Yo 2 - Sơ̆p Hlabơar Nơ̆r 'Bok Kei-Dei

¹ Truh 'bar năr đơ̆ng rŏng đe pơkong tơ Pơlei Kanna, dêh Galilê. Mĕ Yêsu đei năm hơpong tơ noh.

² Đe kư̆m wơ̆n Yêsu păng lu bơngai pơhrăm păng Sư năm mơ̆n.

³ Kơplah lu sư oei et sa, sik lu sư ưh kơ mah, na mĕ Yêsu khan kơ Yêsu: “Sik đe âu ưh kơ mah.”

⁴ Na Yêsu khan kơ sư: “Ơ duch, ih mah hăt kơ kiơ, yua kơ tam mă trŏ jơ Inh wă tơgŭm lu sư?”

⁵ Mĕ Sư kơtơ̆ng thoi noh boih, na sư năm khan kơ lu bơngai awih: “Iĕm jang kiơ̆ kơ Sư athei hŏ.”

⁶ Lăm hnam ei đei tơdrâu tŏ ge mong đak. Lu bơngai Juđê juăt iŏk đak đơ̆ng ge ei hơrao jơ̆ng ti kiơ̆ kơ tơdrong juăt lu sư. Rim tŏ ge ei gơh mong đak dang pơđăm gŏ 'bei.

⁷ Yêsu khan kơ lu bơngai awih lăm hnam ei khan: “Iĕm tuh đak 'bĕnh tôm kơ ge âu.” Na lu bơngai awih ei tuh đak 'bĕnh tôm kơ 'bơ̆r ge ei hloi.

⁸ Yêsu khan dơ̆ng kơ lu đe awih ei: “Iĕm tring đak âu năm ăn kơ bơngai kơdranh mă wei-lăng sa et.” Na đe năm ba đak ei truh tơ bơngai kơdranh mă wei-lăng ei boih.

⁹ Na đak ei jing hloi sik. Bơngai kơdranh ei et sik noh 'lơ̆ng tơpă mă-lei sư ưh kơ băt sik 'noh đơ̆ng yơ. Lu bơngai awih đĕch băt. Na bơngai kơdranh mă wei-lăng ei krao bơngai mă iŏk akăn păng khan:

¹⁰ “Mă rim đe et sa tih, ling-lang đe ăn kơ tơmoi sik 'băt ngăl hơdrol na sik sap đơ̆ng rŏng. Na âu ăn kơ đe et sik 'băt đơ̆ng rŏng.”

¹¹ Tơdrong mơsêh mơyang âu boih Yêsu pơm tơ'bôh kơ đe mă hơdrol. Sư pơm tơ Pơlei Kanna, dêh Galilê. Thoi noh boih na lu bơngai pơhrăm păng Sư lui kơ Sư đơ̆ng 'Bok Kei-Dei tơpă.

¹² Đơ̆ng noh mĕ Sư păng lu bơngai pơhrăm păng Sư, yak hơdai Sư đơ̆ng noh năm tơ Pơlei Kapernum. Lu sư oei tơ Pơlei Kapernum noh ưh kơ đunh mơ̆n.

Yêsu pơpuh đe mơdro đơ̆ng hnam 'Bok Kei-Dei

¹³ Hơtai ei wă jê̆ truh năr đe pơm Giĕng Năm Brih, na Yêsu năm tơ Pơlei Jêrusalem.

¹⁴ Sư 'bôh đe mơdro lăm hnam akŭm 'Bok Kei-Dei tơm, mơ'nah tĕch rơmo, mơ'nah tĕch triu. Đei mơ'nah tĕch sem kơtơp, kư̆m đei mơ'nah oei tơplih băl jên ră.

¹⁵ Na Yêsu iŏk tơlei pơm sơnguĕt pơpuh tơlĕch đĭ-đăng bơngai mơdro păng lu rơmo, triu lu sư đơ̆ng lăm hnam akŭm ei. Klaih kơ noh Sư săi tŭk jên lu đe ei oei tơplih ră păng tơlơ̆ tơpơ̆k lu gơ'bang sư.

¹⁶ Đơ̆ng noh na Sư khan kơ lu bơngai mơdro sem kơtơp: “Anhăk ba đĭ sem kơtơp iĕm âu tơ nai. Iĕm 'nĕ pă pơm kơ hnam 'Bă Inh thoi lĕ kơ hnam mơdro mơchan.”

¹⁷ Lu bơngai pơhrăm păng Sư kơtơ̆ng Sư pơma thoi noh lu sư 'blŏk kơ tơdrong đe chih khan lê̆ hơdrol lăm sơ̆p hla bơar 'Bok Kei-Dei thoi âu: “Tơdrong hưch hanh kơ hnam Ih dang luăn sa inh.”

¹⁸ Lu bơngai Juđê khan kơ Yêsu: “Ih pơm kơ nhôn mơsêh mơyang Ih bĕ, lei na nhôn lui kơ 'Bok Kei-Dei Sư ăn kơ Ih pơpuh lu đe âu đơ̆ng hnam akŭm âu.”

¹⁹ Yêsu khan hloi kơ lu sư thoi âu: “Lei iĕm jah yuih hnam akŭm âu bĕ na Inh gô pơm ming kơtĕch pêng năr keh hloi.”

²⁰ Lu bơngai Juđê khan: “Thoi yơ Ih kĕ? Đe jang pơm hnam âu sơ̆ puăn-jĭt tơdrâu sơnăm 'mơ̆i na gơh keh; na Ih khan kơtĕch pêng năr đĕch keh hloi.”

²¹ Mă-lei Yêsu jô̆ tơdrong 'noh, Sư pơma gah akâu Sư kơdih lôch iung arih kơtĕch pêng năr đĕch, ưh kơ sĭ pơma gah hnam akŭm tơpă ôh.

²² Thoi noh boih na lăp Yêsu iung arih đơ̆ng lôch, na lu jơ̆ng 'bang Sư 'blŏk hơdơ̆r gah tơdrong Yêsu pơma pơjuang kơ lu bơngai Juđê noh. Lu sư kư̆m lui kơ sơ̆p hla bơar 'Bok Kei-Dei chih khan lê̆ hơdrol, mă Yêsu kư̆m pơma gah akâu Sư kơdih gô iung arih đơ̆ng lôch.

Yêsu băt rim 'nu kơ bơngai

²³ Kơplah Yêsu oei tơ Pơlei Jêrusalem lăm năr đe pơm Giĕng Năm Brih, na Sư tơ'bôh kơ đe tơdrong mơsêh mơyang Sư. Na đei lơ bơngai lui kơ Sư.

²⁴ Mă-lei Yêsu băt kơ đe ưh kơ lui tơpă ôh,

²⁵ yua kơ Sư băt rim 'nu lăm jơhngơ̆m kon bơngai lăm to sư thoi yơ. Na Sư huay kơ kăl kơ đe roi ăn kơ Sư bơngai âu thoi yơ, bơngai 'noh thoi yơ ôh.