Tơdrông Tơ'bôh 8 - Sơ̆p Hlabơar Nơ̆r 'Bok Kei-Dei

¹ Lăp Kon Triu hek tơdra mă tơpơh, kơplah ei tơ plĕnh ti ưh kơ đei kon kiơ pơma, thĕng hreh đĕch, đunh dang minh puăt jơ.

² Klaih kơ noh inh 'bôh tơpơh 'nu linh jang 'lơ̆ng mă juăt kơ dơ̆ng 'bơ̆t anăp 'Bok Kei-Dei, na lu sư dơ̆ng. Đe đei ăn kơ lu sư tơpơh tŏ keng.

³ Đei minh 'nu linh jang nai dơ̆ng, sư dơ̆ng 'bơ̆t anăp chơnang soi, sư chĕp minh pôm kơlăm maih păng đe ăn kơ sư minh achô̆ ŭnh nhang wă soh kơplah đĭ-đăng bơngai lui oei krao khan, wă kơ 'bâu phu. Na sư pơyơ̆r ŭnh nhang noh kơ 'Bok Kei-Dei 'măn 'bơ̆t chơnang soi tơklă tang-dŏ 'Bok Kei-Dei.

⁴ Lăp linh jang ei soh ŭnh nhang ei boih na 'nhui ŭnh nhang noh tŏk 'bâu phu jơ̆p-jang kơ lu bơngai lui oei krao khan, tŏk truh tơ 'Bok Kei-Dei. 'Noh wă pơtih gia kơ tơdrong bơngai lui krao khan kơtơ̆ng truh tơ 'Bok Kei-Dei.

⁵ Klaih kơ noh sư kep iŏk ŭnh ngar đơ̆ng chơnang soi tah lăm kơlăm maih klơ̆m hloi tơ teh, na đei grơ̆m glaih tơdrăng kơmlat kơchêr kơchar păng đei teh adrŏ mơ'nưt mơ'nat.

Tơpơh tŏ keng

⁶ Đơ̆ng noh na tơpơh 'nu linh jang mă chĕp tơpơh tŏ keng noh hei lu sư kơchăng wă hlôm.

⁷ Lăp linh jang 'lơ̆ng mă mônh hlôm keng, na đei hloi 'mi prĕl tih tơpă. Păng đei ŭnh hăm pham huŏng đơ̆ng plĕnh truh tơ teh, ŭnh sa pơđĭ minh lăm pêng pah teh đak. Lu 'long, ŭnh sa đĭ minh lăm pêng pah, tôm kơ 'nhĕt kư̆m lei-lăi sa pơgoh hloi.

⁸ Đơ̆ng rŏng kơ noh đei minh 'nu linh jang mă 'bar hlôm keng, na inh 'bôh minh pôm kơtuŏl ŭnh tih tŏ kông huŏng đơ̆ng plĕnh hơtat tơ đak dơsĭ.

⁹ Na minh lăm pêng pah đak dơsĭ jing pham đĭ. Dôm lu kon sem mă arih lăm đak dơsĭ lôch đĭ minh lăm pêng. Lu duk, lu thŏng-nan đe juăt kơ yua tơ đak dơsĭ kư̆m pơchah răm đĭ minh lăm pêng pah oei huay 'bar pah.

¹⁰ Linh jang 'lơ̆ng mă pêng hlôm keng, inh 'bôh minh pôm sơnglŏng tih khơ̆ng thoi ŭnh huŏng đơ̆ng plĕnh jruh tơ minh lăm pêng pah đak krong, minh lăm pêng pah rim kơ tu đak.

¹¹ Đe anăn sơnglŏng ei sơnglŏng tăng, yua kơ minh lăm pêng pah dôm lu thong đak noh, đei minh pah tăng ngăl. Đei lơlap lơlang bơngai lôch yua kơ nhă đak tăng ei, đak ei tăng dêh tơpă.

¹² Linh jang mă puăn hlôm keng, đei minh pah lăm pêng pah măt 'năr, đei minh pah lăm pêng pah măt khei, đei minh pah lăm pêng pah lu sơnglŏng jing măng mu minh pah. Đĭ lu sư jing ưh pă gan hơdah boih; 'noh jĭ kơ'năr ră, rai kơmăng rai loi.

¹³ Inh 'bôh păng kơtơ̆ng minh pôm sem klang păr tŏk-bŏk rơwơ̆ng ti, sư pơma 'bơ̆r re khan: “Ô glăi, ô glăi, ô glăi, lu bơngai mă oei tơ teh, pă 'biơ̆ pêng 'nu linh jang 'lơ̆ng hlôm keng wă pơrăm iĕm.”