Bìoball air-loidhne

Korɛntsika reè jɔ̀naà 11 - Bible Dzùùngoo Unicode

¹ Ye bà mun shɔ̀ùnminanbaa ì, a ci mun sa Kirisà shɔ̀ùnminanbaa nìi tsuru.

Polì nìi dèu kpir'la ko taàn raa goò tsɛ ɲɛynamoo kur'là doùn

² Mun tsoo dzi ɲɛɛn ye tsɛ, è ɲɛn à tsɛ, goo gè o ge, ye taa ni mun mà, mun to kàr'nìi sìun ye ra, y'a màraɔ̀ a ci m'a sìun ye ra nìi tsuru.

³ Ŋà mun sào ni ye yè goo soo tɔ, nìi yɛ, ci Kirisà rìì kpir'la sapɛ kuntsii, taàn kùntsiɛ̀ kpir'la, Ŋaablà yeè bà Kirisà kùntsiɛ̀.

⁴ È ɲɛn tɔ̀ tsɛ, kpiri o kpiri Ŋaablà mafyɛ̀ɛn, tàmafa è bà kɛɛrabe faa e kungɔɔ̀ tsyee tsùuŋma ka, tɔ̀ yeè e kuntsiɛ̀ rìì kùngɔ sùùrua.

⁵ Tàan o tàan to Ŋaablà mafyɛ̀ɛn tàmafa è bà kɛɛrabe faa e kungɔɔ̀ dzii tsyee bɛy ka, tɔ̀ yeè e kuntsiɛ̀ rìì kùngɔ sùùrua. Àwà, à ni a ci è kungɔɔ̀ kpaa boo rìì.

⁶ Taàn kùngɔɔ̀ ye ba toò tsyee bɛy, à y'à kpaa bo. Ŋà taàn ye ba à jàa ci kùngɔ̀ tsɛ̀ tsyɛɛ tàmafa à kpaa boò seeyragoo, tà bwèy à y'à tsyee.

⁷ Nìi kpir'la, tɔ̀ na wù è kungɔɔ̀ tsyee waa, kàtsu, à Ŋaablà bosià ko à nɔɔrɔɔ̀ rìì. Taàn, tɔ̀ yeè bà kpir'la nɔɔrɔɔ̀.

⁸ È ɲɛn à tsɛ, kpir'la rìì na bo taàn ɲàn waa, ŋà taàn nì bou kpir'la ɲàn.

⁹ Kpir'la to na ɲɛn taàn kamà waa, ŋà taàn nì ɲɛun kpir'la kamà.

¹⁰ Tɔ̀ kamà, mɛ̀rɛ̀kɛ rèè kamà, à wù gè yè bà ni taàn kùùn, fàan tàànmàshɛn.

¹¹ Tà ko e raà sa, Tsìfaà ɲàn, taàn na ni kpir'la shɔ̀ùn waa, kpir'la tsu to na ni taàn shɔ̀ùn waa.

¹² È ɲɛn à tsɛ, taàn bou kpir'la ɲàn nìi tsuru, kpir'la sa kere boò taàn ɲàn, è sapɛ yeè bà boo Ŋaablà ɲan.

¹³ Ye sa y'a kɛ̀sɛ siin. À dàaŋnà taàn yè Ŋaablà mafyɛ̀n à kùngɔɔ̀ dzii mà bà tsyeeŋna ɔ ?

¹⁴ Goo rèè niu'n kur'la yɛ̀r'la na ye kàr'na ci kpir'la yè kùngwɛ̀yn gbaan to e kuùn, tɔ cèù boo goo ɔ ?

¹⁵ Tɔ̀ to y'à tàrà, kùngwɛ̀yn gbaan, tɔ nɔɔrɔ rìì ɲɛɛn taàn tsɛ, è ɲɛn à tsɛ kùngwɛ̀yn gbaan sìun à ra rii, è bà à kùùn tsyee gè.

¹⁶ Àwà sɔn ye ba e kɛsɛɛ̀ è tɔ̀ goò sɔ̀swɛy fa, ɲe na dɛ̀rɔɔ̀n tɔ̀ ra waa, Ŋaablà re ɲɛynamoo kur'lèè tsu to na dɛ̀rɔɔ̀n tɔ̀ ra waa.

Polì nìi dèu Tsìfaà rè ɲwɛyn goo dèumaà tsɛ
( Matsiyù 26.26-29 ; Marikì 14.22-25 ; Lukì 22.15-20 )

¹⁷ È mun dzii to tɔ̀ shi kpadèkɔɔn reè rà, mun fa dzi ye tsoo dzi kiri waa. È ɲɛn à tsɛ, ye ye e ladzyèè, sani tɔ̀ yeè bà goowùù, tɔ bàa ɲaan ni.

¹⁸ Soore, mun y'à myɛ̀un ci ye ye e ladzyèè ɲɛynamoo kur'là rè làdzyee koùn, ye fi bàa vyɛɔ̀. Kàjaa sɔn tsɛ, mun dzia ɲɛn tɔ̀ ra.

¹⁹ Fɔ ye vu to yè tar'li, ɲɛynamoo dziitsyɛunma rèè yè bà ni kpadè ye fi.

²⁰ Tà doùn, ye ye e ladzyèè, à na baà Tsìfaà rè ɲwɛyn goo dèumaà ɲɔnkɔɔn dɛ waa.

²¹ È ɲɛn à tsɛ, ɲwɛɛ̀n waatsi ye wɔ min niì, ye soo soo sapɛ tabee ye yè e raa ɲwɛyn nèè ɲɔn. Tɔ̀ tsuru swey dzukɔɔn bàa ni, swey to yè e min cɛɔn.

²² Tsii na ni ye re ye yè bà ni ɲwɛyn ɲɔn ye yè mììn fa mɔn gbɛ ? Tàà ye Ŋaablà re ɲɛynamoo kur'là rìì ɲanfyɛnbee, ye yè seey ka gè bɛy reè rà gbɛ ? Mun wù min fee rìì dè ye ra ? Min ye tsoo dzi kir'lì gbɛ ? Tɔ̀ kàjaa tsɛ mun fa ye tsoo dzi kiri waa.

²³ Àwà mun nìi tàrau è bo Tsìfaà rè, min bà à ladziu ye tsɛ, tɔ̀ rii siin: Tsìfa Yesù, à ci e ye wɔ suun fen nìi ɲàn, à buru seun.

²⁴ À re tswɛ̀y siunma shɔ̀ùn Ŋaablà ra, à y'à tara tara, è dzin ci: «Nèe mun gɔɔ̀n rìì yɛ, nìi ye raa. Ye nà tɔ̀ faa, y'a ka e taa to mun ne.»

²⁵ Tɔ̀ fau'n kuru soo rà, fene fɔn'na ɲɔn dòuma shɔ̀ùn, è yukuɔn ko e doùn mììnge sen, è dzin ci: «Nèe yukuun nee mun tsìɛn nì, Ŋaablà ka dzyèèsìbè yee tsìɛn. Ye nà tɔ̀ faa à mìn sapɛ, y'a ka e taa to mun ne.

²⁶ È ɲɛn à tsɛ, ye ye nèe bur'lee ɲɔn waatsi o waatsi, ye yè nèe yukuun nee mììn fa, ye Tsìfaà saàn rìì gooma deè, è bè suu fɔ à nàà dzu.

²⁷ Tɔ̀ kamà, mòò riì nà bur'la ɲɔn, è Tsìfaà rè yukuɔn mììn fa dààbɛ̀yma, tɔ jààki gaaŋ e yɛrɛ kɔ, è ɲɛn Tsìfaà gɔɔ̀n ko à tsìɛn tsɛ.

²⁸ Tà doùn, mòò sɔn sɔɔn sapɛ yeè siin fa e yɛrɛ ɲan, è kòmànà bur'lee ɲɔn, è yukuun nee mììn fa.

²⁹ È ɲɛn à tsɛ, mòò riì bur'la ɲɔɔ̀n è mìɛn fa, à to na Tsìfaà gɔɔ̀n goo rèè tɔ̀ boo e si ɲan waa, tɔ kitsi mɛɛ̀ e yɛrɛ tsɛ ɲwɛyn nèe ko mììn nee yè bà saabu.

³⁰ Tɔ̀ rii kamà ɲìnìnkɔɔn ko fààn bɛɛ giri ye fi, mòò giri sa to yè san.

³¹ Mìn ba na e yɛrɛ ɲansiɛ̀n, kitsi fa ni kunun mùn tsɛ waa.

³² Ŋà Tsìfaà kitsia kùn'na mùn tsɛ rìì, è mùn koron, kitsia mà nà mɛɛy mùn tsɛ ko dziɲaan ka waa.

³³ Tà doùn n neema ì, e ye e ladzyèè ye bà nà ɲwɛɛ̀n ɲɔn, ye e si màshu.

³⁴ Dzu ye ba ni mòò rà, è ɲwɛyn ɲɔn e re tsii, gè riì ni à to e ma nà e ladzyèè ye kitsi mɛɛy e yɛrɛ tsɛ waa. Nìi goo dzyee reè, min na wɔ mɔn, mun nà twɛy jaa bo.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan