Tơdrông Pơđơk 6 - Sơ̆p Hlabơar Nơ̆r 'Bok Kei-Dei

Athei kơchăng kơ pơm glăi

¹ Ơ dăm, tơdah ih đei pơma tơguăt băl boih hăm rông 'bôt ih, tơdah ih đei pơkă pơkăm hăm bơngai tơmoi.

² Tơdah ih puh boih kơ nơ̆r pơkăm, glăi đơ̆ng 'bơ̆r ih pơma.

³ Ơ dăm, yua kơ ih huŏng boih lăm ti lu rông 'bôt ih, Pơm bĕ thoi âu, wă pơklaih ih kơdih. Athei năm kŭp kơ̆l apinh mơnat đơ̆ng rông 'bôt ih.

⁴ 'Nĕ ăn kơ măt ih tep, Kŭm 'nĕ ăn gơnur măt ih tep.

⁵ Pơklaih bĕ ih kơdih thoi kơtŏng klaih đơ̆ng ti lu bơngai lua. Thoi sem klaih đơ̆ng hơđong đe hơ'năk.

⁶ Ơ lu bơngai hơlah, năm lăng bĕ kơtu hmôch; Lăng mă nhen păng hŏk iŏk wă kơ hlôh wao.

⁷ Lu sư ưh kơ đei yŏng pơgơ̆r ôh. Kŭm ưh kơ đei bu wei-lăng wơh păng bơtho tơ'bôh.

⁸ Na sư kư̆m băt chă mong lê̆ tơmam sa lăm bơyan phang. Păng chă pơdŭ 'măn lê̆ tơmam sa kơplah bơyan yuă kĕch.

⁹ Ơ lu bơngai hơlah, ih oei 'bĭch tep dĭng dang yơ? Dang yơ ih iung đơ̆ng tep?

¹⁰ Tep tŏ sĕt; tep măt pơdơh 'biơ̆, kuăr ti 'bĭch tep tŏ sĕt.

¹¹ Thoi noh tơdrong dơnuh gô truh tơ ih thoi bơngai plah tơgar iŏk, Tơdrong kơ'bah gô truh tơ ih, thoi bơngai chĕp tơmam tơblah

¹² Bơngai bu arih hăm 'bơ̆r kơnê̆, Lu bơngai răm, lu bơngai pơm kơnê̆.

¹³ Kơtrơ̆m jơ̆ng wă tơbăt sư lăng măt cheng wă tơ'bôh, Iŏk hơnglâu tơhlâu pơm tơdra;

¹⁴ Jơhngơ̆m kơnê̆ chă đon wă pơm kơnê̆, Ling-lang chă tơdrong tơhil.

¹⁵ Na tơdrong pơmat-tat truh kơ sư ưh kơ tam băt. Sư kơdrăt răm hloi, pă gơh klaih dơ̆ng.

¹⁶ Đei tơdrâu tơdrong mă Kră Yang areh, Tơpơh tơdrong Kră Yang lăng krưp dêh.

¹⁷ Măt lăng pơang, Hơpiĕt hơlĕnh pơdăr; Ti 'bet pơlôch bơngai ưh kơ đei yoch;

¹⁸ Jơhngơ̆m chă đon 'maih pơm kơnê̆, Jơ̆ng hăt hot kơdâu năm tơ tơdrong kơnê̆.

¹⁹ Bơngai pơm kơdranh hơlĕnh pơma plêl, Bơngai chă tơdrong tơhil tơduă 'nhŏng oh.

'Nĕ kơ pơm pơyô kư̆ kă

²⁰ Ơ dăm, wei răk bĕ nơ̆r mĕ ih pơkă, 'nĕ hiơt nơ̆r 'bă ih bơtho.

²¹ Wei răk lăm jơhngơ̆m ih ling-lang, 'Băk sư tơ hơko ih.

²² Mưh ih yak, sư gô ba ih; Kơplah ih tep, sư gô wei-lăng ih; 'Blep ih hơđơ̆r sư pơma dơnuh.

²³ Yua kơ nơ̆r tơtă thoi ŭnh kơđeng; Tơdrong bơtho tơ'bôh thoi hơdah, Păng tơdrong chrih wă bơtho pơhrăm noh trong tơdrong arih.

²⁴ Wă găn ih đơ̆ng drŏ-kăn kư̆ kă; Wă kơ ih klaih đơ̆ng nơ̆r rơngơp drŏ-kăn đi pơhlŭ.

²⁵ Ih 'nĕ hưch kơ akâu sư 'lơ̆ng hơbŏ, Phŏ kơnh măt ih pơ̆k huŏng kơ tơdrong sư pơhlŭ.

²⁶ Drŏ-kăn di tơjur ih dang minh tơpei 'bĕng mi. Akăn đe pơhlŭ pơm hơđong kơ bơhngol ih.

²⁷ Hăm đei drŏ-nglo ayơ dan ŭnh 'bơ̆t kơtơh, na khan ŭnh huay kơ sa ao sư?

²⁸ Hăm đei bơngai bu yak juă kơpal ŭnh, Na khan jơ̆ng sư huay kơ pơtŏk?

²⁹ Bơngai mă ngôi pơyô hăm akăn đe sư kư̆m thoi noh; Bơngai bu hơtŭt 'bơm kơ drŏ-kăn noh ưh kơ klaih ôh kơ phak.

³⁰ Đe ưh kơ hil ôh kơ bơngai tơtông, Tơdah sư tơtông wă kơ sa năr sư pơngot;

³¹ Dah đe đei rôp sư athei duh tơpơh wơ̆t hloh; Sư gô ăn đĭ-đăng mŭk tơmam sư đei đơ̆ng lăm hnam.

³² Bơngai bu pơm pơyô kư̆ kă bơngai noh hiong đĭ tơdrong tơchĕng. Bơngai bu pơm thoi noh, gô pơrăm sư kơdih.

³³ Sư gô đei jĭ lăm jơhngơ̆m păng mơlâu, tơdrong mơlâu sư ưh kơ gơh sŭt lê̆ ôh.

³⁴ Yua kơ gar noh tơdrong mă bơngai drŏ-nglo hil blĕk dêh, Sư ưh pă gơh mơnat boih năr sư pơm tơwih.

³⁵ Sư ưh kơ wă iŏk ôh tơmam duh dôm yơ, Mă khan duh lung ăn kơ sư mŭk tơmam lơ.