Ya 5 - Sơ̆p Hlabơar Nơ̆r 'Bok Kei-Dei

¹ Ơ lu bơngai mơdrŏng, mơ̆ng bĕ. Trŏ kơ iĕm nhơ̆m hmoi bĕ, mă iĕm nhơ̆m hmoi lê̆ hơdrol lăp boih, yua kơ dôm tơdrong gleh pơmat wă truh kơ iĕm.

² Mŭk tơmam iĕm jing hach răm, hơbĕn ao iĕm mua reh sa;

³ tơmam hu maih iĕm gô đĭ kơ gơsang sa, noh na đe băt kơ iĕm bơngai hưch kơ mŭk tơmam dêh, tơmam iĕm gô hiong đĭ. Gơsang noh kư̆m wă sa akâu iĕm mơ̆n thoi lĕ kơ ŭnh. Iĕm chă mong mŭk tơmam lơ, mă-lei ưh kơ yua kiơ kơlih kơ wă jê̆ truh năr tôch boih.

⁴ Lu bơngai jang kơ mir iĕm, kĕch 'ba iĕm, iĕm drơ̆ng kơ apah sư, mă iĕm ưh kơ apah, iĕm hơlĕnh pơ'brơh kơ sư, na 'bơ̆r lu sư nhơ̆m hmoi kơtơ̆ng truh tơ Kră Yang 'Bok Kei-Dei ti.

⁵ Iĕm oei tơ ala teh âu hiôk jơnap tơpă. Sŏng sa phĭ mah rơkah rơkai bek lơluĭnh thoi rơmo, na đe wă rơih rơmo bek noh boih 'buh sa.

⁶ Iĕm jâu lu bơngai 'lơ̆ng pơm kơnê̆ na pơlôch hloi lu sư, mă-lei lu sư ưh kơ pơjăng ôh.

Adrin chang gô Kră Yang wă jur

⁷ Ơ 'nhŏng oh, iĕm băt kơ thoi noh boih, na mă đe pơm kơnê̆ kơ iĕm, iĕm thĕng đĕch hŏ, truh tơ năr Kră Yang jur dơ̆ng. Pơtih gia thoi lu bơngai jang mir 'ba, lu sư băt tơpă gô đei 'ba na lu sư adrin jang truh kơ bơyan 'ba đum.

⁸ Na lu bơ̆n kư̆m lei-lăi athei lui mă kơjăp chang gô Kră Yang Yêsu wă jur, yua kơ Sư wă jê̆ jur tơpă boih.

⁹ Ơ 'nhŏng oh, iĕm 'nĕ kơ pơma mơmơnh dih băl, hli kơ Kră Yang sek tơlang tơdrong bơ̆n pơma mơmơnh noh Sư hil kơ bơ̆n, yua kơ 'Bok Sek Tơlang ei wă jê̆ jur tơpă, dang lĕ kơ kiơ̆ 'măng dur bơ̆n boih.

¹⁰ Ơ 'nhŏng oh, bơ̆n athei adrin pơm kiơ̆ thoi lu bơngai pơtruh nơ̆r 'Bok Kei-Dei sơ̆ bĕ; yua kơ sơ̆ đe pơm kơ lu sư lơ tơdrong pơmat-tat, mă-lei lu sư ưh kơ achăng lê̆ tơdrong lui ôh.

¹¹ Bơ̆n ư-ang tơpă 'bôh lu bơngai đei tơdrong gleh truh mă sư oei lui kơjăp, thoi lĕ kơ 'bok Jop sơ̆ sư đei tơdrong gleh pơmat kơ sư dang noh mă sư oei adrin lui khŏm khŏm. Na đơ̆ng rŏng bơ̆n 'bôh 'Bok Kei-Dei mơnat kơ sư, ăn kơ sư hiôk jơnap, na bơ̆n kư̆m băt kơ 'Bok Kei-Dei mơnat kơ bơ̆n thoi sư noh mơ̆n.

¹² Ơ 'nhŏng oh, mă loi inh wă pơkă kơ iĕm tơdrong âu kăl dêh: Tơdrong kiơ iĕm pơkă kơ đe wă kơ đe băt kơ iĕm gô pơm, iĕm 'nĕ pă pơkă pao anăn 'Bok Kei-Dei, anăn plĕnh, anăn teh, dah anăn kiơ kiơ nai; iĕm wă pơkă kơ đe tơdrong kiơ, iĕm athei pơkă mă tơpăt hăm 'bơ̆r hoh đĕch. Thoi noh 'Bok Kei-Dei huay kơ hil kơ iĕm.

Krao khan pik đak pơgang kơ bơngai jĭ

¹³ Tơ̆ng đei bu lăm lu iĕm đei tơdrong gleh kiơ truh kơ lu sư, sư athei krao khan hloi; jơhngơ̆m bu hiôk chơt sư athei hơri bơnê kơ 'Bok Kei-Dei.

¹⁴ Lăm lu iĕm, tơ̆ng bu đei tơdrong jĭ jăn, sư athei krao lu kră wei-lăng lu bơngai lui năm krao khan kơ sư hăm pik đak pơgang tơ akâu sư păng krao anăn Kră Yang Yêsu pơklaih sư.

¹⁵ Yua kơ lu sư krao khan gơnang kơ Kră Yang tơpă, na Kră Yang gô pơklaih tơdrong jĭ jăn bơngai noh ăn kơ sư 'lơ̆ng akâu dang đêl; mă sư pơm yoch 'Bok Kei-Dei kư̆m mơnat pơklaih yoch sư mơ̆n.

¹⁶ Thoi noh na iĕm athei roi dih băl tơdrong yoch na bôl buăl krao khan tơgŭm, 'Bok Kei-Dei gô ăn kơ lu iĕm mă jĭ jăn klaih praih iung. Bơngai mă lui kơjăp ưh kơ đei tơdrong yoch sư krao khan adrin tơpă na 'Bok Kei-Dei gô tơl tơwih dôm tơdrong sư krao khan noh.

¹⁷ Êli sơ̆ sư kư̆m kon bơngai lei-lăi thoi bơ̆n, mă-lei sư krao khan adrin tơpă, sư apinh 'Bok Kei-Dei kuă ăn 'mi tơ dêh sư oei, na 'Bok Kei-Dei kư̆m mơ̆ng sư tơpă, kơtĕch pêng sơnăm minh puăt ưh kơ đei đak 'mi.

¹⁸ Klaih kơ noh sư krao khan dơ̆ng wă kơ đei đak 'mi, đei hloi tơpă, na teh rơngơp pơjing tôm tơdrong plei 'long bluh 'lơ̆ng thoi đêl.

¹⁹ Ơ 'nhŏng oh, dah đei bu lăm lu iĕm jrok trong hiong tơdrong sư lui kơ 'Bok Kei-Dei, na đei bơngai nai pơlung sư wih lui dơ̆ng kơ 'Bok Kei-Dei,

²⁰ bơngai noh 'lơ̆ng tơpă băt 'mêm kơ bôl sư jrok trong pơlung bôl sư wih lui dơ̆ng kơ 'Bok Kei-Dei. Na 'Bok Kei-Dei gô pơklaih bôl sư mă jrok trong noh đơ̆ng tơdrong lôch pơmat huay kơ jô̆ yo dôm tơdrong sư pơm yoch.