Bìoball air-loidhne

Tsìmotè jɔ̀naà 1 - Bible Dzùùngoo Unicode

Sɛbɛɛn kaɔ mòò riì rè, ko dzwɛɛ̀

¹ Mun Polì, Yesù Kirisà rè kɛɛradzian è kòrò mùn Tsibaa Ŋaablà devuà ka, ko Yesù Kirisà, mùn si xɔ tɔ̀ niì tsɛ,

² nèe mun ne sɛbɛn, è sìn wo Tsìmotè rà, mun dzin taki takià, ɲɛynaà baraka rɔ̀n. Arì she, Ŋaablà ɲanwùɔ, ko màtsur'la, ko jaanciàn, Fà Ŋaablà, ko mùn Tsìfa Yesù Kirisà yè twɛy sìn a ra !

Lasɔnmin goòmà ì è ɲɛn kàràn kuntan neè tsɛ

³ Àwà to Efɛsì wɔ̀ rɔ̀n, a ci mun wo màxɔ̀un nìi tsuru mun bèkɔɔn nà Maseduwanin mar'lɔùn. Tà tsuru nìì reè ni mɔn yè bà kàràn kpɛrɛkuru ì sìan mòdzian nà, e dzin twɛy rà ci y'à dzii bà.

⁴ Ci è mà e shi sina cee goòmà ì ko buruju gbaan goòmà ì nà, twɛ̀y nìì rèe nàa sɔ̀swɛy giri ka sani yè Ŋaablà raa goò kuun'n kuru wuu kpadè mòò rà, tɔ̀ niì gbaɔn ɲɛynaà tsɛ.

⁵ Tɔ̀ goo dèumaà kùàn na pɛn waa, à kɛ̀nbààbee rìì, kɛ̀nbààbe riì ni duun fyɛ tsɛ, ko kɛ̀sɛmà wùù, ko ɲɛyna fyɛuma.

⁶ Swey tɔ̀ shia bàjiu, yè e yɛrɛ firi bè gooma dɔntsɔ̀bɛy reè ka.

⁷ È sào ni yè bà Sàrìyà Kaamoo ì, tɔ̀ to y'à tàrà è nìi dèe yè e tsi à tsɛ, è na tɔ̀ fàànmuan.

Sàrìyaa tsùù kuàn

⁸ Sàrìyaa kpɛ̀yn, à goo rèè ye ba faa e fau'n kur'la, m'à tɔ̀ ci à wù.

⁹ Mìn nèe fàànmun: sàrìyaa na tsùuŋnà mòdzin tereonmaà kamà waa fɔ terenbɛy reè, ko mòdzin mabaunma rèè, ko nìì reè na shia Ŋaablà jɔun waa, ko gooɲaan fa reè, ko nìì reè màgoo na ni Ŋaablà ɲan waa, ko Ŋaabla tɔ bɛy reè, ko nìì reè yè e fa vua, nìì reè yè na vua, ko mòdzìn vu reè.

¹⁰ È bà tsùuŋnà kɛ̀kɛ̀ɛ̀y gòò fa reè kamà, ko kpiri ko kpiri gaa reè, ko jòn gɔɔ reè, ko doo de reè, ko nìì reè yè e kɛɛ doò tsɛ, ko goo o goo rìì dzun wɔɔ kàràn takia rà.

¹¹ Tɔ byɛɔ̀n dzwɛɛ̀ tsìfa Ŋaablà re Kùnàgoo Dziɔ̀ nɔɔrɔmaa mà, tɔ̀ niì kɛ̀ɛ̀yfau mun mà.

Polì baraka sìan Ŋaablà ra, è ɲɛn à ɲanwùɔ tsɛ

¹² Mun baraka sìan mùn Tsìfa Yesù Kirisà rà, tɔ̀ niì fààn wɔu mun ɲan. Mun baraka sìan à ra, è ɲɛn à tsɛ à ɲɛun mun na, è mun tsùù e re faagoò tsɛ,

¹³ mun nìi na Tsìfaà tsoobarabaa dan, ɲɛynamoo rèè byɛnbaa ko mòdzin ɲinmataan. Ŋà Ŋaabla màtsuruu mun na, kàtsu mun na tɔ̀ niì faa, mun na à faa tɔ̀bɛ̀ybeè ko ɲɛynabɛybeè doùn.

¹⁴ Mùn Tsìfaà ɲanwùɔ blàbeu mun kàjaa tsɛ fɔ è bè geren, è ɲɛn ɲɛynaà ko kɛ̀nbààbee tsɛ, tɔ̀ niì ni Yesù Kirisà ɲàn.

¹⁵ Nèe gooma, mòo dzia ɲɛn nìi rà, è tsiì à sapɛ ra. Tɔ̀ rii yɛ, ci Yesù Kirisà nàu dziɲantsiɛ doùn, è nà gooɲaan fa reè tsi, min bà è sapɛ jɔna.

¹⁶ Ŋà Ŋaabla màtsuruu mun na, gè riì ni à to mun nìi gooɲaanfabaa jɔ̀naà, Yesù Kirisà yè bà ni e re mɔ̀ɲɔn brisià kpàdè mun kàjaa tsɛ, tɔ̀ yeè dzi ba jaakpadeyra dzyee rèè rè, nìì reè sapɛ nà ɲɛn à ra, yè bà ni jaamabe dziù dòbɛɛ tàrà.

¹⁷ Màsa riì ni tsuù kudɛyn, à na saàn, à na jaà, Ŋaablà soo pee, arì she, blàbee ko nɔɔrɔɔ̀, tɔ̀ yeè ɲɛn à tsɛ, waatsi sen ɲɛn waatsi tsɛ ! Àmiinà !

Polì ci Tsìmotè yè kaa wùɔ fa, è bà ni ɲɛynaà màrà

¹⁸ Mun dzin Tsìmotè, mun nèe goo rèe kɛ̀ɛ̀yfaa wo mà, è kòrò kɛɛrabe goòmà dè dɔ̀unma rèè ka wo tsɛ, wo yè bà ni kaa wùɔ fa, twɛy baraka ɲan.

¹⁹ Tɔ̀ fa, e ɲɛynaà màrà ko kɛ̀sɛmà wùù ka. Swey tɔ̀ akir'là maaŋ, è bà baragoò è mà ɲɛynaà kàjaa tsɛ.

²⁰ Àwà Imɛnɛ̀ ko Alɛkisandziri sa twɛy mòdzin neè sɔn ni, mun to yè è wɔu Sùtana suun, yè bà ni à kàràn ci ye na kakan Ŋaablà tsoo bara dɛ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan

﻿Tsìmotè jɔ̀naà 1 - Bible Dzùùngoo Unicode

Tsìmotè jɔ̀naà 1 - Bible Dzùùngoo Unicode