Tơdrông Tơ'bôh 21 - Sơ̆p Hlabơar Nơ̆r 'Bok Kei-Dei

¹ Đơ̆ng noh inh đei 'bôh plĕnh păng teh 'nao, yua kơ plĕnh păng teh adrol sơ̆ tôch boih. Mă đak dơsĭ kư̆m pă đei boih.

² Na inh 'bôh Pơlei Jêrusalem 'nao mă đe anăn Pơlei 'Lơ̆ng 'Bok Kei-Dei jur đơ̆ng plĕnh; pơlei Sư 'nao pơm 'lơ̆ng rŏ dêh dang kơ adruh 'nao đah pơhrôp hơbĕn ao 'lơ̆ng wă tơoei băl.

³ Păng inh kư̆m kơtơ̆ng 'bơ̆r đe pơma re đơ̆ng tang-dŏ 'Bok Kei-Dei khan thoi âu: “'Nâu boih đe khan 'Bok Kei-Dei oei hơdai hăm kon bơngai. Sư oei tŏk-bŏk hăm kon bơngai, na kon bơngai jing kon Sư păng Sư jing Kră Yang kon bơngai.

⁴ 'Bok Kei-Dei sut pơgoh đak măt lu sư, lu sư ưh pă lôch dơ̆ng, lu sư ưh pă đei tơdrong nhơ̆m hmoi ơh sơ'ngon dơ̆ng ôh, ưh pă đei tơdrong jĭ jăn păn hnong, yua kơ chăl arih so hiong tôch boih.”

⁵ 'Bok Kei-Dei mă oei tơ tang-dŏ khan: “Inh pơjing tôm tơdrong 'nao.” Sư wih khan dơ̆ng kơ inh thoi âu: “Ih chih răk lê̆ dôm tơdrong Inh pơma, yua kơ tơdrong âu sĭt gô đei tơpă iĕm gơh lui.”

⁶ Na 'Bok Kei-Dei khan dơ̆ng kơ inh thoi âu: “Inh pơm tôm tơdrong keh boih. Inh thoi chư A, jĭ blŭng-a kơla chă adrol kơ đĭ-đăng lăm dôm tơdrong. Păng Inh kư̆m thoi chư Y, tuch-luch năr tôch kư̆m oei đei Inh. Thoi noh bu ol kơ đak, inh asong nhă đĕch đơ̆ng tu đak ăn kơ kon bơngai gơh arih ling-lang.

⁷ Bu adrin tơblah păng yang kơnê̆ jei sư, sư gô đei tôm tơdrong noh, Inh jing Kră Yang sư, sư jing kon Inh.

⁸ Gah lu bơngai lêl, lu bơngai achăng tŭk tơdrong lui, lu bơngai pơm kơnê̆, lu bơngai pơlôch đe, lu bơngai pơm pơyô kư̆ kă, lu bơngai pơm pơjâu chă sol đe, lu bơngai kơkuh kơ yang nai, lu bơngai hơlĕnh pơdăr đon đe, đĭ lu bơngai thoi noh gô huŏng tơ dơnâu ŭnh tŏ hang hơt, 'noh tơdrong lôch mă 'bar.”

Pơlei Jêrusalem 'nao

⁹ Minh 'nu lăm tơpơh 'nu linh jang mă chĕp tơpơh tŏ pơnhan đak pơgang tơdrong pơmat đe noh, sư năm pơma kơ inh thoi âu: “Bĕ kiơ̆ inh, inh wă tơ'bôh kơ ih akăn Triu Sư 'nao oei.”

¹⁰ Đang sư pơma thoi noh boih, na inh ưh kơ băt thoi yơ Yang Bơhngol 'Lơ̆ng ăn kơ linh jang pôk anhăk ba inh tơ kông tih kơjung, na sư tơ'bôh kơ inh Pơlei Jêrusalem 'nao, mă đe anăn Pơlei 'Lơ̆ng 'Bok Kei-Dei, jur đơ̆ng plĕnh.

¹¹ Pơlei ei 'lơ̆ng rŏ tơpă yua kơ đei 'Bok Kei-Dei oei tơ noh. Pơlei ei rang hơdah dang tơpei hu, dang tơpei maih, rang kok thoi amĭl.

¹² Pơlei ei đei dur tih kơjung păng đei mơjĭt-'bar tŏ 'măng. Rim kơ 'măng đei minh 'nu linh jang 'lơ̆ng gak; tơ 'măng noh đe chih mơjĭt-'bar khŭl adrĕch adrung lu bơngai Isơrael.

¹³ Gah 'năr lĕch đei pêng tŏ 'măng, gah yă-nơ̆m pêng tŏ 'măng, gah gơal pêng tŏ 'măng, gah 'năr mơ̆t kư̆m đei pêng tŏ 'măng.

¹⁴ Đe trơn tơmo pơm pơlei ei, đei mơjĭt-'bar tăl tơmo. Mơjĭt-'bar tăl tơmo ei đe chih anăn mơjĭt-'bar 'nu jơ̆ng 'bang Kon Triu.

¹⁵ Linh jang mă pơma hăm inh ei sư chĕp 'long thưk pơm păng maih wă pơtŏ lăng pơlei ei, 'măng pơlei ei, dur pơlei ei, tih sư dang yơ.

¹⁶ Sư pơtŏ pơlei ei păng 'long thưk wơ̆l tor sư tŏ ăi, să iĕ păng kơjung sư đei 'bar-trĭu pơđăm-hrĕng rơbâu thưk.

¹⁷ Dur sư pơtŏ păng ti, đơ̆ng kŭl-keng tơ hơnglâu. Kơjung sư đei minh-hrĕng puăn-jĭt puăn pơtŏ. Mă pơtŏ sư kư̆m dang ăi kơ pơtŏ kon bơngai.

¹⁸ Dur sư pơm păng tơmo gôh, nơ̆r lu bơngai noh sơ̆ sư khan tơmo jasper. Pơlei sư pơm păng maih ngăl rang kok thoi amĭl.

¹⁹ Tơmo đe trơn pơm dur pơlei ei, tơmo gĭt dêh, mă phara tơmo. Kiơ̆ kơ lu bơngai ei anăn sơ̆, tăl mônh tơmo jaspera, tăl 'bar tơmo sapphireb, tăl pêng tơmo kalsêđôc, tăl puăn tơmo sơmarađôd,

²⁰ tăl pơđăm tơmo sarđôni, tăl tơdrâu tơmo sađiô, tăl tơpơh tơmo krisôlit, tăl tơhngam tơmo berelô, tăl tơsĭn tơmo tôpassiô, tăl mơjĭt tơmo krisôprais, tăl mơjĭt-mônh tơmo hiasin, tăl mơjĭt-'bar tơmo amettih.

²¹ Rim kơ mơjĭt-'bar tŏ 'măng dur pơlei ei đei minh găr anam tih rang kok atol pơm 'măng. Trong pơlei tă lơ̆k maih rang thoi amĭl.

²² Gah hnam 'Bok Kei-Dei inh ưh kơ 'bôh ôh, yua kơ Sư Kră Yang Tih Hloh, Sư hăm Kon Triu gơh oei jơ̆p-jang kơ anih, mă pơlei noh kư̆m dang hnam Sư mơ̆n.

²³ Pơlei noh ưh kơ kăl kơ măt 'năr dah khei pơchrang hơdah ăn ôh, yua kơ tơdrong mơsêh 'Bok Kei-Dei hăm Kon Triu pơchrang ăn hơdah boih.

²⁴ Rim kơ khŭl kon bơngai jơ̆p kơ teh đak gô yak nơnăm yua hơdah pơlei noh pơchrang. Kư̆m đei lu 'bok pơtao đơ̆ng jơ̆p kơ teh đak năm ư-ang kơ 'Bok Kei-Dei hăm Kon Triu tơ noh.

²⁵ Pơlei noh pơchoh 'măng ling-lang ưh kơ đei tang thoi pơlei đe tơ ala teh, yua kơ ưh kơ đei măng mu tŏ sĕt, sư hơdah ling-lang.

²⁶ Jơ̆p kơ teh đak năm ư-ang kơ 'Bok Kei-Dei tơ noh.

²⁷ Tơdrong 'mê̆-'mach ưh kơ gơh mơ̆t ôh tơ lăm pơlei noh. Bơngai hơlĕnh, bơngai oei kơkuh kơ yang nai, ưh kơ gơh mơ̆t ôh. Pôm lu bơngai đei chih anăn lăm sơ̆p hla bơar Kon Triu đĕch gơh mơ̆t. Sơ̆p hla bơar Kon Triu noh chih anăn dôm lu bơngai mă gô arih hăm Sư ling-lang.