Korɛntsika reè jɔ̀naà 13 - Bible Dzùùngoo Unicode

Polì nìi deò kɛ̀nbààbee tsɛ

¹ Àwà mun to kɛ̀nsɛɛn ye ba goomaa kungoòmà kpɛrɛ ì ɲàn, adamàdzin mòdzin ì rè gooma, arì mɛ̀rɛ̀kɛ ì rè gooma, kɛ̀nbààbe ma ba ni mun ɲan, mun ko kɛnkɛn benkɔɔn, ko myɛ̀ɛ̀n jaàn kpaakɔɔn sapɛ vu soo.

² Mun to kɛ̀nsɛɛn ye ba dzia kɛɛrabee fa, min bà gòndo reè sapɛ tɔ, twɛ̀ɛ sapɛ yeè bà ni mun ɲan, ɲɛyna yè bà ni mun ɲan arì nìi dzia jèn nèè bo e shɔùn, kɛ̀nbààbe ma ba ni mun ɲan, mun na gèsɔn pɛn waa.

³ Mun to kɛ̀nsɛɛn ye n suun gee sapɛ tanan tanan gbakɔɔn reè rà ɲwɛyn, min n gɔɔ̀n sìn è dzu, kɛ̀nbààbe ma ba ni mun ɲan, mun na gèsɔn wùbee waa.

⁴ Mɔ̀ɲɔn ni kɛ̀nbààbee ɲàn, wùu n'a ɲan, à na mòò jaaɲininbeè, à na e yɛrɛ deè, à to na e yɛrɛblabee.

⁵ Kɛ̀nbààbee na goo nooŋma faa, à to na e yɛrɛ nafa gaa. À na e vununtaà, à to na ɲaan marà toò e duùn.

⁶ À na e taama dzibee terenbɛy goo ra, à raa taamadzibee rìì to yɛ sààbeen.

⁷ È yɛrɛ toò goo sapɛ ra, à ɲɛɛn goo sapɛ ra, à si xɔ goo sapɛ tsɛ à to goo sapɛ tsià e ma.

⁸ Kɛ̀nbààbee fa mɛɛy jà waa. Kɛɛrabe goòmà rèè nà dò, kun kpɛrɛ goòmà rèè dèè dzii yè bà, twɛ̀ɛ yè dò.

⁹ È ɲɛn à tsɛ, mùn twɛ̀ɛ dɛyn nì tɔ̀, ko kɛɛrabe goòmà rèè dɛyn.

¹⁰ Ŋà goo dziitsyɛunmaà ye na waatsi o waatsi, goo dzii tsyɛn bɛɛ sapɛ nà dò.

¹¹ Àwà mun na dziinkòòmɛ̀yn waatsi riì bwèy, mun na goomaa a ci dziinkòòmɛ̀yn, min n kɛsɛɛ̀ a ci dziinkòòmɛ̀yn, min bà goo rèè jàtsi kuàn a ci dziinkòòmɛ̀yn. Ŋà mun nàu n jaara tsii waatsi riì bwèy, mun ne dziinkoomɛynbeè sapɛ dòu.

¹² Dòònuùn, goo rèè ni a ci mìn siɛ̀n dzwàleyn na, è na fyɛɔ waa, ŋà, à nà nà bà jaa ko jaa panparapa. She kpɛ̀yn, dzyee ni mun tɔ̀maà nà ŋe, ŋà mun nà nà à tɔ̀ taki a ci Ŋaabla sa mun tɔ̀ nìi tsuru taki.

¹³ Arì she, nèe gè zhììgi ree ni tsuù: ɲɛynaà, ko sixɔbemaà, ko kɛ̀nbààbee. Ŋà è sapɛ ɲan blàa, tɔ kɛ̀nbààbee rìì.