Tơdrông Tơ'bôh 6 - Sơ̆p Hlabơar Nơ̆r 'Bok Kei-Dei

¹ Đơ̆ng noh na inh 'bôh Kon Triu hek hla bơar đêl đe pơklep tơdra noh. Sư hek tơdra mă mônh lăm tơpơh tŏ tơdra noh, inh kơtơ̆ng minh pôm lăm puăn anăn sem noh, sư krao minh 'nu bơngai hao aseh kok, sư pơma 'bơ̆r re dang grơ̆m glaih tơdrăng, sư khan thoi âu: “Tơ âu bĕ.”

² Na bơngai hao aseh kok ei năm hloi tơ sư chĕp jŏ hră. Đe ăn kơ sư agăl pơkao wă pơtih gia kơ tơdrong sư blah đe jei sư. Na sư năm tơblah. Sư blah đe jei sư tơpă.

³ Kon Triu hek tơdra mă 'bar, inh kơtơ̆ng anăn sem mă 'bar krao bơngai hao aseh 'brê, sư khan: “Tơ âu bĕ.”

⁴ Na bơngai hao aseh 'brê ei năm tơ sư. 'Bok Kei-Dei pơjao ăn kơ bơngai ei pơgơ̆r tơdrong gleh pơmat-tat jơ̆p kơ teh đak, wă kơ kon bơngai pơlôch dih băl. Na đe ăn kơ bơngai hao aseh 'brê ei minh hlak đao tih.

⁵ Inh 'bôh Kon Triu hek dơ̆ng tơdra mă pêng. Na inh kơtơ̆ng anăn mă pêng khan thoi âu: “Tơ âu bĕ.” Na đei minh 'nu bơngai hao aseh găm chĕp kĭ năm tơ sư. Kĭ noh wă tơbăt ăn kơ kon bơngai gô đei tơdrong pơngot rơwĕt.

⁶ Păng inh kơtơ̆ng đơ̆ng lăm tŏk-bŏk lu puăn anăn noh đei 'bơ̆r pơma thoi âu: “Phe 'lơ̆ng đe gô tĕch minh kĭ minh năr jên jang, phe ưh kơ gan 'lơ̆ng đe gô tĕch pêng kĭ minh năr jên jang. Mă-lei gah lu đak rơmă, đak sik, sư ưh kơ tĕch kăp dang noh ôh.”

⁷ Kon Triu hek dơ̆ng tơdra mă puăn, inh kơtơ̆ng anăn sem mă puăn sư khan thoi âu: “Tơ âu bĕ.”

⁸ Na inh 'bôh minh pôm aseh hiang hơlơp ưh kơ đei jơhngơ̆m. Bơngai mă hao aseh ei đe anăn sư yŏng pơgơ̆r gah tơdrong lôch. Đei minh 'nu nai kiơ̆ đơ̆ng rŏng sư, sư bơngai pơgơ̆r dêh atâu. Bre sư, 'Bok Kei-Dei ăn pơgơ̆r pơm yŏng đe năm tơblah chĕp khêl đao chă pơlôch đe păng pơm kơ kon bơngai lôch kơ pơngot rơwĕt, lôch kơ jĭ jăn păn hnong, lôch kơ sem bri pơlôch. 'Bok Kei-Dei ăn kơ bre sư gơh pơm tơdrong noh truh kơ minh pah lăm puăn pah teh đak.

⁹ Lăp Kon Triu hek tơdra mă pơđăm, na inh 'bôh bơhngol lu bơngai lôch, lu sư oei tơ ala kơ chơnang soi lơlap lơlang. Lu bơngai noh sơ̆ đe pơlôch yua kơ lu sư ră roi tơdrong 'Bok Kei-Dei.

¹⁰ Đĭ dôm lu sư pơma pơret khan: “Ơ 'Bok Kei-Dei, Ih Kră Yang 'lơ̆ng tơpăt. Layơ Ih wă sek tơlang phak lu bơngai mă oei tơ ala teh pơlôch nhôn sơ̆?”

¹¹ Đơ̆ng noh đe ăn rim 'nu kơ lu sư ao tai kok păng khan kơ lu sư thoi âu: “Gô 'biơ̆, gô tôm kơ lu bơngai mă trŏ kơ lôch thoi iĕm năm ră roi tơdrong 'Bok Kei-Dei, lu sư lôch 'mơ̆i, na phak lu bơngai mă pơlôch iĕm noh.”

¹² Kon Triu hek dơ̆ng tơdra mă tơdrâu, na inh 'bôh teh adrŏ tih mơ'nưt mơ'nat, măt 'năr mah jing măng mu suek dang che găm, măt khei lăp pơnil mah jing thoi pham.

¹³ Sơnglŏng huŏng đơ̆ng plĕnh kơdŭk kơdăk dang plei hơra đum hơlŭng kơ kial thu hơbŭt.

¹⁴ Klaih kơ noh inh 'bôh plĕnh tơlôm jing ưh pă 'bôh plĕnh dơ̆ng; lu thŭng thong, kông groi, bŏl đak tih iĕ kư̆m jing ưh pă 'bôh băt tơ yơ.

¹⁵ Lu bơngai ưh kơ lui tơ ala teh âu, mơ'nah pơm 'bok pơtao, mơ'nah pơm tih tơdrong nai, mơ'nah pơm tih linh, mơ'nah bơngai mơdrŏng, mơ'nah bơngai pran tih, đei mơ'nah đĭch đe, mơ'nah rơngei, đĭ lu sư hli tơrơ kơdâu ôn kơdih kơdih tơ hơgơp tơmo hơgơp teh.

¹⁶ Đĭ lu sư khan: “Ơ kông, ơ tơmo, klơ̆p nhôn bĕ wă kơ nhôn huay pă 'bôh muh măt 'Bok Kei-Dei mă oei tơ tang-dŏ, hăm huay pă 'bôh muh măt Kon Triu hil kơ nhôn,

¹⁷ yua kơ truh năr Sư hil kơ nhôn kơtang kơtĭt na bu kĕ sơ̆n.”