Tơdrông Tơ'bôh 14 - Sơ̆p Hlabơar Nơ̆r 'Bok Kei-Dei

¹ Klaih kơ noh inh hue lăng inh 'bôh Kon Triu dơ̆ng tơ kơpal kông Siôn, Sư dơ̆ng hơdai păng lu đe minh-hrĕng puăn-jĭt puăn-rơbâu 'nu lu bơngai mă đei chơ̆m đŏng yâu Kon Triu păng đŏng yâu 'Bă Kon Triu tơ klĕng lu sư kơdih kơdih.

² Inh đei kơtơ̆ng dơ̆ng 'bơ̆r pơma jơwa đơ̆ng plĕnh thoi lĕ kơ jơwa đak chơkơi păng thoi jơwa grơ̆m glaih, jơwa noh thoi jơwa bơngai tơpôl reh brŏ kư̆m đei.

³ Lu sư hơri minh tơdrong 'nao 'bơ̆t anăp tang-dŏ 'Bok Kei-Dei, 'bơ̆t anăp puăn anăn păng 'bơ̆t anăp lu đe kră. Pôm lu minh-hrĕng puăn-jĭt puăn-rơbâu 'nu noh đĕch gơh hơri tơdrong 'nao ei, lu nai ưh kơ đei bu gơh ôh, yua kơ lu bơngai noh 'Bok Kei-Dei huai iŏk lu sư đơ̆ng khŭl bơngai ala teh âu boih.

⁴ Lu sư bơngai rơgoh 'lơ̆ng ngăl ưh kơ đei kiơ̆ lu bơngai ưh kơ lui pơm yoch ôh. Lu sư thoi bơngai drŏ-nglo mă ưh kơ pơ̆n ngôi jê̆ bơngai drŏ-kăn, thoi bơngai drŏ-kăn mă ưh kơ pơ̆n ngôi jê̆ hăm bơngai drŏ-nglo. Kon Triu 'Bok Kei-Dei năm tơ yơ lu sư kiơ̆ tơ noh, yua kơ 'Bok Kei-Dei huai iŏk lu sư đơ̆ng khŭl kon bơngai, na lu sư dang tơmam đe pơyơ̆r ăn kơ 'Bok Kei-Dei păng pơyơ̆r ăn kơ Kon Triu.

⁵ 'Bok Kei-Dei 'bôh lu sư ling-lang pơma 'lơ̆ng ưh kơ đei pơma hơlĕnh hơya tŏ sĕt, yua kơ lu sư jing bơngai rơgoh 'lơ̆ng boih.

Linh jang păr tŏk-bŏk rơwơ̆ng bơtho đe

⁶ Klaih kơ noh inh 'bôh linh jang 'lơ̆ng nai dơ̆ng, sư păr asơ̆ng tŏk-bŏk rơwơ̆ng, ră roi kơ đe tơdrong 'nao 'lơ̆ng wă kơ đe gơh arih ling-lang. Sư ră roi tơdrong noh kơ đĭ-đăng bơngai rim kơ dêh char, rim kơ teh đak, rim kơ adrĕch adrung, rim kơ nơ̆r pơma kon bơngai.

⁷ Na sư pơma 'bơ̆r re kơ đe wă kơ đe kơtơ̆ng, sư khan thoi âu: “Iĕm athei băt hli kơ 'Bok Kei-Dei păng ư-ang kơ Sư, yua kơ Sư wă sek tơlang iĕm boih. Kơkuh kơ Sư bĕ, yua kơ Sư Yang pơjing plĕnh teh, pơjing đak dơsĭ, pơjing tôm kơ tu đak.”

⁸ Đơ̆ng noh đei linh jang 'lơ̆ng nai mă 'bar kiơ̆ đơ̆ng rŏng sư khan: “Pơlei Babilôn tih krưp tŏ noh ră, mă-lei pơchah pơchek đĭ boih, yua kơ tơdrong yoch lu sư pơm tơ'bôh kơ đe jơ̆p kơ teh đak.”

⁹ Đơ̆ng noh đei linh jang 'lơ̆ng nai dơ̆ng kiơ̆ đơ̆ng rŏng sư pơma 'bơ̆r re kơ đe khan: “Bu chu kơkuh kơ sem păng rup sem noh păng chu chơ̆m đŏng yâu sem noh tơ klĕng dah tơ ti sư,

¹⁰ bơngai noh 'Bok Kei-Dei hil areh tơpă, dang ăn kơ sư et sik hrăp, sik noh 'Bok Kei-Dei tring tơ kơchŏk 'nhŭ tăng hơ̆-hang. Bơngai noh gô hăl hang oei tơ anih pơmat-tat tơ lăm dơnâu ŭnh tơbang 'bơ̆t anăp lu linh jang 'lơ̆ng păng Kon Triu.

¹¹ Na ŭnh mă pơmat lu sư noh đei 'nhui tŏk ling-lang ưh kơ đei pơdơh. Lu bơngai mă kơkuh kơ sem păng rup sem noh păng chu ăn kơ sem noh chơ̆m đŏng yâu sư, lu bơngai noh lu sư pơmat măng năr, pă đei hiôk hơya tŏ sĕt 'biơ̆.”

¹² Yua kơ thoi noh boih na lu bơ̆n bơngai lui kơ Yêsu păng kiơ̆ tơdrong 'Bok Kei-Dei pơkă, bơ̆n athei adrin lui khŏm khŏm 'nĕ kơ achăng lê̆ Sư, mă đe pơmat bơ̆n dang yơ.

¹³ Păng inh kơtơ̆ng dơ̆ng nơ̆r pơma đơ̆ng plĕnh Sư khan kơ inh thoi âu: “Inh wă kơ ih chih tơdrong âu: Lu bơngai mă lui boih kơ Kră Yang mă sư lôch kơnh pơgê dah layơ sư hiôk boih.” Na Yang Bơhngol 'Lơ̆ng tơl Sư: “Tơpă gô hiôk thoi Sư khan, yua kơ lu sư dang pơdơh kơ tơdrong jang pơmat-tat tơ ala teh âu. Mă-lei mă sư jang pơmat-tat gleh glăn tơ ala teh âu dang yơ, 'Bok Kei-Dei kư̆m ưh kơ hiơt tơdrong sư jang hrat noh ôh.”

Bơyan yuă 'ba păng phĕ plei hơmu

¹⁴ Đơ̆ng noh inh lăng dơ̆ng na 'bôh hơmơ̆l kok. Kơpal hơmơ̆l kok noh inh đei 'bôh minh 'nu hơbŏ thoi Kon Bơngai. Sư yơ̆l môk maih păng Sư chĕp săng kô han.

¹⁵ Đơ̆ng noh đei minh 'nu linh jang 'lơ̆ng nai dơ̆ng lĕch đơ̆ng hnam 'Bok Kei-Dei tơ plĕnh, sư pơma 'bơ̆r re kơ 'Bok mă oei kơpal hơmơ̆l thoi âu: “Dang ei mir 'ba tơ ala teh sŭng truh bơyan sư đum boih, iŏk săng kô Ih yuă bĕ.”

¹⁶ Thoi noh na 'Bok mă oei kơpal hơmơ̆l noh Sư năm yuă iŏk pơđĭ lu 'ba noh.

¹⁷ Đơ̆ng noh đei minh 'nu linh jang 'lơ̆ng nai lĕch đơ̆ng hnam 'Bok Kei-Dei tơ plĕnh mơ̆n, sư kư̆m đei săng kô han.

¹⁸ Đei dơ̆ng minh 'nu linh jang 'lơ̆ng nai, sư lĕch đơ̆ng anih chơnang soi. Sư wei-lăng ŭnh tơ anih chơnang soi. Na sư pơma 'bơ̆r re kơ buăl sư mă đei chĕp săng kô han noh thoi âu: “Săng kô ih noh, ih năm kăt pơđĭ lu hơie plei hơmu lăm war tơ ala teh sŭng, yua kơ plei hơmu noh kư̆m truh bơyan sư đum boih.”

¹⁹ Thoi noh na linh jang 'lơ̆ng mă đei săng kô han noh sư hơloh năm kăt pơđĭ lu hơie plei hơmu đơ̆ng lăm war tơ ala teh noh tah tơ lăm tơpăl tơmo mă đe juăt kơ peh chơpĕt iŏk đak sư. Tơdrong 'nâu ưh kơ pơma gah plei hơmu tơpă ôh, sư pơtih gia kơ 'Bok Kei-Dei hil kơ lu bơngai ala teh ưh kơ lui, na Sư gô pơrăm lu bơngai ưh kơ lui noh thoi đe peh pơhĕch plei hơmu.

²⁰ Anih đe peh plei hơmu noh tơ 'ngoaih pơlei. Pham ro đơ̆ng tơpăl tơmo noh ataih dang pêng-hrĕng kơsô̆, jrŭ pham noh lơ̆p ako aseh.