Yo 20 - Sơ̆p Hlabơar Nơ̆r 'Bok Kei-Dei

¹ Tơ pơgê hrôih năr mă mônh lăm giĕng, oei măng mu, Mari Pơlei Mađơla năm tơ bơsat Yêsu. Truh tơ bơsat sư 'bôh tơmo tơgrŏl lê̆ boih đơ̆ng 'măng bơsat.

² Thoi noh sư kơdâu năm tơ Pêtrôs hăm bơngai pơhrăm nai dơ̆ng, bơngai mă Yêsu 'mêm păng sư akhan thoi âu: “Yŏng bơ̆n Yêsu, đe iŏk tơ nai boih, mă-lei nhôn ưh kơ băt đe 'măn Sư tơ yơ ôh.”

³ Thoi noh Pêtrôs hăm bơngai pơhrăm ei kơdâu năm tơ bơsat mơ̆n.

⁴ Bơngai pơhrăm nai ei kơdâu ploi kơ Pêtrôs, truh tơ bơsat hơdrol.

⁵ Sư kŭp nger lăng tơ lăm bơsat, sư 'bôh che kok lăm bơsat ei, mă-lei sư ưh kơ mơ̆t tơ noh ôh.

⁶ Pêtrôs truh boih, sư mơ̆t hloi lăm bơsat, sư 'bôh che đêl đe asu kơ Yêsu oei 'bơ̆t ei.

⁷ Che đêl đe gom kơ̆l Yêsu 'noh chơ̆p lê̆ tơ anih kơdih.

⁸ Thoi noh bơngai pơhrăm mă truh hơdrol 'noh kư̆m mơ̆t tơ lăm bơsat, sư 'bôh na sư lui kơ Yêsu iung arih boih.

⁹ Đơ̆ng sơ̆ lu sư ưh kơ hlôh kơ tơdrong mă sơ̆p hla bơar 'Bok Kei-Dei khan lê̆ hơdrol gah Yêsu gô iung arih đơ̆ng lôch.

¹⁰ Thoi noh na 'bar 'nu bơngai pơhrăm păng Yêsu 'noh wih tơ hnam sư kơdih.

Mari Mađơla 'bôh Yêsu

¹¹ Mari dơ̆ng hmoi tơ 'ngoaih bơsat, sư hmoi rah păng kŭp nger tơ lăm bơsat.

¹² Sư 'bôh 'bar 'nu linh jang 'lơ̆ng 'Bok Kei-Dei hrŭk ao kok tơoei 'bơ̆t anih mă đêl đe tơ'bĭch atâu Yêsu, minh 'nu 'bơ̆t jơ̆ng, minh 'nu 'bơ̆t kơ̆l.

¹³ Bre sư jet Mari thoi âu: “Ih hmoi kơ kiơ?” Mari khan: “Đe iŏk atâu Yŏng inh, thoi noh inh ưh kơ băt đe lê̆ Sư tơ yơ ôh.”

¹⁴ Lăp sư pơma thoi noh sư hue lăng tơ rŏng, sư 'bôh Yêsu dơ̆ng tơ noh, mă-lei sư ưh kơ băt bơngai 'noh Yêsu ôh.

¹⁵ Yêsu khan kơ Mari: “Ih hmoi kơ kiơ, ih chă bu?” Mari ngêh kơ Yêsu 'noh bơngai wei pơgar, na sư khan: “Ơ 'bok, tơdah ih đei iŏk atâu Sư, apinh ih roi kơ inh ih lê̆ tơ yơ, wă kơ inh năm iŏk Sư.”

¹⁶ Klaih kơ noh Yêsu khan kơ sư dơ̆ng: “Ơ Mari.” Mari hue 'bôh hloi păng khan hăm nơ̆r Juđê: “Rabôni.” Rabôni wă khan 'bok thây.

¹⁷ Thoi noh Yêsu khan: “Ih 'nĕ kơ rôp Inh, yua kơ Inh ưh tam mă tŏk wih tơ 'Bă Inh. Ih năm khan kơ lu 'nhŏng oh Inh wă kơ sư băt kơ Inh wă tŏk wih tơ 'Bă Inh, Sư kư̆m 'Bă lu iĕm mơ̆n; tơ Kră Yang Inh, Sư kư̆m Kră Yang iĕm mơ̆n.”

¹⁸ Thoi noh Mari, Pơlei Mađơla, năm khan kơ lu bơngai pơhrăm thoi âu: “Inh 'bôh boih Kră Yang bơ̆n Yêsu.” Păng sư roi tơdrong đêl Yêsu pơkă kơ sư.

Lu bơngai pơhrăm 'bôh Yêsu

¹⁹ Hơdrơ̆m kơsơ̆ năr mă mônh lăm giĕng ei, lu bơngai pơhrăm păng Yêsu oei hơdai lăm hnam, 'măng chơkăl lê̆ ngăl yua kơ lu sư hli kơ khŭl Juđê. Thoi noh Yêsu mơ̆t dơ̆ng 'bơ̆t tŏk-bŏk lu đe ei păng khan: “Oei hiôk bĕ lu iĕm.”

²⁰ Đơ̆ng rŏng kơ pơma thoi noh, Yêsu tơ'bôh ti păng rơhiĕo Sư kơ lu đe noh. Lu bơngai pơhrăm 'bôh Kră Yang Yêsu, lu sư chhơp tơpă.

²¹ Thoi noh Yêsu khan kơ lu sư dơ̆ng: “Oei hiôk bĕ lu iĕm. Thoi lĕ kơ đêl 'Bă Inh wơh Inh, 'noh Inh kư̆m wơh iĕm mơ̆n.”

²² Đang kơ Sư pơma thoi noh, Yêsu dơhlu hơyuh mơsêh kơ lu bơngai pơhrăm păng akhan: “Sơng iŏk Yang Bơhngol 'Lơ̆ng bĕ.

²³ Dah lu iĕm mơnat ăn tơdrong yoch đe, lei 'Bok Kei-Dei kư̆m mơnat ăn kơ lu đe ei mơ̆n. Dah iĕm ưh kơ mơnat ăn tơdrong yoch đe, lei 'Bok Kei-Dei kư̆m ưh kơ mơnat ăn kơ lu bơngai ei.”

Yêsu hăm Thôm

²⁴ Minh 'nu bơngai pơhrăm, anăn sư Thôm, đe krao sư Kon Kơmar sư ưh kơ đei tơ lăm noh mă lăm năr Yêsu truh tơ ei.

²⁵ Thoi noh lu bơngai pơhrăm nai khan kơ Thôm: “Nhôn 'bôh boih Kră Yang bơ̆n Yêsu.” Mă-lei Thôm khan: “Dah inh ưh kơ 'bôh đêl rơka kơđĭnh tơ ti Sư, dah inh ưh kơ tŏt hơnglâu ti inh tơ đêl rơka noh, hăm ti inh ưh kơ tŏt tơ rơhiĕo Sư, lei inh ưh kơ lui.”

²⁶ Minh 'măng giĕng đơ̆ng rŏng kơ năr 'noh, lu bơngai pơhrăm păng Yêsu năm akŭm lăm hnam dơ̆ng. Thôm sư kư̆m akŭm hơdai mơ̆n. 'Măng hnam oei chơkăl lê̆, mă-lei Yêsu dơ̆ng 'bơ̆t tŏk-bŏk lu sư păng khan: “Oei hiôk bĕ lu iĕm.”

²⁷ Păng Sư khan kơ Thôm: “Pel ti ih 'bơ̆t âu, lăng ti Inh păng chro ti ih tŏt 'bơ̆t rơhiĕo Inh. Ih 'nĕ pă sơngah, athei ih lui bĕ.”

²⁸ Klaih kơ noh Thôm khan: “Ơ Kră Yang inh, 'Bok Kei-Dei.”

²⁹ Mă-lei Yêsu khan kơ sư: “Ih 'bôh Inh boih, thoi noh ih lui. Lu bơngai bu mă ưh kơ 'bôh Inh, mă-lei sư lui, 'noh hiôk tơpă kơ lu sư.”

Chih hla bơar 'nâu wă pơm kiơ?

³⁰ 'Bơ̆t anăp lu bơngai pơhrăm păng Sư, Yêsu đei pơm lơ tơdrong mơsêh mơyang nai mă ưh kơ đei chih lăm hla bơar âu.

³¹ Lu tơdrong chih lăm hla bơar 'nâu wă kơ lu iĕm lui kơ Yêsu Krist, Sư 'Bok Dŏng Pơklaih bơ̆n, Sư Kon 'Bok Kei-Dei. Dah lu iĕm lui lei lu iĕm gơh arih ling-lang yua kơ Sư.