Tơdrông Tơ'bôh 5 - Sơ̆p Hlabơar Nơ̆r 'Bok Kei-Dei

¹ Păng inh 'bôh 'Bok Kei-Dei oei tơ tang-dŏ Sư, ti Sư gah 'ma chĕp minh sơnôm hla bơar, hla bơar ei chih 'bar pah rŏng klak na lôm pơklep sư tơpơh 'măng pơklep, wă kơ băt tơdra hli kơ đe hek lăng.

² Klaih kơ noh inh 'bôh minh 'nu linh jang 'lơ̆ng sư pran tih, sư pơma 'bơ̆r re khan: “Hăm đei bu hơnhŏ wă hek lăng hla bơar mă đêl đe pơklep boih noh?”

³ Ưh kơ đei bu hơnhŏ wă hek lăng ôh, mă lu oei tơ plĕnh, mă lu oei tơ teh, mă lu lôch oei trôm teh kư̆m ưh kơ đei bu hơnhŏ wă hek lăng hla bơar noh.

⁴ Inh băt kơ thoi noh boih na inh nhơ̆m hmoi ơh kơdih, yua kơ ưh kơ đei bu hơnhŏ wă hek lăng hla bơar noh lăm to sư thoi yơ.

⁵ Mă-lei đei minh 'nu lăm lu đe kră noh khan kơ inh thoi âu: “Ih 'nĕ pă nhơ̆m, to gô dăm-brang adrĕch adrung Juđa păng Đawit hek lăng hla bơar noh. Pôm Sư đĕch trŏ kơ hek lăng hla bơar noh, yua kơ Sư tơblah păng yang kơnê̆ jei Sư boih.”

⁶ Inh kơtơ̆ng sư pơma thoi noh na inh chă lăng 'bôh minh pôm Kon Triu oei jê̆ tang-dŏ 'Bok Pơtao, tŏk-bŏk puăn anăn lu sem brem noh păng tŏk-bŏk 'bar-jĭt puăn 'nu lu đe kră. Na Kon Triu ei Sư iung dang dơ̆ng, inh 'bôh rơka Sư đêl đe 'bet pơlôch sơ̆. Kon Triu ei đei tơpơh tŏ ake, tơpơh tŏ măt, 'noh wă kơ đe băt kơ 'Bok Kei-Dei ăn Yang Bơhngol 'Lơ̆ng Sư nơnăm jơ̆p-jang kơ teh đak.

⁷ Na Kon Triu ei Sư năm iŏk hla bơar đơ̆ng ti 'Bok Kei-Dei mă oei tơ tang-dŏ.

Lu mă oei tăp dăr kơ 'Bok Pơtao hơri ư-ang Kon Triu

⁸ Lăp Kon Triu ei iŏk hla bơar noh boih, na puăn anăn lu sem brem noh păng 'bar-jĭt puăn 'nu lu đe kră, lu sư 'nap kơkuh kơ Kon Triu. Klaih kơ noh rim 'nu kơ lu sư chĕp brŏ reh păng chĕp pơnhan maih, lăm pơnhan ei 'bĕnh kơ đak pơgang 'bâu phu. Đak pơgang 'bâu phu ei wă pơtih gia kơ lu kon 'Bok Kei-Dei krao khan kơ Sư kơtơ̆ng truh tơ Sư tơpă.

⁹ Na lu đe ei hơri minh tơdrong 'nao thoi âu: “Pôm Ih đĕch trŏ kơ hek lăng hla bơar đe pơklep noh yua kơ Ih lôch tang kon bơngai, păng pham Ih lĕch sĕch Ih huŏng huai iŏk kon bơngai brŏk tơ 'Bok Kei-Dei đơ̆ng rim dêh char, rim adrĕch adrung, rim khŭl bơngai, rim kơ nơ̆r pơma.

¹⁰ Păng Ih ăn kơ kon bơngai jing pơlei pơla 'Bok Kei-Dei wei-lăng păng pơgơ̆r. Ih ăn kon bơngai pơm thoi 'bok soi wă kơ chă pơjing tơdrong jang 'Bok Kei-Dei, păng Ih ăn kơ kon bơngai gơh chă pơgơ̆r tơduă lu sư tơ ala teh.”

¹¹ Đơ̆ng noh inh 'bôh dơ̆ng tăp dăr kơ tang-dŏ 'Bok Pơtao păng tăp dăr puăn anăn hăm 'bar-jĭt puăn 'nu lu đe kră ei, inh 'bôh lơlang lơlap ưh kơ băt dôm yơ rơbâu hơngan trĭu 'nu lu linh jang 'lơ̆ng.

¹² Đĭ-đăng kơ lu sư hơri minh nơ̆r hơdai. Tơdrong lu sư hơri ei thoi âu: “Ih Kon Triu mă đe pơlôch, Ih mơsêh mơyang, Ih mơdrŏng tih hơgei tôm tơdrong păng pran tih hloh kơ đĭ-đăng, na trŏ kơ nhôn lui yom păng ư-ang Ih tơpă.”

¹³ Na inh kơtơ̆ng dơ̆ng pă minh khŭl tôm kơ đĭ-đăng anăn đơ̆ng 'Bok Kei-Dei pơjing plĕnh hăm teh sơ̆, tôm kơ anăn lu bơngai lôch, tôm kơ anăn kon sem lăm đak dơsĭ, đĭ lu sư hơri minh nơ̆r hơdai thoi âu: “Bơnê kơ 'Bok Pơtao mă oei tơ tang-dŏ, hăm bơnê kơ Kon Triu, mơsêh mơyang 'lơ̆ng rŏ trŏ kơ nhôn lui yom păng ư-ang ling-lang ưh kơ layơ tôch.”

¹⁴ Na puăn anăn lu sem brem 'noh khan: “Trŏ boih iĕm khan thoi noh.” Na 'bar-jĭt puăn 'nu lu đe kră kư̆m wang 'nap kơkuh kơ 'Bok Kei-Dei hăm Kon Triu.