ତିତସ୍ 2 - ବ୍ଡ଼୍ ହ୍ର୍ଜା ବାଇବଲସ୍ତ୍ ଶିକ୍ୟା 1 ମ୍ତର୍ ତୀତସ୍ ତୁମି ବିଶ୍ବାସିମ୍ନ୍କେ ସ୍ତ୍ ଶିକ୍ଯାର୍ କ୍ତା କ୍ଉଆ। 2 ବୁଡା ଲକ୍ମ୍ନ୍କେ ଶିକ୍ୟା ଦିଆସ୍ ଯେ, ସେମ୍ନ୍ ନିଜ୍କେ ସ୍ମ୍ବାଳ୍ତି, କାମ୍କିଆଲ୍ ଚାଲିଚଳନ୍ ନ୍କ୍ରି ବ୍ଲ୍ ଚାଲିଚଳ୍ନି କ୍ର୍ତି। ତ୍ବେ ଲକ୍ମ୍ନ୍ ହେଁ ସେମ୍ନ୍କେ ମାନ୍ତି। ସେମ୍ନ୍ ବିଶ୍ବାସେ, ଲାଡେ ଆର୍ ସାସ୍ଦ୍ରି ମ୍ଜ୍ବୁତ୍ ଅଉତ୍, 3 ଆର୍ ବୁଡି ମାଇଜି ମ୍ନ୍କେ ବିନ୍ଲକାର୍ ଲିନ୍ଦା ଆର୍ ମ୍ଦ୍ କାଇ ମାତ୍ଲି ନଇକ୍ରି, ଇଶ୍ଵର୍କେ ସନ୍ମାନ୍ ଦିଲାହର୍ ଚାଲିଚଳନ୍ କ୍ର୍ତାର୍ ଗିନେ ଆର୍ ଜୁଇରି ବ୍ଲ୍ ସେରି କ୍ରୁକେ ବିନ୍ ଲକ୍ମ୍ନ୍କେ ଶିକ୍ୟା ଦେତାର୍ ଗିନେ କ୍ଉଆ। 4 ତ୍ବେ ସେମ୍ନ୍ ଦ୍ଙ୍ଗ୍ଳି ମାଇଜି ମ୍ନ୍କେ ଶିକ୍ୟା ଦେଅତ୍ ଯେ ସେମ୍ନ୍ ନିଜାର୍ ଅଣ୍ଡ୍ରାକେ ଆର୍ ହିଲାମ୍ନ୍କେ ଲାଡ୍ କ୍ରତ୍। 5 ଆର୍ ସେମ୍ନ୍ ପବିତର୍, ନିଜାର୍ ଗ୍ର୍କେ ବ୍ଲ୍କ୍ରି ଜ୍ତୁନ୍ କ୍ରତ୍, ଦ୍ର୍ମ୍ ଆର୍ ନିର୍ମୁଳ୍ ରେଇ ନିଜାର୍ ଅଣ୍ଡ୍ରାର୍ କ୍ତାମାନି ତାର୍ ଅଦିନେ ରେଅତ୍, ତ୍ବେ ଇଶ୍ଵରାର୍ ବାକ୍ଯର୍ ଲିନ୍ଦା ନଇ। 6 ସେନ୍କ୍ରି ବେଣ୍ଡିଆ ମ୍ନ୍କେ କ୍ଉଆ ଯେ ସେମ୍ନ୍ ନିଜ୍କେ ସ୍ମ୍ବାଳି ବୁଦିର୍ ସ୍ଙ୍ଗ୍ ଚାଲି ଚଳ୍ନ୍ କ୍ରତ୍। 7 ତୁମି ସ୍ବୁବ୍ଳ୍ ନିଜାର୍ ଚାଲି ଚଳ୍ନ୍ ବ୍ଲ୍କ୍ରି ଦ୍କାଉଆ ଆର୍ ସ୍ବୁ ବ୍ଲ୍କାମ୍କ୍ରା ତ୍ବେ ସେରି ବିନ୍ଲକ୍ ହେଁ ଶିକ୍ତି। ଅକାର୍ ଆର୍ କାମ୍କିଆଲ୍ ନଅଇ ବ୍ଲ୍ବାବେ ବିଶ୍ବାସିମ୍ନ୍କେ ଇଶ୍ଵରାର୍ ଶିକ୍ୟା ଦିଆସ୍। 8 ଜ୍ନ୍କ୍ରି ତୁମାର୍ ଶିକ୍ୟା ସ୍ତ୍ ଆର୍ ଲିନ୍ଦା ନ୍ଉତାର୍ ଅଉଅ, ତ୍ବେ ତୁମୁକେ ଯୀଶୁ ଖ୍ରୀଷ୍ଟର୍ କାମାର୍ ଗିନେ ବିରଦ୍ କ୍ର୍ତା ଲକ୍ ଲାଜ୍ ହାଉତି, କାଇତାକ୍ ସେମ୍ନ୍ ତୁମାର୍ ବିରୁଦେ କାଇ କ୍ରାପ୍ କ୍ତା କ୍ମ୍ ନାହାର୍ତି। 9 ତୁମାର୍ ମ୍ଣ୍ଡଳିର୍ ଚାକର୍ ମ୍ନ୍କେ ଶିକ୍ୟା ଦିଆସ୍ ଯେ, ସେମ୍ନ୍ ନିଜାର୍ ନିଜାର୍ ମାଲିକ୍ ମ୍ନ୍କାର୍ ଅଦିନେ ରେଇ ତାକାର୍ ଆଦେଶ୍ ମାନତ୍, ଆର୍ ସେମ୍ନ୍ ମାଲିକ୍ ଜୁଇରି କଇଲେକ୍ ହେଁ ଜ୍ବାବ୍ ନ୍ଦିଅତ୍, 10 ମାଲିକାର୍ ଜିନିଷ୍ ଚରି ନ୍କେରତ୍, ମ୍ତର୍ ସେମ୍ନ୍ ଅନ୍କାର୍ ସ୍ବୁକାମ୍ କ୍ରତ୍ ଯେ, ଲକ୍ମ୍ନ୍ ଅମି ଶିକାଉତା ଅମାର୍ ଉଦାର୍କ୍ର୍ତା ଇଶ୍ଵରାର୍ ଶିକ୍ଯାକେ ସନ୍ମାନ୍ ଦେଅତ୍। 11 ଇଶ୍ଵର୍ ସ୍ବୁ ଲକ୍କେ ପାପେହ୍ଣି ଉଦାର୍ କ୍ର୍ତାର୍ ଗିନେ ଇବାଟ୍ ଦେଇ, ନିଜାର୍ ଦୟାକେ ଦ୍କାଇଲା ଆଚେ। 12 ତ୍ବେ ସେ ଆଶିର୍ବାଦ୍ ଇଶ୍ଵର୍କେ ଦୁକ୍ ଦିଲାହ୍ର୍ କାମ୍ ନ୍କ୍ରୁକେ, ଜ୍ଗତାର୍ କ୍ରାପ୍ ବିଷୟ୍ ଇଚା ନ୍କେରୁକେ ଆର୍ ଇ ସଂସାରେ ରେତା ହ୍ତେକ୍ ଇଶ୍ଵର୍କେ ସ୍ର୍ଦା କ୍ଲାହର୍ ଗିଆନ୍, ଦ୍ର୍ମ୍ ଆର୍ ବକ୍ତିର୍ ସ୍ଙ୍ଗ୍ ଚାଲିଚଳନ୍ କ୍ରୁକେ ଅମୁକେ ଶିକ୍ୟା ଦ୍ଇଦ୍। 13 ଅମାର୍ ବ୍ଡ୍ ଇଶ୍ଵର୍ ଆର୍ ଉଦାର୍କ୍ର୍ତା ଯୀଶୁ ଖ୍ରୀଷ୍ଟ ମଇମାର୍ ସ୍ଙ୍ଗ୍ ଆସେଦ୍ ବ୍ଲି, ଅମି ଆଶାକ୍ରିରିଲା ସେ ମହାନ୍ ଦିନାର୍ ଗିନେ ଜାଗି ରେମ୍ନ୍ଦ୍। 14 ସେ ଖ୍ରୀଷ୍ଟ ଯୀଶୁ ଅମୁକେ ସ୍ବୁ ପାପେହ୍ଣି ମୁକ୍ତି କ୍ରୁକେ, ତାର୍ ନିଜାର୍ ଜୀବନ୍କେ ଦିଲା ଆର୍ ଅମୁକ୍ମ୍ନ୍କେ ନିଜାର୍ ଲକାର୍ ହର୍ ପବିତର୍ କ୍ରି ଅନ୍ୟାୟ୍ ଲ୍ଗେ ହ୍ଣି ମୁକ୍ତି କ୍ଲା, ଯାର୍ କି ବ୍ଲ୍କାମ୍ କ୍ରୁକେ ବେସି ଇଚା। 15 ତ୍ବେ ତୀତସ୍, ମୁଇ କଇଲା ଇ ସ୍ବୁକ୍ତା ଅଦିକାର୍ ସ୍ଙ୍ଗ୍ କ୍ରୀତୀଦିପାର୍ ବିଶ୍ବାସିମ୍ନ୍କେ କ୍ଉଆ, ଆର୍ ସେରି ଟିକ୍ବାବେ କ୍ରୁକେ ବୁଜାଉଆ, ଆରେକ୍ ତର୍ ଶିକ୍ଯାକେ ହିନସ୍ତା କ୍ରୁକେ କାକେ ସୁଜଗ୍ ନ୍ଦିଆସ୍। ତ୍ବେ ତ୍କେ ସ୍ବୁଲକ୍ ସନ୍ମାନ୍ ଦେତି। |
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
Beyond Translation