Tơdrông Tơ'bôh 16 - Sơ̆p Hlabơar Nơ̆r 'Bok Kei-Dei

¹ Đơ̆ng noh inh kơtơ̆ng 'bơ̆r pơma re đơ̆ng lăm hnam 'Bok Kei-Dei ei khan kơ tơpơh 'nu lu linh jang 'lơ̆ng wă tuh đak pơgang ei thoi âu: “Năm bĕ, tuh tơpơh tŏ pơnhan đak pơgang tơdrong 'Bok Kei-Dei hil tơ teh.”

² Thoi noh na linh jang 'lơ̆ng mă mônh năm tuh hloi đak pơgang noh tơ teh. Na dôm lu bơngai mă chơ̆m đŏng yâu sem ei, kơkuh kơ rup sem ei, lu sư đei tơdrong jĭ tơ'boch đuh 'mê̆-'mach dêh.

³ Linh jang 'lơ̆ng mă 'bar tuh đak pơgang sư tơ đak dơsĭ, na đak dơsĭ jing pham thoi pham kon bơngai lôch. Na dôm sem brem arih lăm đak dơsĭ lôch đĭ.

⁴ Linh jang 'lơ̆ng mă pêng tuh đak pơgang sư tơ dôm lu tu đak, đak krong, đak glung, thong đak tih iĕ, na đĭ dôm lu đak noh kư̆m jing pham ngăl.

⁵ Na inh kơtơ̆ng linh jang 'lơ̆ng mă wei-lăng dôm lu thong đak tih iĕ noh sư khan thoi âu: “Ơ 'Bok Kei-Dei, Ih đei đơ̆ng sơ̆ khơ̆ dang ei, pôm Ih đĕch pơm 'lơ̆ng tơpăt. Ih phak kon bơngai thoi noh trŏ tơpă,

⁶ yua kơ lu sư pơlôch tuh pham lu kon Ih, păng lu bơngai pơtruh nơ̆r Ih, na dang ei Ih pơkăl ăn kơ lu sư huch pham 'noh trŏ tơpă.”

⁷ Na inh kơtơ̆ng 'bơ̆r pơma đơ̆ng chơnang soi, sư khan thoi âu: “Ơ 'Bok Kei-Dei Kră Yang Tih Hloh, trŏ tơpă mă Ih phak thoi noh.”

⁸ Klaih kơ noh linh jang 'lơ̆ng mă puăn tuh đak pơgang sư tơ măt 'năr, pơm kơ măt 'năr tŏ phang hơnơ̆ng hơnong wă kơ tŏ sa pơmat kon bơngai.

⁹ Tŏ sa kon bơngai na kon bơngai blei hiap pơma kơnê̆ kơ 'Bok Kei-Dei, yua kơ 'Bok Kei-Dei phak pơmat lu sư tôm tơdrong thoi noh. Mă-lei lu sư ưh kơ chu tơbral tơdrong yoch 'mơ̆i hăm ưh kơ wă ư-ang kơ 'Bok Kei-Dei.

¹⁰ Linh jang mă pơđăm tuh đak pơgang đơ̆ng pơnhan sư tơ kơpal tang-dŏ sem brem mă kơnê̆ ei, na jơ̆p kơ teh đak sem ei pơgơ̆r jing măng mu. Đĭ-đăng kon bơngai nhơ̆m hmoi tơkăp hơpiĕt kơdih kơdih yua kơ lu sư jĭ dêh trŏ hơkăm pơgang noh.

¹¹ Lu sư pơma kơnê̆ kơ Kră Yang mă oei tơ plĕnh, yua kơ lu sư hăl hang kơ jĭ tơ'boch păng dôm tơdrong pơmat noh. Mă-lei lu sư ưh kơ chu tơbral tơdrong yoch lu sư pơm ôh.

¹² Linh jang mă tơdrâu tuh đak pơgang đơ̆ng pơnhan sư tơ krong tih mă đe anăn krong Êphrat, na krong ei jing hrơ̆ hloi jing trong hrĕng 'lơ̆ng ăn kơ lu 'bok pơtao đơ̆ng gah hơlĕch wă năm tơblah.

¹³ Inh kư̆m 'bôh pêng 'nu yang kơnê̆ 'mê̆-'mach hơbŏ sư thoi kưt, sư lĕch đơ̆ng 'bơ̆r yă-grai, 'bơ̆r sem mă kơnê̆ păng 'bơ̆r sem mă gơh tơdrong hlĭch wă kơ kon bơngai lui kiơ̆ kơ sư.

¹⁴ Pêng 'nu yang noh yang kơnê̆ ngăl, lu sư kư̆m gơh pơm tơdrong hlĭch hlăch mơ̆n. Păng lu sư năm jơ̆p kơ teh đak krao akŭm lu 'bok pơtao tơblah hăm 'Bok Kei-Dei kơplah năr 'Bok Kei-Dei hăt kơ tơblah tơblŭng hơlŭng pơdang, mơsêh tăp pang mơyang tăp dăr tôch 'bơ̆t Sư boih.

¹⁵ Inh 'bôh thoi noh boih na inh kơtơ̆ng Kră Yang Yêsu Krist khan: “Inh wă jur kơplah kon bơngai ưh kơ lêng ê thoi bơngai wă năm tơtông. Hiôk dêh bu mă oei kral kơchăng păng đei hơbĕn ao hrŭk wă kơ đe huay kơ 'bôh sư hang-hông.”

¹⁶ Na pêng 'nu yang kơnê̆ ei krao akŭm lu 'bok pơtao tơ anih Armagedon kiơ̆ kơ nơ̆r Hêbrơ khan.

¹⁷ Linh jang mă tơpơh tuh đak pơgang đơ̆ng pơnhan sư tơ kơpal rơwơ̆ng ti. Klaih kơ noh na inh kơtơ̆ng 'bơ̆r 'Bok Kei-Dei pơma re đơ̆ng tang-dŏ Sư lăm hnam khan: “Thôi, asong kon bơngai pơmat dôm noh boih.”

¹⁸ Klaih kơ noh na đei hloi grơ̆m aru 'mi pru sơaih glaih tơdrăng păng đei teh adrŏ tơtơ̆ng krưp dêh; đơ̆ng kon bơngai pơtơm oei tơ teh sơ̆ khơ̆ năr noh kơnh ưh tam kơtơ̆ng teh adrŏ krưp dang noh.

¹⁹ Pơlei Babilôn pơlei tih dêh đei tơdrong truh kơ lu sư hơling hơlơ̆m pêng pah kueng pơgăn. Păng jơ̆p-jang kơ teh đak kon pơlei pơla nai kư̆m pơchah răm lei-lăi. Pơlei Babilôn 'Bok Kei-Dei hil kơ lu sư ưh kơ chu, na Sư ăn kơ lu sư et sik pơhrăp tơdrong Sư hil.

²⁰ Păng pơm kơ lu kông, lu bŏl lăm đak dơsĭ hơlŭng pơdang glach jing pă 'bôh.

²¹ Klaih kơ noh Sư pơm 'mi pru prĕl tih huŏng đơ̆ng plĕnh kơdŭk kơdăk trăp dang pơđăm-jĭt kĭ kơtĭt kon bơngai tơ teh. Kon bơngai blei hiap 'Bok Kei-Dei, yua kơ 'Bok Kei-Dei phak păng 'mi prĕl tih krưp ei.