Yo 11 - Sơ̆p Hlabơar Nơ̆r 'Bok Kei-Dei

¹ Tơ Pơlei Bethani đei minh 'nu bơngai anăn sư Lasarơ. Oh sư bre Mari păng Mathê kư̆m oei pơlei ei mơ̆n.

² Mari âu mă tuh đak pơgang 'bâu phu kơ jơ̆ng Yêsu păng iŏk sŏk sư kơdih sut kơ jơ̆ng Yêsu. Na dang ei 'nhŏng sư Lasarơ oei păn kơ jĭ.

³ Na 'bar 'nu bre mai oh ei wơh đe năm tơ Yêsu khan thoi âu: “Ơ 'Bok, Lasarơ mă Ih 'mêm kơeng, sư oei păn kơ jĭ.”

⁴ Yêsu kơtơ̆ng thoi noh na khan: “Tơdrong jĭ sư 'noh huay kơ lôch ôh. Tơdrong jĭ 'noh wă kơ đe ư-ang kơ 'Bok Kei-Dei păng ư-ang kơ Kon Sư mơ̆n.”

⁵ Yêsu 'mêm tơpă kơ Mathê, Mari păng 'nhŏng sư Lasarơ.

⁶ Yêsu kơtơ̆ng Lasarơ jĭ ră, mă-lei Sư oei tơ anih ei pă 'bar năr dơ̆ng, pah to đak krong Jôrđăn.

⁷ Đơ̆ng rŏng kơ 'bar năr ei na Sư khan kơ lu bơngai pơhrăm păng Sư thoi âu: “Bĕ bơ̆n wih dơ̆ng tơ dêh char Juđê.”

⁸ Lu bơngai pơhrăm păng Sư khan: “Lơliơ, lu bơngai Juđê 'nao chă wă klơ̆m Ih păng tơmo, mă dang ei Ih khan wă wih dơ̆ng tơ ei?”

⁹ Na Yêsu khan thoi âu: “Huay ôh, lăm minh năr đei mơjĭt-'bar jơ dah kiơ? Na bu nơnăm yak kơ'năr sư 'noh huay kơ kơtơih ôh, kơlih kơ đei 'năr pơchrang hơdah tơ ala teh âu.

¹⁰ Dah bơngai bu ưh kơ lui kơ 'Bok Kei-Dei sư dang yak kơmăng; kơlih kơ sư ưh kơ lui na pă jor sư gô kuơ̆l kơ trong, kơlih sư ưh kơ wă 'Bok Kei-Dei tơ'bôh ăn kơ sư trong.”

¹¹ Klaih kơ noh Yêsu khan thoi âu dơ̆ng: “Lasarơ bơngai mă juăt păng bơ̆n, sư oei tep na Inh wă năm râu sư dang ei.”

¹² Lu bơngai pơhrăm păng Sư khan: “Ơ 'Bok, sư wă klaih kơ jĭ thâu na sư 'maih tep dêh.”

¹³ Yêsu pơma pơjuang kơ lu sư Lasarơ lôch boih mă-lei lu sư ưh kơ hlôh, ngêh kơ Lasarơ tep đĕch.

¹⁴ Na Yêsu roi tơpăt kơ lu sư: “Lasarơ lôch boih.

¹⁵ Trŏ mơ̆n Inh ưh kơ đei năm pơklaih sư năr mơsơ̆ kơlih Inh wă kơ iĕm lui kơjăp. Na dang ei bĕ bơ̆n năm lăng sư.”

¹⁶ Na Thôm mă đe krao sư Kon Kơmar, sư khan kơ buăl pơhrăm tơduă sư khan: “Bĕ bơ̆n năm kiơ̆ Sư wă kơ bơ̆n lôch hơdai Sư.”

Yêsu tơiung arih lu bơngai lôch

¹⁷ Lăp Yêsu truh tơ pơlei ei boih, đe 'bŭ Lasarơ lăm hơgơp tơmo puăn năr boih.

¹⁸ Pơlei Bethani jê̆ Pơlei Jêrusalem dang pêng kơsô̆ đĕch.

¹⁹ Na đei lơ bơngai Juđê đơ̆ng Pơlei Jêrusalem năm ngôi hơpong tơ bre Mathê păng Mari wă kơ bre sư huay sơ'ngon kơ 'nhŏng bre sư lôch.

²⁰ Lăp Mathê kơtơ̆ng ang đe khan Yêsu wă jê̆ truh tơ bre sư, na Mathê năm tơkan hloi tơ Sư. Gah Mari oei lăm hnam.

²¹ Mathê khan hloi kơ Yêsu: “Ơ 'Bok, dah Ih tơ âu ki lei 'nhŏng inh huay kơ lôch ôh.

²² Mă-lei inh kư̆m băt dang ei 'Bok Kei-Dei gô pơm kiơ̆ thoi Ih apinh Sư.”

²³ Na Yêsu khan kơ sư: “'Nhŏng ih gô iung arih dơ̆ng.”

²⁴ Mathê khan: “Inh băt mơ̆n sư gô iung arih năr tôch ning-mônh.”

²⁵ Yêsu khan kơ sư: “Inh boih tơiung arih bơngai đơ̆ng lôch păng ăn tơdrong arih ling-lang. Bơngai bu lui kơ Inh, bơngai 'noh sư lôch bưh mơ̆n, mă-lei Inh tơiung arih sư dơ̆ng.

²⁶ Bơngai bu arih yua kơ sư lui kơ Inh, bơngai 'noh ưh kơ layơ lôch hiong. Ih hăm lui tơdrong 'noh?”

²⁷ Mathê drơ̆ng: “Ơ 'Bok, inh lui tơpă. Inh lui kơ Ih 'Bok Krist, Kon 'Bok Kei-Dei mă nhôn chang gô jur tơ ala teh âu wă dŏng pơklaih nhôn.”

²⁸ Đang kơ pơma thoi noh Mathê năm krao oh sư Mari. Sư khan kơ oh sư kơdrô̆ bre sư thoi âu: “'Bok Thây truh tơ âu boih păng Sư wă kơ e.”

²⁹ Mari kơtơ̆ng thoi noh boih na sư iung tơkan năm tơ Yêsu.

³⁰ Yêsu tam mă mơ̆t tơ pơlei ôh. Sư oei 'bơ̆t jih pơlei đêl anih Mathê tơ'bơ̆p Sư hei.

³¹ Lu bơngai Juđê mă năm hơpong kơ bre Mathê, lu sư oei lăm hnam ei mơ̆n. Lăp lu sư 'bôh Mari iung năm tơkan tơ Yêsu, lu sư iung kiơ̆ hloi. Lu sư ngêh kơ Mari năm nhơ̆m tơ bơsat.

³² Mari năm truh tơ anih Yêsu na 'bôh hloi Sư. Mari bon hloi 'bơ̆t anăp Sư kơkuh kơ Sư păng khan: “Ơ 'Bok, dah Ih tơ âu ki lei 'nhŏng inh huay kơ lôch ôh.”

³³ Yêsu 'bôh Mari oei hmoi ơh păng lu bơngai Juđê mă năm hơpong kơ sư kư̆m nhơ̆m hmoi mơ̆n na Yêsu sơ'ngon tơpă.

³⁴ Na Yêsu jet: “Iĕm 'bŭ sư tơ yơ?” Lu sư khan: “Ơ 'Bok, bĕ bơ̆n năm lăng.”

³⁵ Na Yêsu kư̆m nhơ̆m hmoi mơ̆n.

³⁶ Thoi noh na lu bơngai Juđê khan: “Yêsu 'mêm kơ Lasarơ tơpă.”

³⁷ Mă-lei lu mơ'nah dơ̆ng khan: “'Bok âu pơklaih bơngai măt tol gơh 'bôh hơdah, na ki dah Sư wă pơklaih lei Lasarơ huay kơ lôch ôh iih?”

Lasarơ iung đơ̆ng bơsat

³⁸ Yêsu rai sơ'ngon. Lu sư năm truh tơ bơsat boih. Bơsat ei lăm tơmo hơgơp, tơnglơ̆p sư păng tơmo mơ̆n đơ̆p 'bơ̆t 'măng bơsat.

³⁹ Yêsu khan: “Pơih tơnglơ̆p 'măng tơmo âu bĕ.” Na Mathê oh bơngai mă lôch ei sư khan kơ Yêsu: “Ơ 'Bok, dah bơ̆n pơih tơnglơ̆p tơmo âu dang ei bơ̆n 'bâu ôm dêh, kơlih nhôn 'bŭ sư đei pêng măng boih.”

⁴⁰ Yêsu khan kơ sư: “Inh khan kơ ih boih, dah ih lui ih gô 'bôh tơdrong mơsêh mơyang đơ̆ng 'Bok Kei-Dei.”

⁴¹ Lu sư pơih tơnglơ̆p tơmo ei. Na Yêsu ngoi tơ plĕnh krao khan kơ 'Bă Sư: “Ơ 'Bă, Inh bơnê kơ Ih kơlih kơ Ih mơ̆ng Inh krao khan kơ Ih boih.

⁴² Inh băt Ih mơ̆ng Inh ling-lang mơ̆n, mă-lei Inh khan thoi noh wă kơ lu bơngai mă oei tăp dăr kơ Inh kơtơ̆ng na lu sư gô lui kơ Ih wơh Inh.”

⁴³ Klaih kơ noh Yêsu pơma 'bơ̆r re khan: “Ơ Lasarơ, iung đơ̆ng bơsat bĕ, lĕch tơ 'ngoaih âu.”

⁴⁴ Lasarơ mă lôch ei iung đơ̆ng bơsat lĕch hloi tơ 'ngoaih. Mă-lei jơ̆ng ti muh măt sư đêl đe chôm pơ̆n păng che oei oei 'bơ̆t akâu sư. Yêsu khan kơ lu sư: “Yaih che đơ̆ng akâu sư bĕ wă kơ sư jah wih tơ hnam.”

Bơngai Juđê chă đon wă pơlôch Yêsu

⁴⁵ Lu bơngai Juđê mă kiơ̆ Mari hei, lu sư 'bôh Yêsu tơiung arih Lasarơ na đei lơ mơ̆n lu sư lui kơ Yêsu.

⁴⁶ Mă-lei lu buăl sư mơ'nah năm roi kơ lu bơngai Pharisi Yêsu tơiung arih Lasarơ.

⁴⁷ Na lu bơngai Pharisi păng lu 'bok soi tih krao akŭm lu kră sek tơlang. Akŭm boih lu sư khan: “Bơ̆n wă pơm thoi yơ kơ Yêsu, yua kơ Sư gơh pơm lơ tơdrong mơsêh mơyang.

⁴⁸ Dah bơ̆n ưh kơ khă Sư lei đĭ-đăng kon pơlei pơla gô lui kơ Sư na pôk Sư pơm tih. Kơlih kơ thoi noh na lu bơngai Rôm gô hil na tŏk tơgar iŏk hnam akŭm tơm bơ̆n păng teh đak bơ̆n đĭ hloi.”

⁴⁹ Hơtai ei sơ̆ đei minh 'nu 'bok anăn sư Kaiphe. Sơnăm noh sơ̆ sư pơm 'bok soi tơm. Sư kơtơ̆ng thoi noh na sư khan: “Iĕm ưh kơ hlôh tơpă lah iih tơdrong noh.

⁵⁰ Minh 'nu bơngai lôch tang lu bơngai Juđê bơ̆n, thoi noh na teh đak bơ̆n huay kơ hiong, thoi noh yơh trŏ. Liơ iĕm ưh kơ hlôh tơdrong 'noh?”

⁵¹ 'Bok Kaiphe pơma tơdrong 'noh ưh kơ sĭ sư pơma kiơ̆ kơ đon sư tơchĕng ôh. Sơnăm noh sơ̆ sư pơm 'bok soi tơm, na 'Bok Kei-Dei ăn kơ sư pơma khan lê̆ hơdrol gah Yêsu wă lôch tang lu bơngai Juđê.

⁵² Mă tơpă ưh kơ sĭ Sư lôch tang lu bơngai Juđê đĕch ôh. Sư lôch tang đĭ-đăng dôm lu kon 'Bok Kei-Dei oei jơ̆p-jang ala teh âu.

⁵³ Đơ̆ng năr 'noh boih lu sư chă đon wă pơlôch Yêsu.

⁵⁴ Kơlih kơ thoi noh na Yêsu ưh pă wă năm trong 'ngoaih tơ'bôh akâu Sư tơ lăm dêh Juđê dơ̆ng boih. Sư năm đơ̆ng Pơlei Jêrusalem truh tơ jih glă. Tơ ei Sư oei tơ Pơlei Êpraim hơdai hăm lu bơngai pơhrăm păng Sư.

⁵⁵ Hơtai ei Năr Giĕng Năm Brih đe Juđê wă jê̆ truh boih, na lơ bơngai Juđê đơ̆ng pơlei nai năm tơ Pơlei Jêrusalem hơdrol kơ năr giĕng ei. Lu sư năm tơ lu 'bok soi wă pơm rơgoh kơdih tơdrong yoch hơdrol kơ Năr Giĕng Năm Brih ei.

⁵⁶ Lu sư chă Yêsu. Lu sư oei ngôi tơ cham hnam akŭm tơm păng jet dih băl: “Iĕm tơchĕng thoi yơ? Rŏ lăng Sư ưh kơ wă năm tơ âu ôh iih?”

⁵⁷ Lu 'bok soi tih păng lu bơngai Pharisi pơkă khan: “Bơngai bu băt kơ Sư oei tơ yơ, 'bôh Sư tơ yơ, bơngai 'noh athei roi kơ nhôn wă kơ nhôn năm rôp.”