà doùn, a ci ɲɛynamoo kur'là yè e majàaŋnà Kirisà rè nìi tsuru, tàan rèè sa yeè e majàà e re kpir'leè rè, goò sapɛ doùn.

²⁵ Kpir'leè, ye e re tààn rèè kɛ̀n a ci Kirisà sa ɲɛynamoo kur'là kɛ̀niun nìi tsuru, è yɛrɛ sin à kamà.

²⁶ À tɔ̀ fau, è bà ni à fɛnɛbe, à fòoŋmaà shɔ̀ùn è fyɛ, yuà ko Ŋaablà re goomaa baraka rɔ̀n.

²⁷ À y'à fa, gè riì ni à to, ɲɛynamoo kur'là yè kpàdè wò jaaterema ko nɔɔrɔ ka, fyɛ̀ na ni nìi rà waa, ɲɔ̀ɔ̀ɲɔ̀rɔ̀ma na ni à ra waa, ko twɛy tsur'lèè pɛn, ŋà à fɛnɛɔ̀, jààma pɛn to na ni à ra waa.

²⁸ Tɔ̀ fau'n kuru soo rà, kpir'leè sa wù yè e re tààn rèè kɛ̀n a ci e yɛr'la gɔɔ̀n. Kpir'liì yè e re tààn kɛ̀niɔ̀n, tɔ̀ yeè e yɛr'la rìì kɛ̀niɔ̀n.

²⁹ Àwà, mòò pɛn na e yɛr'la gɔɔ̀n kɔn jà ŋe waa. Ŋà à y'à dziira gaa, è magoo wɔ à ɲan, a ci Kirisà sa y'a faa ɲɛynamoo kur'là rè nìi tsuru.

³⁰ È ɲɛn à tsɛ, mùn sapɛ y'a gɔɔ̀n gàne rèè sɔn ni.

³¹ Tɔ̀ kamà è bà deò ci: «Kpir'la nà e faà ko e naà bàto, è shi e re tààn nà, yè bà gɔn kungɔ soo.»

³² Tɔ gòndo bla rii, min bà à dèe m'a ɲɛn Kirisà ko ɲɛynamoo kur'là tsɛ.

³³ À kpɛ̀yn nìi boò tɔ̀ rii yɛ ci e soo soo sapɛ yeè e re tààn kɛ̀n a ci e yɛr'la, taàn sa yeè e re kpir'la blàbe.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan