Tơdrông Tơ'bôh 18 - Sơ̆p Hlabơar Nơ̆r 'Bok Kei-Dei

¹ Klaih kơ noh inh 'bôh minh 'nu linh jang nai jur đơ̆ng plĕnh pran kơtang 'lơ̆ng klă klang rang jơ̆p teh.

² Sư pơma 'bơ̆r re kơ đe thoi âu: “Pơlei Babilôn, pơlei tih dêh, pơchah răm boih, ăn ngôi kơ yang sơmăt mă đe anăn yang kơnê̆ oei, păng đĭ lu sem brem sem păr pơm tơpu oei hơdai lăm noh 'mê̆-'mach dêh.

³ Pơlei Babilôn, pơlei pơchah răm, yua kơ tơdrong yoch lu sư pơm tơ'bôh kơ đe jơ̆p kơ teh đak, pơm pơyô kư̆ kă; lu 'bok pơtao jơ̆p teh đak kư̆m pơm pơyô hăm sư mơ̆n. Lu bơngai mơdro sa ala teh mơdrŏng yua sư, kơlih kơ tĕch kơ sư mŭk tơmam lơ tơpă.”

⁴ Đơ̆ng noh inh kơtơ̆ng 'bơ̆r nai sư kư̆m pơma đơ̆ng plĕnh thoi âu: “Ơ lu kon Inh, iĕm jah lĕch jăk tơ nai hli kơ iĕm hơdai yoch thoi sư, kơnh pŭ tơdrong gleh pơmat thoi sư noh.

⁵ Yua kơ tơdrong yoch pơlei noh tih wă atŏ kơ plĕnh. Mă-lei 'Bok Kei-Dei ưh kơ hiơt ôh dôm tơdrong kơnê̆ pơlei sư pơm.

⁶ Mă sư pơm kơnê̆ dang yơ, gô pơm 'mong kơ sư phak sư dang noh, athei pơm tơwih kơ sư 'bar wơ̆t hloh. Sư pơgŏ iĕm et sik kơnê̆, minh tuh 'mong kơ sư, thim 'bar pơnhan hloh kơ sư tuh kơ iĕm.

⁷ Sư pơma pơang akâu dang yơ, hưch hanh kơ mŭk tơmam 'lơ̆ng rŏ dang yơ, sư gô pŭ tơdrong pơmat, tơdrong ơh sơ'ngon kư̆m dang noh. Sư tơchĕng lăm to sư khan: ‘Inh pơm yă pơtao pơgơ̆r đe ling-lang, Inh ưh kơ sĭ yă adro, na liơ inh gơh ơh sơ'ngon?’

⁸ Yua kơ sư khan thoi noh na lăm minh năr hloi dôm tơdrong pơmat truh hloi kơ sư, tơdrong lôch, tơdrong nhơ̆m hmoi, tơdrong pơngot rơwĕt, tơdrong truh ŭnh sa pơlei pơla sư. 'Bok Kei-Dei Yang tih tên grên gô phak thoi noh tơpă.”

Kon bơngai nhơ̆m hmoi 'mêm kơ pơlei noh

⁹ Na lu 'bok pơtao jơ̆p kơ teh đak mă juăt kơ ngôi kư̆ kă hăm sư, kư̆m hơdai hưch kơ mŭk tơmam thoi sư mơ̆n, na lăp lu sư 'bôh 'nhui ŭnh sa pơlei ei, lu sư nhơ̆m hmoi.

¹⁰ Lu sư dơ̆ng ataih kơ Pơlei Babilôn ei hli kơ trŏ tơdrong răm thoi pơlei noh. Na lu sư khan: “Ô glăi, ô glăi, Pơlei Babilôn tih-tin 'lơ̆ng rŏ, mă-lei 'Bok Kei-Dei phak blah pơchah kơbĭ dôm yơ.”

¹¹ Păng lu bơngai mơdro sa jơ̆p-jang kơ teh đak nhơ̆m hmoi yua kơ tơdrong truh kơ Pơlei Babilôn, kơlih kơ ưh pă đei bu wă năm răt tơmam đơ̆ng lu sư tĕch,

¹² tôm tơdrong tơmam thoi lĕ kơ maih, hu, tơmo gĭt, găr anam, che 'bui, brai thêt, che tơpu sơdrông; păng tôm kơ kơđoh 'long 'bâu phu; tôm kơ tơmam đơ̆ng bơla rôih, 'long kơdrăk, mam kong, tôm tơdrong mam, bơ̆n tơmo rang thoi akar pơnhan;

¹³ bơ̆n kơđoh 'long kuê̆, bơ̆n tơmam 'bâu phu wă pơm kơ tơmam sa, bơ̆n kơđoh 'long tơ'băr đe pơm ŭnh nhang, bơ̆n gơhlâu 'bâu phu; bơ̆n sik, đak rơmă, tơpŭng đe pơm 'bĕng mi, bơ̆n 'ba sa; lu sem dơrong, thoi kơ rơmo, triu, aseh, akâu gre aseh; lu bơngai đĭch đe kư̆m đei tĕch mơ̆n, dang đe tĕch bơhngol kon bơngai.

¹⁴ Lu bơngai juăt kơ mơdro sa khan kơ sư: “Rim kơ plei 'long lăp kơ hơlŏng 'maih sa ưh pă đei boih, dôm lu tơmam sa 'lơ̆ng 'lơ̆ng, dôm lu tơmam gĭt kăp jên, hiong đĭ ưh pă layơ wă đei dơ̆ng.”

¹⁵ Lu bơngai juăt kơ mơdro sa, lu sư juăt kơ năm mơdro tơ pơlei noh na jing mơdrŏng, lu sư tơmang lăng đơ̆ng ataih hli kơ tơdrong truh kơ lu sư păng nhơ̆m hmoi ơh ăk păk jăl,

¹⁶ chă pơma rah khan: “Ô glăi, ô glăi, Pơlei Babilôn pơlei tih-tin, rŏ kơ pơlei yă pơtao hrŭk hơbĕn ao 'brê găm jơk dreng 'lơ̆ng 'lơ̆ng, chă pơhrôp akâu kơdih 'bot bơ̆n maih, bơ̆n hu, bơ̆n anam.

¹⁷ Lăm minh jơ đĕch ưh kơ đunh, dôm tơmam 'lơ̆ng tơmam rŏ noh hiong đĭ boih. Dôm lu kră pơgơ̆r lăm duk, lu bơngai jang lăm duk, dôm lu bơngai hao thŏng-nan năm găn đak dơsĭ chă mơdro sa, lu sư tơmang pơlei mă ŭnh sa ei đơ̆ng ataih.

¹⁸ Lu sư 'bôh 'nhui ŭnh sa pơlei noh na lu sư nhơ̆m hmoi ôr pơret khan: “Pă đei pơlei ayơ tih atŏ, 'lơ̆ng atŏ dang pơlei noh.”

¹⁹ Lu sư chup teh pơnŭk săi kơpal kơ̆l lu sư mơlŭng mơlăng, nhơ̆m hmoi ơh ol pơma ôr pơret khan: “Ô glăi, ô glăi, Pơlei Babilôn pơlei tih-tin, lu bơngai đei duk oei tơ đak dơsĭ mơdrŏng yua đơ̆ng sư, lăm minh jơ đĕch ưh kơ đunh mă hiong đĭ tơmam mơdrŏng, tơmam 'lơ̆ng rŏ.”

²⁰ Đơ̆ng noh inh kơtơ̆ng 'bơ̆r nai dơ̆ng khan thoi âu: “Ơ lu đe mă oei tơ plĕnh, ơ lu kon 'Bok Kei-Dei, lu jơ̆ng 'bang Yêsu, lu bơngai pơtruh nơ̆r 'Bok Kei-Dei, hiôk bĕ lu iĕm yua kơ 'Bok Kei-Dei phak pơrăm boih pơlei noh mă pơm kơnê̆ kơ iĕm.”

²¹ Đei minh 'nu linh jang nai pran tih, sư iŏk minh pôm tơpăl tơmo tih tơhuŏng tơ đak dơsĭ păng khan: “Ơ Pơlei Babilôn, e hăm băt đe wă tơhuŏng e thoi inh tơhuŏng tơpăl tơmo tơ đak dơsĭ, đe ưh pă layơ wă 'bôh e dơ̆ng.

²² Tơ tŏk-bŏk e pă layơ kơtơ̆ng tơdrong đe reh brŏ, kơtơ̆ng đe hơri suang, kơtơ̆ng đe hlôm tơgiĕp, hlôm keng; păng tôm kơ lu bơngai thơ̆, lu bơngai peh 'ba pă 'bôh boih.

²³ Ŭnh kon pơlei pă 'bôh hơdah, 'bơ̆r đe hiĕk 'nă pơkong kơ bre klo kăn chă kơ mĕ 'bă ŏng mai kư̆m pă đei kơtơ̆ng. E hăm băt dôm tơdrong truh noh yua kơ lu bơngai đơ̆ng iĕm mơdro sa ưh kơ tơpăt pơm kư̆ kă hưch tơmam âu tơmam to? Jơ̆p teh đak ư-ang pơlei iĕm mơdrŏng tih. Dang ei jơ̆p teh đak pơm rok tơdrong kơnê̆ thoi iĕm.

²⁴ “'Bok Kei-Dei phak pơlei noh yua kơ đei pham lu bơngai pơtruh nơ̆r Sư, pham lu kon Sư păng pham dôm lu bơngai mă đe pơlôch jơ̆p kơ teh đak ro lăm pơlei noh.”