Tơdrông Pơđơk 5 - Sơ̆p Hlabơar Nơ̆r 'Bok Kei-Dei

Athei kơchăng 'nĕ kơ pơm pơyô kư̆ kă

¹ Ơ dăm, mơ̆ng mă nhen kơ tơdrong gơh hơgei Inh, Pơgling đon mơ̆ng bĕ tơdrong hlôh wao Inh;

² Wă kơ ih răk đon gơh hơgei, bơwei 'bơ̆r hlôh wao ih.

³ Yua kơ 'bơ̆r lu bơngai drŏ-kăn đi tơlĕch nơ̆r đak sut 'ngam, Păng nơ̆r sư pơma rơbơ̆r hloh kơ đak rơmă.

⁴ Mă-lei tuch-luch jing đak tăng hloh kơmăt. Han hloh kơ đao gưm 'bar pah măt;

⁵ Jơ̆ng sư jur truh tơ tơdrong lôch Yak nơnăm sư kiơ̆ trong pơlei lôch.

⁶ Sư ưh kơ chă trong tơhnă wă năm tơ tơdrong arih. Wih kiơ̆ trong răm, mă-lei sư ưh kơ băt.

⁷ Dang ei, ơ lu đe dăm mơ̆ng bĕ nơ̆r Inh; 'Nĕ kơ weh ôh đơ̆ng nơ̆r 'bơ̆r Inh pơma.

⁸ Athei weh ataih bĕ đơ̆ng trong sư; 'Nĕ kơ dơ̆ng jê̆ 'măng hnam sư.

⁹ Hli kơnh lu iĕm ăn tơdrong pran kơtang ư-ang iĕm kơ lu bơngai nai. Păng khei sơnăm iĕm arih ăn kơ lu bơngai pơjăm pơjuă đe.

¹⁰ Hli kơnh lu bơngai tơmoi gô iŏk yua mŭk tơmam ih, Mŭk tơmam đơ̆ng ih jang mơ̆t tơ hnam pơm kơ đe mơdrŏng.

¹¹ Hli kơ đơ̆ng rŏng kơnh ih gô krao ôr, Mưh akâu jăn sĕch akar ih jô hŏnh.

¹² Ih khan, Inh areh dêh kơ tơdrong bơtho hơmet. Păng jơhngơ̆m inh sơngah kơ tơdrong chrih.

¹³ Inh ưh kơ chu bơih nơ̆r lu 'bok bơtho khan; Inh kư̆m kuă kơ pơgling đon mơ̆ng kiơ̆ nơ̆r đe bơtho khan kơ inh.

¹⁴ Inh wă jê̆ hiong răm boih Đơ̆ng lăm tơpôl kon pơlei inh.

¹⁵ Nhă bĕ đak đơ̆ng kơthŭnga ih mong. Păng nhă đak ro đơ̆ng lăm sơlŭng ih kơdih.

¹⁶ Hăm trŏ tu đakb ih gô blai ro tơ trong, Lu hơbong glung ih gô ro lăm pơlei tih.

¹⁷ Đakc noh yua bĕ minh drô̆ ih, 'nĕ kơ yua hăm lu bơngai tơmoi nai.

¹⁸ Hơpơi kơ tu đak ih 'lơ̆ng rŏ. Hiôk chơt bĕ hăm akăn ih iŏk oei đơ̆ng 'lơ̆p.

¹⁹ Thoi juei adruh kluh hưch kơ juei dăm. Toh sư pơhiôk ih ling-lang. Ih rai hưch wă kơ sư ling-lang măng năr.

²⁰ Ơ dăm, yua kơ kiơ ih hưch kơ drŏ-kăn đi? Liơ ih hrăn kuăr akăn đe?

²¹ Yua kơ trong kon bơngai yak hơdah 'bơ̆t anăp Kră Yang; Sư lăng đĭ trong lu sư yak.

²² Lu bơngai pơm kơnê̆ gô 'leh hơđong đơ̆ng tơdrong yoch sư kơdih. Tơdrong yoch sư kơdih gô chô̆ sư.

²³ Sư gô lôch yua kơ ưh kơ mơ̆ng đei bơtho khan, Sư gô wơ̆l jrok yua kơ ưh kơhlôh kơwao.