୧ ତେସଲନିକି 1 - ବ୍ଡ଼୍ ହ୍ର୍ଜା ବାଇବଲଅଭିବାଦନ 1 ପାଉଲ୍, ସିଲା ଆର୍ ତୀମଥିର୍ ତ୍ଇହ୍ଣି ଥେସଲନିକିୟ ସ୍ହରାର୍ ମ୍ଣ୍ତଳିଲ୍ଗେ ଇ ଚିଟି ଲେକୁଲୁ, ଜୁଇ ମ୍ଣ୍ତଳି ଉବା ଇଶ୍ଵର୍ ଆର୍ ମାପ୍ରୁ ଯୀଶୁ ଖ୍ରୀଷ୍ଟର୍ ତ୍ଇ ଆଚେ। ମୁଇ ପାର୍ତେନା କ୍ରୁଲେ ତୁମାର୍ମ୍ନ୍କାର୍ ତ୍ଇ ଉବା ଇଶ୍ଵରାର୍ ଦୟା ଆର୍ ଶାନ୍ତି ଅଉଅ। ଥେସଲନିକିୟ ମ୍ନ୍କାର୍ ଜୀବନ୍ ଆର୍ ବିଶ୍ବାସ୍ 2 ପାର୍ତେନା କ୍ଲାବ୍ଳ୍ ଅମୁକେ ସ୍ବୁବ୍ଳ୍ ତୁମାର୍ମ୍ନ୍କାର୍ କ୍ତା ମ୍ନେ ହ୍ଳେଦ୍ ଆର୍ ତୁମାର୍ମ୍ନ୍କାର୍ ହାଇଁ ଇଶ୍ଵର୍କେ ପାର୍ତେନା କ୍ରୁନ୍ଦ୍। 3 ଅମାର୍ମ୍ନ୍କାର୍ ଉବା ଇଶ୍ଵର୍କେ ଅମି ପାର୍ତେନା କ୍ରି ଗ୍ଉଆର୍ଲା ବ୍ଳ୍ ତୁମିମ୍ନ୍ ତୁମାର୍ମ୍ନ୍କାର୍ ବିଶ୍ବାସ୍ ଲାଗି ଜାଇରି କ୍ରିଆଚାସ୍। ଆର୍ ତୁମିମ୍ନ୍ ତୁମାର୍ମ୍ନ୍କାର୍ ଲାଡ୍ ଲାଗି ଜୁଇ କାମ୍କ୍ରି ଆଚାସ୍, ସେତାର୍ଲାଗି ଦନ୍ୟବାଦ୍ ଦିଆସ୍। ମାପ୍ରୁ ଯୀଶୁ ଖ୍ରୀଷ୍ଟର୍ ଆର୍ଗଟ୍ ଆସ୍ତାର୍ ବିଷୟରେ ତୁମାର୍ମ୍ନ୍କାର୍ ବ୍ର୍ସା ଲାଗି ତୁମିମ୍ନ୍ ଡାଟ୍ ଅଇଆଚାସ୍ ବ୍ଲି ଅମି ତାକେ ସ୍ବୁବ୍ଳ୍ ଦନ୍ୟବାଦ୍ କ୍ରୁଲୁ। 4 ଏ ମର୍ ଲ୍ଡାର୍ ବାଇ ଆର୍ ବେଣିମ୍ନ୍ ଇଶ୍ଵର୍ ତୁମୁକ୍ ଲାଡ୍ କ୍ରେଦ୍। ଅମି ଇରିହେଁ ଜାଣୁ ଯେ, ସେ ତୁମୁକ୍ମ୍ନ୍ ନିଜାର୍ ବ୍ଲି ବାଚିଆଚେ। 5 ଅମି ତୁମୁକ୍ମ୍ନ୍କେ ଯୀଶୁର୍ ବିଷୟେ ସୁବ୍କ୍ବର୍ କଇଆଚୁ, ମ୍ତର୍ ଅମି କେବଳ୍ ଶ୍ବ୍ଦ ବ୍ଯବହାର୍ ନ୍କେରୁ। ସେ ସୁବ୍କ୍ବର୍ ଅମି ଶ୍କ୍ତି ଆର୍ ପବିତର୍ ଆତ୍ମା ସ୍ଙ୍ଗ୍ ଆଣି ଆଚୁ। ଅମି ଜ୍ନ୍କ୍ଲେକ୍ ହେଁ ଜାଣିଆଚୁ ଯେ ସେରି ସ୍ତ୍। ତୁମିମ୍ନ୍ ଜାଣିଆଚାସ୍ ଯେ, ଅମି ତୁମାର୍ମ୍ନ୍କାର୍ ସ୍ଙ୍ଗ୍ ରିଲାବ୍ଳ୍ କ୍ନ୍କ୍ରି ଜୀବନ୍ ବିତାଉତି ରିଲୁ। ସେନ୍କ୍ରି ଜୀବନ୍ ବିତାମ୍କେ ତୁମୁକ୍ମ୍ନ୍ ସାଇଜ କ୍ରୁକେ ମ୍ନ୍ରିଲି। 6 ଅବେ ତୁମିମ୍ନ୍ ହେଁ ଅମାର୍ ହର୍ ଅଇଆଚାସ୍, ଅଦିକ୍ କ୍ଷ୍ଟ ହାଇଲା ହ୍ଚେ ହେଁ ତୁମିମ୍ନ୍ ସେ ଶିକ୍ଯାକେ ସ୍ର୍ଦା ସ୍ଙ୍ଗ୍ ମାନି ଆଚାସ୍, ପବିତର୍ ଆତ୍ମା ତୁମୁକ୍ମ୍ନ୍ ଇ ସ୍ର୍ଦା ଦ୍ଇଆଚେ, 7 ମାକିଦନିଆ ସ୍ହର୍ ଆର୍ ଆଖାୟା ଜିଲାର୍ ବିଶ୍ବାସି ଲକ୍ମ୍ନ୍କାର୍ ହାଇଁ ତୁମିମ୍ନ୍ ଇଶ୍ଵର୍କେ ଡାଟ୍କ୍ରି ବିଶ୍ବାସ୍ କ୍ର୍ତା ଲକ୍ ଅଇ, ଉଦାହରଣ୍ ହ୍ର୍ ଅଇରିଲାସ୍। 8 ମାକିଦନିଆ ସ୍ହର୍ ଆର୍ ଆଖାୟା ଜିଲାର୍ ତୁମାର୍ମ୍ନ୍କାର୍ ଦ୍ଇ ମାପ୍ରୁର୍ ଶିକ୍ୟା ସ୍ବୁବାଟ୍ ବିଚି ଅଇରିଲି। ସ୍ବୁ ଜାଗାଇ ଇଶ୍ଵର୍ ତ୍ଇ ତୁମାର୍ ବିଶ୍ବାସ୍ ଚିନାଇ ଅଇରିଲି ଆର୍ ତ୍ବେ ତୁମାର୍ମ୍ନ୍କାର୍ ବିଷୟରେ ମର୍ କାଇରି କ୍ଉତା ଦ୍ର୍କାର୍ ନାଇ। 9 ଅମି ତୁମାର୍ ମ୍ନ୍ ସ୍ଙ୍ଗ୍ ରିଲାବ୍ଳ୍ ଜ୍ନ୍କ୍ରି ବ୍ଲ୍ବାବେ ତୁମିମ୍ନ୍ ଅମୁକ୍ମ୍ନ୍କେ ମାନିରିଲାସ୍ ସେ ବିଷଇ ସ୍ବୁ ଲକ୍ମ୍ନ୍ କ୍ତାବାର୍ତା ଅମ୍ଲାଇ। ତୁମିମ୍ନ୍ କ୍ନ୍କ୍ରି ମୁର୍ତି ହୁଜା ବ୍ନ୍ଦ୍କ୍ରି ଜୀବନ୍ ଆର୍ ସ୍ତ୍ ଇଶ୍ଵରାର୍ ସେବା କ୍ରୁକେ ମ୍ନ୍ ବାଦ୍ଲାଇଲାସ୍ ସେ ବିଷୟେ ସେମ୍ନ୍ କ୍ଉତି। 10 ତୁମିମ୍ନ୍ ଇଶ୍ଵରାର୍ ହଇସି ସ୍ର୍ଗ୍ ଉହ୍ରେ ହ୍ଣି ଆସ୍ତା ସ୍ମୟ୍କେ ଜାଗି କ୍ରି ମୁର୍ତି ହୁଜା ବ୍ନ୍ଦ୍ କ୍ରିରିଲାସ୍, ଇଶ୍ଵର୍ ତାର୍ ହଇସି ଯୀଶୁକେ ମ୍ଲାଲକ୍କେ ଉଟାଇଆଚେ, ଇଶ୍ଵରାର୍ ଆସ୍ତା ରିସାର୍ ବିଚାର୍ ତ୍ଇହ୍ଣି ଯୀଶୁ ଅମୁକେ ର୍କିଆ କ୍ରେଦ୍। |
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
Beyond Translation