Bìoball air-loidhne

Efɛsika reè 1 - Bible Dzùùngoo Unicode

Sɛbɛɛn kaɔ nìì reè rè, ko dzwɛɛ̀

¹ Mun Poli, Yesù Kirisà rè kɛɛradzian Ŋaablà saɔ baraka rɔ̀n, nèe mun ne sɛbɛn è sìn Ŋaablà re mòò rèè rà Efɛsì wɔ̀ rɔ̀n, nìì reè ɲɛɔ̀n Yesù Kirisà rà.

² Arì she, Ŋaablà ɲanwùɔ ko jaanciàn, mùn Fà Ŋaablà ko Tsìfa Yesù Kirisà yè twɛy sìn e ra.

Dzwɛ dziitsyɛunma nìi tàràu Kirisà baraka rɔ̀n

³ Tsoo dzi yeè ɲɛn Ŋaa tsɛ, mùn Tsìfa Yesù Kirisà Fàà, wò riì yè e re Dzia dzwɛɛ̀ sapɛ ladzyèèmaa kuun mùn mà jìrànxɔɔ̀ doùn, Kirisà ɲàn.

⁴ Sani dziɲaan yè ɲɛn, à na ɲe ɲankɛrɛn boo nòn Kirisà ɲàn e jaara, gè riì ni à to ɲe yè bà fɛnɛ ì ko jààkìbɛy ì à jaa dzuun, à re kɛ̀nbààbee doùn.

⁵ Fɔ dzunjɔnma nɔ̀n, à y'à latsigɛu è ɲe bà e dzin ì Yesù Kirisà baraka rɔ̀n, a ci a dzi à ra nìi tsuru è kòrò à ɲanwùɔ ka.

⁶ À tɔ̀ fau mìn bà ni tsoo dzi ɲɛn à tsɛ, è ɲɛn à ɲanwùù nɔɔrɔmaa tsɛ, à tɔ̀ niì sìn jiu mùn na à re kɛ̀niumaà baraka rɔ̀n.

⁷ À ɲan, mùn kùngɔ mabou à tsìɛn baraka rɔ̀n, mùn ne gooɲaantsii reè yè mɛɛy bo mùn vu ra è kòrò à ɲanwùù brisià ka.

⁸ À mùn kɔ̀u tɔ̀ ra giri, akiriblabee ko akiritsifabee sapɛ ka.

⁹ À sàɔ gòndo riì na mɛnɛn tsùuŋnà fɔ dan à tɔ̀ kpàdeu mùn na a ci à dzi à ra nìi tsuru, è kòrò à re làtigɛɛ ka, Kirisà ɲàn.

¹⁰ Tɔ̀ làtigɛɛ doùn, à nà nìi fa, tɔ̀ rii yɛ, tɔ̀ waatsia dzii ye tsyɛn waatsi riì bwèy, è jìrànxɔ̀ dòùn gee sapɛ, ko dzɔ̀nxɔ̀ tsɛ̀ gee sapɛ ladzyèè soo, kùntsii soo yeè bà ni è sapɛ re, nìi Yesù Kirisà.

¹¹ Kirisà rìì ɲàn sa, ɲe ɲankɛrɛun, ɲe to yè bo tsùù Ŋaablà raa fɔ dzunjɔnma nɔ̀n, è kòrò ko à saɔ ka, wò riì goo sapɛ latsigɛ̀ɛ a ci à y'à sàò nìi tsuru.

¹² Tà doùn, ɲe nìì reè tabeu ɲe yè e si xɔbe Kirisà tsɛ, mìn blàbe ɲɛn à nɔɔrɔɔ̀ tsɛ.

¹³ Àwà Kirisà rìì ɲàn sa, ye sààbeen goomaa myɛ̀un, nìi ye tsià Kùnàgoo Dziɔ̀ goomaa. Wò rii sa ɲan kɔn ye ɲɛyna fau, Ŋaablà to yè tàànmàshɛn tsuù ye tsɛ, à re Dzi Fɛnɛɛ tàànmàshɛɛn, à na tɔ̀ niì làyiri seòn.

¹⁴ Tɔ̀ Dzia rìì ɲe re shɛɛ̀n gè jɔun gèè, è kpàdè ci nìì reè bàu Ŋaablà raa, à nà twɛy kùngɔ màbo, yè bà ni blàbe ɲɛn à nɔɔrɔɔ̀ tsɛ.

Pol'lè màfyɛɛ̀n Efɛsì ɲɛynamoo kur'là rè

¹⁵ Tɔ̀ kamà, ye ɲɛɔ̀n Tsìfa Yesù Kirisà rà ɲɛun'n kur'liì rà, ko ye Ŋaablà re mòò rèè sapɛ kɛniɔ̀n kɛ̀nìùn'n kur'liì rà, mun toro jiumaà tɔ̀ goomaa ɲàn,

¹⁶ kudɛyn mun baraka sìan Ŋaablà ra ye kamà, mun taa to yè bà ni ye mà n ne Ŋaabla mafyɛyn nèè doùn.

¹⁷ Mun tɔ̀ faa, gè riì ni à to, mùn Tsìfa Yesù Kirisà rè Ŋaablà, nɔɔrɔɔ̀ Fàà, tɔ̀ yeè akiriblabe sìn ye ra, è bà goo rèè kpàdèe, ye yè dzi Ŋaablà tɔ cɛyn.

¹⁸ Arì she, è vyevyee bo e dusùkuan jaa rèè rè, ye bà ni à tɔ̀, à ye kiriɔ è ɲɛn siɲɛnma gban gban niì tsɛ. À to nà e nɔɔrɔɔ̀ shɛn blà riì sìn ye ra e re mòò rèè ka, ye yè tɔ̀ sa tɔ.

¹⁹ Tà ko, à re dzibaabee blàbee si gereunmaà nìi boò ɲe ɲɛyna moo rèè kàjaa tsɛ, è kòrò à ɲan fàan dzibaabee ŋɔ̀ɔ̀n ka, ye yè tɔ̀ tɔ̀.

²⁰ À tɔ̀ ka faagoò fau Kirisà ɲàn, nìi yɛ à y'à kpunan bo fùn nèè fi, à yè b'a tsùù e sirama si jaa rè jìrànxɔɔ̀ doùn mɔn.

²¹ À tsùuŋ mɔn, è bà ni kùntsììbe reè sapɛ kuùn, fààn reè sapɛ, dzia sapɛ, tsìfàbe reè sapɛ ko tsoo kirikɔɔn reè sapɛ, twɛy tsoo nìì reè ni she, ko waatsi nakɔɔn raa rèè sa.

²² Ɔ̀ɔn, à gè sapɛ wɔu à sàn dzuun, è bà ni goo sapɛ kuùn, à y'à bà ɲɛynamoo kur'là kùntsii.

²³ À gɔɔ̀n, tɔ ɲɛynamoo kur'là rìì, tɔ̀ niì y'à dziitsyɛunmaà a ci à gè sapɛ tsyɛɔ̀n nìi tsuru.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan