Yo 9 - Sơ̆p Hlabơar Nơ̆r 'Bok Kei-Dei

¹ Kơplah Yêsu oei năm rok trong, Sư 'bôh minh 'nu bơngai măt tol đơ̆ng mĕ Sư tơpŭ sơ̆.

² Na lu bơngai pơhrăm păng Sư khan kơ Sư thoi âu: “Ơ 'Bok Thây, bơngai âu măt tol đơ̆ng mĕ sư tơpŭ sơ̆, na yua kơ kiơ? Yua kơ sư kơdih pơm yoch dah yua kơ mĕ 'bă sư pơm yoch?”

³ Yêsu khan: “Sư măt tol ưh kơ sĭ yua kơ đơ̆ng sư pơm yoch, dah đơ̆ng mĕ 'bă sư pơm yoch ôh. Sư măt tol yua kơ 'Bok Kei-Dei wă tơ'bôh kơ đe tơdrong mơsêh mơyang Sư wă pơklaih bơngai âu.

⁴ “Dang ei oei 'năr, na bơ̆n athei jang tơdrong 'Bă Inh mă wơh Inh. Dah 'năr mơ̆t boih, ưh kơ đei bu gơh jang dơ̆ng.

⁵ Kơplah Inh oei ala teh âu Inh dang măt 'năr pơchrang hơdah tơ teh âu wă kơ kon bơngai băt tơdrong 'Bok Kei-Dei.”

⁶ Klaih kơ noh Yêsu kơsoh đak hai tơ teh, hơwơ̆r đak hai păng teh hơdai. Klaih kơ noh na Sư pik tơ măt bơngai măt tol.

⁷ Na Yêsu khan kơ sư: “Năm bĕ ih, năm 'nhao măt ih tơ đak dơnâu mă đe anăn dơnâu Silôm.” (Silôm wă khan đak klang đơ̆ng nai ro tơ dơnâu Silôm.) Na sư năm 'nhao hloi tơ đak dơnâu ei. Klaih kơ noh sư brŏk tơ hnam sư kơdih, sư gơh 'bôh hơdah boih.

⁸ Lu buăl sư păng lu bơngai juăt 'bôh sư pơm ăn-mai krô hmă jet thoi âu: “Bơngai âu sơ̆ sư pơm ăn-mai iih?”

⁹ Đei buăl mơ'nah khan: “Jơ̆ sư âu tơpă.” Buăl mơ'nah khan dơ̆ng: “Ưh kơ sĭ sư âu ôh, hơbŏ sư âu đĕch thoi sư.” Mă-lei bơngai đêl măt tol ei khan kơ lu sư: “Trŏ kơ inh âu boih măt tol pơm ăn-mai sơ̆.”

¹⁰ Na lu đe ei jet sư: “Lei lơliơ ih gơh 'bôh hơdah boih?”

¹¹ Sư khan: “Bơngai mă đe anăn Yêsu, Sư kơsoh đak hai tơ teh, hơwơ̆r đak hai păng teh hơdai; klaih kơ noh pik kơ măt inh. Na Sư khan kơ inh: ‘Năm bĕ ih, năm 'nhao măt ih tơ đak dơnâu Silôm.’ Na inh năm 'nhao măt inh tơ đak ei na măt inh 'bôh hơdah hloi.”

¹² Lu sư jet dơ̆ng: “Lei 'Bok ei tơ yơ dang ei?” Bơngai đêl măt tol ei khan: “Inh ưh kơ băt Sư tơ yơ.”

Đe Pharisi tơlang bơngai đêl măt tol

¹³ Na lu sư anhăk ba bơngai đêl măt tol ei tơ lu bơngai Pharisi,

¹⁴ kơlih kơ năr noh năr pơdơh Sa'bat, na Yêsu pơklaih minh 'nu bơngai măt tol.

¹⁵ Lu bơngai Pharisi jet sư: “Thoi yơ ih gơh 'bôh hơdah boih?” Sư khan: “Kơlih kơ 'Bok ei kơsoh đak hai tơ teh pik kơ măt inh, na inh năm 'nhao tơ đak gơh 'bôh hơdah hloi.”

¹⁶ Lu bơngai Pharisi mơ'nah khan: “Bơngai pơm thoi noh Sư ưh kơ sĭ lĕch đơ̆ng 'Bok Kei-Dei ôh, yua kơ Sư ưh kơ răk năr pơdơh Sa'bat.” Lu mơ'nah khan dơ̆ng: “Yah lei, bơngai yoch ưh kơ gơh pơm tơdrong mơsêh mơyang thoi Sư noh ôh.” Thoi noh na lu sư tơklah băl đon gah tơdrong Yêsu.

¹⁷ Lu sư jet dơ̆ng bơngai đêl măt tol ei: “'Bok ei, ih khan Sư pơklaih măt ih 'bôh hơdah, na ih anăn Sư 'Bok kiơ ei?” Na bơngai măt tol ei khan: “Inh anăn Sư 'Bok pơtruh nơ̆r 'Bok Kei-Dei tơpă 'noh.”

Đe Juđê jet mĕ 'bă bơngai đêl măt tol

¹⁸ Lu bơngai Juđê ưh kơ lui kơ bơngai noh đơ̆ng măt tol sơ̆ na 'nao klaih dang ei. Na lu sư năm krao mĕ 'bă bơngai đêl măt tol ei năm tơ lu sư.

¹⁹ Na lu sư jet: “Bơngai âu hăm trŏ kơ kon biĕm? Đơ̆ng tơpŭ kơ sư sơ̆ sư hăm măt tol ưh? Păng thoi yơ sư gơh 'bôh hơdah dang ei?”

²⁰ Mĕ 'bă sư khan: “Nhi băt kơ sư âu kon nhi tơpă; păng nhi băt kơ sư măt tol đơ̆ng nge.

²¹ Mă-lei nhi ưh kơ băt yua kơ kiơ măt sư klaih boih âu păng nhi ưh kơ băt bu pơklaih măt sư âu. Iĕm jet lăng sư bĕ, sư kư̆m bơngai kră gơh tơl iĕm mơ̆n.”

²² Mĕ 'bă sư ưh kơ wă khan Yêsu pơklaih sư yua kơ sư hli kơ lu bơngai Juđê. Lu bơngai Juđê khan bơngai bu khan Yêsu 'Bok Krist mă 'Bok Kei-Dei wơh wă pơgơ̆r kon bơngai, bơngai 'noh lu sư ưh kơ ăn năm mơ̆t akŭm tơ hnam 'Bok Kei-Dei.

²³ Kơlih kơ thoi noh na mĕ 'bă sư khan: “Sư kư̆m bơngai 'lŏ kră gơh tơl iĕm mơ̆n, na apinh iĕm jet sư bĕ.”

²⁴ Na lu sư krao bơngai đêl măt tol ei minh 'măng dơ̆ng na jet sư: “Ih bơnê kơ 'Bok Kei-Dei đĕch hŏ măt ih gơh 'bôh hơdah boih. Gah nhôn băt kơ Yêsu bơngai yoch tơpă.”

²⁵ Na bơngai đêl măt tol ei khan kơ lu sư: “Inh ưh kơ băt Sư bơngai yoch dah ưh. Pôm tơdrong âu inh băt: Inh băt tơdra kơ inh bơngai măt tol sơ̆ mă-lei đơ̆ng Sư pơklaih inh âu, na dang ei inh gơh 'bôh hơdah hloi tơpă.”

²⁶ Lu sư jet dơ̆ng: “Sư pơm kiơ kơ ih? Sư pơm kơ ih gơh 'bôh hơdah thoi yơ?”

²⁷ Na bơngai 'nao klaih kơ măt tol ei khan: “Inh roi kơ iĕm boih, mă-lei iĕm ưh kơ lui. Kơlih kơ kiơ iĕm wă kơ inh roi dơ̆ng? Iĕm wă lui kơ Sư mơ̆n dah kiơ?”

²⁸ Kơlih kơ sư khan thoi noh, na lu sư hil tơpă păng khan: “Ih 'maih lui lăi kơ Sư. Nhôn ưh kơ lui ôh. Nhôn lui kơ Môis đĕch.

²⁹ Nhôn băt 'Bok Kei-Dei pơma păng Môis tơpă. Mă-lei bơngai noh nhôn ưh kơ băt Sư bơngai đơ̆ng yơ.”

³⁰ Bơngai đêl măt tol ei khan dơ̆ng: “Inh mah chrêu kơ đon tơpă! Sư pơklaih măt inh mah 'bôh hơdah boih, mă-lei iĕm khan ưh kơ băt Sư bơngai đơ̆ng yơ.

³¹ Dah Sư bơngai yoch, 'Bok Kei-Dei ưh kơ ăn Sư pơm tơdrong mơsêh mơyang ôh, yua kơ bơ̆n băt 'Bok Kei-Dei ưh kơ wă mơ̆ng lu bơngai yoch ôh. Sư mơ̆ng dôm lu bơngai mă lui kơ Sư.

³² Đơ̆ng blŭng-a sơ̆ 'Bok Kei-Dei pơjing plĕnh păng teh ưh tam đei bu gơh pơklaih bơngai măt tol đơ̆ng nge mĕ sư tơpŭ sơ̆ mă gơh 'bôh hơdah dơ̆ng.

³³ Tơdah 'Bok noh ưh kơ lĕch đơ̆ng 'Bok Kei-Dei, lei Sư ưh kơ gơh pơm tơdrong mơsêh mơyang kiơ ôh.”

³⁴ Lu sư khan: “Ih măt tol đơ̆ng 'nao tơpŭ kơ ih sơ̆ kơlih kơ tơdrong yoch, na liơ ih wă bơtho lu nhôn dơ̆ng?” Lu sư pơpuh tơlĕch hloi bơngai ei tơ 'ngoaih.

Bơngai klaih kơ măt tol lui kơ Yêsu

³⁵ Yêsu kơtơ̆ng ang lu sư pơpuh bơngai ei, na Yêsu năm chă sư dơ̆ng. Lăp 'bôh boih na Sư jet bơngai ei: “Ih hăm wă lui kơ Kon 'Bok Kei-Dei?”

³⁶ Na bơngai đêl măt tol ei khan kơ Sư: “Ơ 'Bok, anăn Sư bu ei? Ih roi kơ inh wă kơ inh lui kơ Sư.”

³⁷ Yêsu khan kơ sư: “Ih 'bôh Sư boih, Sư mă pơma dơnuh păng ih dang ei.”

³⁸ Na bơngai 'nao klaih măt tol ei hloi sơtơ̆p kŭl-tăng 'bơ̆t anăp Yêsu păng khan: “Ơ 'Bok, inh lui kơ Ih.”

³⁹ Yêsu khan: “Inh jur tơ ala teh âu wă sek tơlang kon bơngai wă kơ dôm lu bơngai ưh kơ hlôh tơdrong 'Bok Kei-Dei, lu sư dang măt tol, gô hlôh; păng dôm lu bơngai khan sư hlôh mă-lei ưh kơ lui kơ Inh, na ăn lu sư jing ưh kơ hlôh dơ̆ng. Lu bơngai ei boih dang măt tol tơpă.”

⁴⁰ Na lu bơngai Pharisi mơ'nah oei dơ̆ng jê̆ 'bơ̆t Yêsu, lu sư kơtơ̆ng thoi noh na khan: “Lu nhôn măt tol mơ̆n hă?”

⁴¹ Yêsu khan kơ lu sư: “Dah iĕm ưh kơ hlôh tơdrong 'Bok Kei-Dei lei Inh ưh kơ jô̆ kơ iĕm yoch ôh. Sơmă iĕm khan iĕm hlôh tơdrong 'Bok Kei-Dei, mă-lei iĕm ưh kơ wă lui kơ Inh, iĕm pơm thoi noh yoch boih.”