Tơdrông Tơ'bôh 17 - Sơ̆p Hlabơar Nơ̆r 'Bok Kei-Dei

¹ Đơ̆ng noh minh 'nu lăm tơpơh 'nu linh jang mă chĕp tơpơh tŏ pơnhan ei, sư năm tơ inh păng khan: “Kiơ̆ inh bĕ, inh gô tơ'bôh kơ ih tơdrong 'Bok Kei-Dei phak bơngai đi pơm pơyô ngôi kư̆ kă noh, bơngai ei oei 'bơ̆t cheng đak krong hăm đak glung.

² Lu 'bok pơtao jơ̆p kơ teh đak kư̆m ngôi pơyô hăm sư mơ̆n, sư boih pơm pơyô kư̆ kă tơ'bôh kơ đe jơ̆p kơ teh đak adrol, dang sư ăn kơ đe et sik suai.”

³ Linh jang ei pơma đang boih, klaih kơ noh inh ưh kơ băt thoi yơ Yang Bơhngol 'Lơ̆ng ăn kơ linh jang pôk anhăk ba inh tơ bri chơngue. Na inh 'bôh bơngai drŏ-kăn ei hao kơpal sem 'brê. Tơ akâu sem ei đe chih 'bĕnh-'bang lơ tơdrong pơma blông kơ 'Bok Kei-Dei ngăl. Sem 'brê ei đei tơpơh tŏ kơ̆l, mơjĭt tŏ ake.

⁴ Bơngai drŏ-kăn ei hrŭk ao tai 'brê 'lơ̆ng, 'băk kong kiơng maih, đoh sơle rang gơhlâu, ti sư chĕp pơnhan maih 'bĕnh kơ tơdrong 'mê̆-'mach păng tơdrong sư pơm kư̆ kă.

⁵ Klĕng bơngai drŏ-kăn noh đe chih anăn sư, mă đe chih tơwer hrĕp. Đe chih thoi âu: “Pơlei Babilôn pơlei tih dêh mĕ kơ lu drŏ-kăn đi, tơ'bôh kơ đe tơdrong 'mê̆ jơ̆p kơ teh đak.”

⁶ Păng inh 'bôh sư suai kơ pham lu bơngai lui, lu bơngai năm ră roi tơdrong Kră Yang Yêsu. Inh 'bôh bơngai drŏ-kăn noh inh sơleng kơ đon, ưh kơ hlôh tơdrong kiơ.

Tơblang tơdrong sem brem hăm drŏ-kăn

⁷ Na linh jang 'lơ̆ng ei khan kơ inh: “Yua kơ kiơ ih ưh kơ hlôh? Lê̆ inh tơblang ăn kơ ih tơdrong hrĕp bơngai drŏ-kăn noh păng tơdrong sem mă đei tơpơh tŏ kơ̆l, mơjĭt tŏ ake, mă bơngai drŏ-kăn noh hao.

⁸ Sem mă ih 'bôh noh hei, sơ̆ sư arih hiôk, mă dang ei sư lôch ưh pă 'bôh boih. Ning-mônh sư arih mơ̆n, mă ưh pă arih hiôk boih, yua kơ ning-mônh sư tŏk đơ̆ng sơlŭng jrŭ năm tơ anih 'Bok Kei-Dei phak pơrăm. Pôm lu bơngai mă Kră Yang Yêsu ưh kơ đei chih anăn sư lăm hla bơar tơdrong arih đĕch ư-ang kơ sư. Dôm lu bơngai lui tơpă Sư chih anăn sư lăm noh đơ̆ng blŭng-a pơjing plĕnh teh sơ̆. Lu bơngai ưh kơ lui ư-ang kơ sem noh yua kơ sơ̆ sư arih hiôk, dang ei lôch ưh pă 'bôh boih, mă-lei ning-mônh gô iung arih dơ̆ng.

⁹ “Na tơdrong âu iĕm athei tơchĕng mă nhên: Tơpơh tŏ kơ̆l noh wă khan, tơpơh tŏ dơng groi cham char bơngai đi oei.

¹⁰ Tơpơh tŏ kơ̆l noh kư̆m wă pơtih gia kơ tơpơh 'nu 'bok pơtao. Tơpơh 'nu 'bok pơtao noh pơđăm 'nu lôch boih, minh 'nu mă oei pơgơ̆r dang ei, minh 'nu tam mă trŏ kơ sư pơgơ̆r. Mă sư pơgơ̆r, sư pơgơ̆r ưh kơ đunh ôh.

¹¹ Gah sem brem mă sơ̆ arih hiôk, dang ei lôch ưh pă 'bôh boih noh, sư pơm pơtao mă tơhngam, sư păl lu tơpơh 'nu noh, ning-mônh 'Bok Kei-Dei gô phak sư kơtang kơtĭt.

¹² “Mơjĭt tŏ ake sư noh wă pơtih gia kơ mơjĭt 'nu pơtao đơ̆ng rŏng wă pơgơ̆r hơdai hăm sư; mă lu sư pơgơ̆r ưh kơ đunh ôh dang kơ minh jơ đĕch.

¹³ Đĭ dôm lu sư pôm đon pơjao ăn kơ sem brem mă lôch iung arih noh pơgơ̆r.

¹⁴ Đĭ lu sư iung blah Kon Triu, Kon Triu iung blah lu sư jei hloi Kon Triu, yua kơ Kon Triu Sư pơm Yŏng, Sư Yŏng kơ đĭ-đăng lu bơngai pơm yŏng; Sư pơm 'Bok Pơtao, Sư tih hloh kơ đĭ-đăng lu pơtao nai. Na dôm lu bơngai mă kiơ̆ Kon Triu, lu bơngai noh đơ̆ng 'Bok Kei-Dei rơih iŏk ngăl boih. Lu bơngai noh kiơ̆ tơpă ưh kơ wă achăng lê̆ Sư ôh.”

¹⁵ Na linh jang hei khan kơ inh dơ̆ng thoi âu: “Glung đak mă ih 'bôh bơngai drŏ-kăn oei hei noh, 'noh wă pơtih gia kơ tôm kơ adrĕch adrung khŭl kon bơngai lăm teh đak mă sư pơgơ̆r.

¹⁶ Mơjĭt tŏ ake mă ih 'bôh 'noh hei păng sem brem noh, lu sư hil areh kơ bơngai đi, na thu iŏk đĭ mŭk tơmam bơngai drŏ-kăn noh, jing akâu hoh, klaih kơ noh 'bet sa sư, 'buh pơkhoy tơ ŭnh.

¹⁷ Tơdrong lu sư blah bơngai drŏ-kăn noh 'Bok Kei-Dei lăp đon mơ̆n, yua kơ 'Bok Kei-Dei ăn kơ lu sư pơm pôm đon thoi noh, na lu sư pơjao ăn kơ sem mă kơnê̆ noh pơgơ̆r gô mơ̆ng kơ 'Bok Kei-Dei wă dang yơ.

¹⁸ Bơngai drŏ-kăn mă ih 'bôh noh, wă pơtih gia kơ minh pôm pơlei tih pơgơ̆r jơ̆p kơ teh đak, đĭ-đăng lu 'bok pơtao.”