Tơdrông Tơ'bôh 11 - Sơ̆p Hlabơar Nơ̆r 'Bok Kei-Dei

¹ Klaih kơ noh đe kư̆m ăn kơ inh minh jăl 'long thưk thoi 'long jra. Sư khan kơ inh thoi âu: “Inh wă kơ ih năm pơtŏ hnam 'Bok Kei-Dei tơm păng pơtŏ chơnang soi, klaih kơ noh ih jô̆ lăng đei dôm hrĕng 'nu lu bơngai mă oei krao khan lăm noh.

² Gah tơ 'ngoaih hnam tơ cham ih lê̆ kơ pơtŏ kư̆m bưh, yua kơ cham noh đe pơjao ăn kơ lu bơngai oei tơ teh âu juă lăm pơlei 'lơ̆ng wă khan Pơlei Jêrusalem kơplah lăm puăn-jĭt 'bar khei.

³ Na inh wă ăn 'bar 'nu bơngai hrŭk ao 'bi năm chă pơtruh kơ đe tơdrong 'Bok Kei-Dei kơplah lăm minh-rơbâu 'bar-hrĕng tơdrâu-jĭt năr.”

⁴ Bre sư thoi 'bar tơnơm 'long Ôliwơ păng 'bar tŏ jơ̆ng kơđeng đe pơdơ̆ng lê̆ 'bơ̆t anăp 'Bok Kei-Dei Kră Yang plĕnh teh.

⁵ Tơ̆ng bơngai bu wă pơrăm bre sư, bre sư tơlĕch ŭnh đơ̆ng 'bơ̆r bre sư, na ŭnh noh sa hloi bơngai mă wă pơrăm bre sư noh. Thoi noh tơ̆ng bu wă pơrăm bre sư, bơngai noh sư 'maih chă tơdrong lôch.

⁶ Bre sư gơh chĭt đak 'mi đơ̆ng plĕnh kuă ăn 'mi kơplah bre sư oei chă năm pơtruh kơ đe nơ̆r 'Bok Kei-Dei. Bre sư kư̆m gơh sơkat kơ đak jing pham păng bre sư kư̆m gơh pơm kơ bơngai mă ưh kơ chu jĭ pơmat-tat gô mơ̆ng kơ bre sư wă.

⁷ Lăp bre sư năm chă pơtruh kơ đe tơdrong 'Bok Kei-Dei tôm boih, na đei minh pôm sem brem kơnê̆ pơplŏng lĕch đơ̆ng sơlŭng jrŭ blah pơlôch bre sư, lôch hloi.

⁸ Bre sư pơ̆k lôch 'bơ̆t tŏk-bŏk trong pơlei tih, mă đe anăn ngôi Pơlei Sôđôm hăm dêh Êyiptơ, pơlei mă đe pơ̆ng pơlôch Yŏng bre sư tơ 'long pơglang sơ̆.

⁹ Đĭ-đăng kon tơring tơrang rim dêh, rim teh đak, rim nơ̆r pơma wang luh năm lăng bre sư lôch, kuă ăn 'bŭ bre sư truh tơ pêng năr minh puăt.

¹⁰ Đĭ-đăng bơngai ưh kơ lăp đon kơ bre sư, khan bre sư pơjĭ jơhngơ̆m đon đe. Na lăp đe 'bôh bre sư lôch boih, đĭ rim măt bơngai 'nă hal ngôi pơchơt dih băl, pơm chă tơăn băl tơmam.

¹¹ Lăp kơtĕch pêng năr minh puăt na 'Bok Kei-Dei tơiung arih bre sư, ăn kơ bre sư gơh dui jơhngơ̆m klaih kơ noh iung hloi. Lu đe mă 'bôh bre sư iung arih hli tơrơ dêh.

¹² Bre sư kơtơ̆ng nơ̆r pơma re tơ plĕnh khan: “Ơ bre noh, tŏk tơ âu bĕ.” Na bre sư tŏk hloi tơ plĕnh hơmơ̆l hiŏng bre sư. Dôm lu bơngai mă ayăt kơ bre sư 'bôh bre sư tŏk mơ̆n.

¹³ Kơtă ei đei hloi teh adrŏ tih, mơjĭt tŏ kueng pơlei pơchah răm minh pah kueng. Đei tơpơh-rơbâu 'nu bơngai lôch yua kơ teh adrŏ noh. Lu bơngai mă oei arih huay truh tơdrong noh, lu sư hli tơrơ dêh, na pơma ư-ang Kră Yang 'Bok Kei-Dei tơ plĕnh.

¹⁴ Tơdrong gleh truh mă 'bar tôch dôm noh boih, oei pă minh tơdrong wă truh dơ̆ng.

Keng mă tơpơh

¹⁵ Truh tơ linh jang 'lơ̆ng mă tơpơh hlôm keng, đei nơ̆r pơma re tơ plĕnh khan: “Dang ei tôm kơ adrĕch adrung kon bơngai ala teh Kră Yang bơ̆n pơgơ̆r ngăl boih. Sư kư̆m ăn kơ 'Bok Krist pơgơ̆r đĭ kơ adrĕch adrung kon bơngai mơ̆n, Sư pơgơ̆r ling-lang ưh kơ layơ tôch.”

¹⁶ 'Bar-jĭt puăn 'nu lu đe kră mă oei tơ tang-dŏ tăp dăr kơ 'Bok Kei-Dei 'nap kơkuh kơ 'Bok Kei-Dei,

¹⁷ păng khan: “Ơ 'Bok Kei-Dei Kră Yang Tih Hloh, Ih mơsêh mơyang tih-tin mă đei đơ̆ng sơ̆ khơ̆ dang ei, bơnê kơ Ih, nhôn băt kơ Ih wă pơgơ̆r tôm tơdrong tơpă boih.

¹⁸ Lu bơngai ala teh mă ưh kơ lui hil areh kơ Ih, mă-lei dang ei kư̆m truh boih tơdrong Ih hil areh kơ lu sư wă phak lu sư păng wă sek tơlang lu bơngai lôch. Gah lu đĭch đam mă pơtruh nơ̆r Ih, lu kon Ih, lu băt lui yom hli kơ Ih, Ih gô apah lu sư mă sư pơm tih pơm iĕ. Gah lu bơngai mă ưh kơ lui chă pơrăm đe tơ ala teh, Ih gô pơrăm lu sư mơ̆n.”

¹⁹ Inh 'bôh hnam 'Bok Kei-Dei tơ plĕnh ti pơih 'măng, na inh 'bôh hom tih đe tah tơmo lat chih tơdrong 'Bok Kei-Dei pơkă kơ kon bơngai sơ̆. Na đei grơ̆m glaih tơdrăng kơmlat kơchêr kơchar, teh adrŏ mơ'nưt mơ'nat păng 'mi pru prĕl tih.