Yo 18 - Sơ̆p Hlabơar Nơ̆r 'Bok Kei-Dei

¹ Yêsu krao khan đang boih, na Sư hăm lu bơngai pơhrăm păng Sư weh đơ̆ng ei na yak hlôi kơ thong đak Kidrôn. Tơ noh đei minh hlak pơgar na lu sư mơ̆t lăm ei.

² Juđa, bơngai plơ̆ plĕch kơ Yêsu, băt kơ anih noh boih kơlih kơ đêl lu sư juăt kơ akŭm tơ ei.

³ Thoi noh Juđa năm krao iŏk lu linh Rôm păng lu linh Juđê mă gak hnam akŭm tơm mă đêl lu 'bok soi tih hăm lu khŭl Pharisi pơkă ăn kơ lu sư. Lu sư tơ̆k ŭnh, chĕp đao, hơlă, hră, năm tơ pơgar ei.

⁴ Yêsu băt boih tơdrong wă truh kơ Sư, mă-lei Sư năm găn anăp lu đe ei păng jet: “Lu iĕm chă bu?”

⁵ Na lu đe ei khan: “Nhôn chă Yêsu, Pơlei Nasaret.” Yêsu khan: “Inh boih Yêsu.” Juđa, bơngai plơ̆ plĕch kơ Yêsu, sư dơ̆ng hơdai đe noh.

⁶ Truh Yêsu khan: “Inh boih,” na lu sư kơdŭn tơ rŏng, pơ̆k tơ teh.

⁷ Yêsu jet dơ̆ng: “Iĕm chă bu?” Lu đe ei khan: “Nhôn chă Yêsu, Pơlei Nasaret.”

⁸ Yêsu khan dơ̆ng: “Inh khan kơ iĕm boih Inh bơngai noh. Dah lu iĕm wă rôp Inh, apinh iĕm ăn kơ lu bơngai kiơ̆ Inh âu brŏk.”

⁹ Yêsu khan tơdrong noh 'blep tơdrong đơ̆ng Sư khan lê̆ hơdrol kơ 'Bă Sư hei thoi âu: “Lăm lu bơngai đêl Ih ăn kơ Inh ưh kơ đei bu hiong ôh.”

¹⁰ Minh 'nu bơngai pơhrăm păng Yêsu, anăn sư Pêtrôs, sư kieo minh hlak dao, sư toh dao sư, koh đĭch 'bok soi tơm 'bơm đon gah 'ma phơ̆t kơtĕch hloi. Đĭch noh anăn sư Malkơ.

¹¹ Na Yêsu khan kơ Pêtrôs: “Tah lê̆ dao ih tơ anglop bĕ. 'Bă Inh ăn tơdrong anat anot âu truh kơ Inh, trŏ kơ Inh iŏk boih.”

Yêsu 'bơ̆t anăp Ana

¹² Thoi noh lu linh Rôm păng minh 'nu 'bok sêp lu sư, hăm lu linh Juđê mă gak hnam akŭm tơm, lu sư rôp chô̆ Yêsu.

¹³ Lu sư năm ba Yêsu tơ Ana. Ana 'noh sư tơnei Kaiphe. Kaiphe pơm 'bok soi tơm lăm sơnăm 'noh.

¹⁴ Kaiphe âu boih bơngai mă đêl khan kơ lu bơngai Juđê thoi âu: “Minh 'nu bơngai lôch tang lu bơngai Juđê bơ̆n, thoi noh trŏ.”

Pêtrôs sơngah tơdrong lui sư

¹⁵ Pêtrôs hăm minh 'nu bơngai pơhrăm nai năm kiơ̆ Yêsu. 'Bok soi tơm sư juăt hăm minh 'nu bơngai pơhrăm 'noh, thoi noh bơngai 'nâu gơh mơ̆t hơdai kiơ̆ Yêsu tơ cham 'bok soi tơm.

¹⁶ Mă-lei Pêtrôs gô 'bơ̆t 'măng dur. Bơngai pơhrăm mă juăt kơ 'bok soi tơm, sư năm khan kơ drŏ-kăn wei 'măng dur ăn Pêtrôs mơ̆t tơ lăm cham ei mơ̆n.

¹⁷ Drŏ-kăn ei jet Pêtrôs: “Hăm trŏ kơ ih kư̆m pơhrăm păng Yêsu?” Pêtrôs khan: “Ưh ôh, inh ưh.”

¹⁸ Đei lu linh, lu đĭch đam oei nhur ŭnh ngar kơlih kơ tơngiĕt. Pêtrôs kư̆m năm nhur hơdai hăm lu đe noh mơ̆n.

Ana sek tơdrong Yêsu

¹⁹ 'Bok soi tơm jet Yêsu: “Lu đe bu juăt pơhrăm păng Ih? Ih bơtho lu sư tơdrong kiơ?”

²⁰ Na Yêsu khan: “Inh ling-lang bơtho tơ bơngai tơpôl, tơ rim hnam akŭm. Inh bơtho tơ hnam akŭm 'Bok Kei-Dei tơm. Tơ yơ yơ lu Juđê akŭm, Inh bơtho kơ lu sư mơ̆n. Inh ưh kơ đei bơtho ôn ôh.

²¹ Lơliơ ih jet Inh? Ih jet lu bơngai đêl mơ̆ng Inh bơtho, lu sư băt đĭ boih tơdrong noh.”

²² Lăp Yêsu pơma thoi noh, đei minh 'nu linh Juđê tap tơ'bŏk Sư păng khan: “Ih ưh kơ trŏ pơma kơ 'bok soi tơm thoi noh ôh.”

²³ Na Yêsu khan kơ sư dơ̆ng: “Dah Inh pơma glăi, ih roi tơdrong glăi 'noh; dah Inh pơma trŏ, liơ ih tap Inh thoi âu?”

²⁴ Klaih kơ noh Ana wơh đe ba Yêsu năm tơ 'bok soi tơm anăn sư Kaiphe. Ti Yêsu oei chô̆.

Pêtrôs sơngah dơ̆ng

²⁵ Pêtrôs oei nhur ŭnh. Lu bơngai nhur ŭnh ei jet Pêtrôs: “Hăm trŏ kơ ih pơhrăm păng Yêsu?” Pêtrôs sơngah khan: “Ưh ôh, inh ưh.”

²⁶ Minh 'nu bơngai đĭch đam 'bok soi tơm, 'nhŏng oh bơngai mă đêl Pêtrôs koh hla đon sư, jet Pêtrôs dơ̆ng: “Inh 'bôh ih hơdai hăm Yêsu tơ pơgar 'long noh hei”

²⁷ Pêtrôs sơngah dơ̆ng, klaih kơ noh lêk kơ iĕr ŏ hloi.

Yêsu 'bơ̆t anăp 'bok tih Pilat

²⁸ Đơ̆ng hrôih đe anhăk Yêsu đơ̆ng hnam Kaiphe tơ hnam birô anih 'bok pơgơ̆r. Lu bơngai Juđê ưh kơ pơ̆n mơ̆t lăm hnam birô noh yua kơ khŭl lu sư kơ̆m kơ mơ̆t lăm hnam tơmoi. Dah lu sư mơ̆t, lu sư ưh kơ gơh sa 'nhĕm sư pơm Giĕng Năm Brih lăm năr noh.

²⁹ Thoi noh Pilat lĕch jet lu sư: “Iĕm kêng bơngai âu tơdrong kiơ?”

³⁰ Lu sư khan: “Dah Sư ưh kơ đei pơm yoch, nhôn ưh kơ đei năm ba Sư tơ ih ôh.”

³¹ 'Noh Pilat khan kơ lu sư dơ̆ng: “Thoi ei iĕm iŏk Sư, sek tơlang kiơ̆ tơdrong juăt lu iĕm wăi.” Lu bơngai Juđê khan: “Nhôn ưh kơ gơh pơlôch bơngai ôh.”

³² Tơdrong pơma 'noh 'blep trŏ thoi Yêsu khan lê̆ hơdrol, Sư wă lôch tơ 'long pơglang.

³³ Pilat mơ̆t dơ̆ng tơ hnam birô 'noh păng jet Yêsu: “Hăm trŏ kơ Ih pơm Pơtao đe Juđê?”

³⁴ Yêsu khan: “'Noh ih pơma kơdih dah đe akhan kơ ih?”

³⁵ Pilat khan: “Inh ưh kơ trŏ kơ bơngai Juđê ôh. Lu bơngai dêh char Ih păng lu 'bok soi tih, rôp Ih năm ba tơ inh. 'Noh Ih pơm tơdrong yoch kiơ?”

³⁶ Yêsu khan: “Tơdrong Inh pơm Pơtao ưh kơ sĭ thoi lu 'bok pơtao tơ ala teh âu ôh. Dah Inh pơm pơtao thoi lu sư, đei bơngai linh kiơ̆ Inh, tơblah păng lu bơngai Juđê 'noh wă kơ lu sư huay kơ rôp Inh. Tơdrong Inh pơm Pơtao ưh kơ sĭ đơ̆ng kon bơngai ăn kơ Inh pơm ôh.”

³⁷ Pilat jet dơ̆ng: “'Noh hăm trŏ Ih 'Bok Pơtao dah ưh?” Yêsu khan: “Trŏ boih ih khan Inh 'Bok Pơtao. Kơlih kơ minh tơdrong âu Inh tơpŭ tơ ala teh âu, wă bơtho tơdrong tơpăt. Bu mă kiơ̆ tơdrong tơpăt, sư mơ̆ng nơ̆r Inh pơma.”

³⁸ Pilat khan: “Tơdrong kiơ khan tơdrong tơpăt?” Pilat lĕch hloi khan kơ lu bơngai Juđê: “Inh 'bôh bơngai 'nâu ưh kơ đei tơdrong yoch kiơ ôh.

Lu Juđê athei Pilat pơlôch Yêsu

³⁹ Thoi noh kiơ̆ kơ tơdrong juăt iĕm, trŏ kơ Năr Giĕng Năm Brih, inh wă tơlĕch ăn minh 'nu bơngai đơ̆ng lăm hnam phak. Iĕm hăm wă inh tơlĕch kơ iĕm 'Bok Pơtao đe Juđê?”

⁴⁰ Lu sư pơma 'bơ̆r re khan: “Ưh ôh, ưh kơ bơngai 'noh. Tơlĕch ăn kơ nhôn 'Barra'ba.” 'Barra'ba 'noh yŏng bơngai tơtông tơgar.