Tơdrông Tơ'bôh 10 - Sơ̆p Hlabơar Nơ̆r 'Bok Kei-Dei

¹ Klaih kơ noh dơ̆ng inh 'bôh minh 'nu linh jang 'lơ̆ng nai, sư jur đơ̆ng plĕnh đei hơmơ̆l gom akâu sư thoi hrŭk ao, sư pran tih. Păng đei plĕnh chro wăr kơpal kơ̆l sư; muh măt sư lăng mơnhal dang măt 'năr, jơ̆ng sư 'bak đum thoi pla ŭnh.

² Ti sư chĕp minh sơnôm hla bơar iĕ mă bơlang lê̆ boih. Jơ̆ng sư gah 'ma juă kơpal đak dơsĭ, jơ̆ng sư gah 'ngiĕo juă kơpal teh.

³ Sư tơjroh re dêh dang 'bơ̆r kiĕk arum. Đang sư tơjroh boih đei hloi grơ̆m glaih tơdrăng re jơwa tơpơh 'măng.

⁴ Inh kơtơ̆ng grơ̆m glaih tơdrăng jơwa re tơpơh 'măng thoi noh inh wă chih iŏk hloi ră, mă-lei đei nơ̆r đơ̆ng plĕnh kuă ăn inh chih iŏk, Sư khan kơ inh thoi âu: “Ih 'nĕ kơ chih iŏk tơdrong grơ̆m glaih jơwa noh, ih ôn đĕch 'nĕ roi kơ đe.”

⁵ Na linh jang mă inh 'bôh sư dơ̆ng minh pah jơ̆ng tơ đak dơsĭ minh pah tơ kơpal teh noh hei, sư yơ̆r ti gah 'ma,

⁶ na sư pơma pơsĭt kơ đe 'bơ̆t anăp 'Bok Kei-Dei Kră Yang arih ling-lang ưh kơ đei layơ tôch, sư pơjing plĕnh tôm tơdrong kơpal plĕnh, pơjing teh tôm tơdrong kơpal teh, pơjing đak dơsĭ tôm tơdrong lăm đak dơsĭ. Na tơdrong sư pơma pơsĭt kơ đe noh khan: “'Bok Kei-Dei ưh pă wă gô dơ̆ng boih.

⁷ Lăp năr linh jang 'lơ̆ng mă tơpơh hlôm keng, na dôm tơdrong 'Bok Kei-Dei wơh lu jơ̆ng 'bang sư roi tơbăt ăn kơ bơ̆n mă sơ̆, mă dang ei, dôm tơdrong noh gô 'blep đei thoi noh tơpă.”

Yôhan luŏn sa hla bơar

⁸ Klaih kơ noh inh kơtơ̆ng dơ̆ng nơ̆r mă pơma kơ inh đơ̆ng plĕnh hei, Sư pơma kơ inh thoi âu: “Ih năm iŏk hla bơar đơ̆ng ti linh jang 'lơ̆ng mă bơlang lê̆ boih mă sư dơ̆ng jơ̆ng minh pah tơ đak dơsĭ minh pah tơ kơpal teh noh.”

⁹ Thoi noh na inh năm hloi tơ linh jang ei păng apinh sư ăn kơ inh hla bơar iĕ mă sư bơlang noh. Na sư khan kơ inh thoi âu: “Ih iŏk hla bơar âu luŏn sa hloi na ih gô mơn kơ tăng lăm klak ih, mă-lei lăm 'bơ̆r ih, ih mơn kơ 'ngam thoi đak sut.”

¹⁰ Thoi noh na inh iŏk hla bơar iĕ noh đơ̆ng ti linh jang, na luŏn sa hloi. Lăm 'bơ̆r inh, inh mơn kơ 'ngam thoi đak sut; mưh inh luŏn hlôi boih, lăm klak inh, inh mơn kơ tăng.

¹¹ Na sư khan kơ inh dơ̆ng thoi âu: “Ih athei pơtruh kơ lơ dêh char, teh đak, nơ̆r pơma khŭl kon bơngai păng lu 'bok pơtao kơ tơdrong wă truh kơ lu sư.”