Tơdrông Pơđơk 31 - Sơ̆p Hlabơar Nơ̆r 'Bok Kei-Dei

Nơ̆r bơtho kơ pơtao Lêmuel

¹ Nơ̆r pơtao Lêmuel pơma, lu nơ̆r pơđơ̆k đơ̆ng mĕ sư bơtho sư.

² Inh wă pơma kơ ih kiơ, ơ dăm? Inh wă pơma kơ ih kiơ, ơ kon dăm đơ̆ng lăm blu pôih mĕ kơdih. Inh wă pơma kơ ih kiơ, ơ dăm, đơ̆ng inh kơdih krao apinh.

³ 'Nĕ jao jơhngơ̆m pran ih kơ bơngai drŏ-kăn, Păng kư̆m 'nĕ bơ̆jang hơdai hăm bơngai wă pơrăm lu pơtao.

⁴ Ơ Lêmuel, lu pơtao huch tơdrô ưh kơ 'lơ̆ng ôh; Kŭm ưh kơ 'lơ̆ng kơ lu kră pơgơ̆r hơmuy tơdrô.

⁵ Hli kơ lu sư et suai, hiơt tơdrong juăt, Pơm kư̆ kă chă sek tơdrong kơ lu bơngai dơnuh hin.

⁶ Ăn bĕ tơdrô et suai kơ bơngai wă jê̆ lôch, Ăn kơ lu bơngai ơh sơ'ngon dêh.

⁷ Lê̆ lu sư et na hiơt kơ tơdrong dơnuh hoh lu sư. Huay pă wă 'blŏk tơdrong kơdih pơmat-tat.

⁸ Ih pơma ăn bĕ kơ lu bơngai ưh kơ gơh pơma, Ih pơma ăn bĕ tơdrong trŏ kơ lu bơngai pơmat-tat.

⁹ Pơih 'bơ̆r ih ha pơma sek mă tơpăt. Tơgŭm kiơ̆ kơ trŏ lăp kơ lu bơngai dơnuh hin, hăm bơngai pơmat-tat.

Akăn iơ̆m dim trŏ pơyom

¹⁰ Bơngai bu chă đei akăn iơ̆m dim gơh găt? Bơngai drŏ-kăn thoi noh gĭt hloh kơ jơmŏng.

¹¹ Klo sư đei jơhngơ̆m 'lơ̆ng hơđơ̆ng kơ sư. Bơngai drŏ-kăn thoi noh ưh kơ'bah kiơ.

¹² Lăm đĭ chăl arih sư iơ̆m dim thim ăn kơ klo sư gơh đei yua, ưh kơ pơrăm.

¹³ Sư chă brai sŏk triu hăm brai tơpu hơdrông Sư pơnam jang hăm jơ̆ng ti kơdih.

¹⁴ Sư thoi duk đe mơdro mơchan, Chơ ba tơmam sa sư đơ̆ng ataih.

¹⁵ Sư iung đơ̆ng hrôih drôih oei măng, Kơchăng asong tơmam sŏng sa kơ lu bơngai lăm hnam dơnŏ sư. Păng asong băl jang kơ lu đam drŏ-kăn sư.

¹⁶ Sư lăng mir păng răt hloi mir noh. Đơ̆ng jơ̆ng ti kơdih jang đei sa na sư pơm minh hlak pơgar pơtăm plei hơmu.

¹⁷ Sư tơ̆n hăm tơlei tơ̆n pran kơtang sư jang hăm ti pơm kơkŏng ti sư pran.

¹⁸ Sư 'bôh tơdrong jang sư gơh đei yua; na ŭnh kơđeng sư ưh kơ đei tơpăt ôh kơmăng.

¹⁹ Sư dui tơroi pơtoi rơnon. Tanh che hơbĕn tanh khăn su.

²⁰ Sư hơmrah tơgŭm lu bơngai dơnuh hoh. Ti sư tơpơng drơng dŏng tơgŭm lu bơngai pơmat-tat.

²¹ Sư ưh kơ đei sư huay kơ hli hnam sư tơngiĕt găng. Yua kơ đĭ-đăng hnam dơnŏ sư hrŭk ao sŏk triu gôh hơhĭm.

²² Sư tanh lơ blah hơbĕn, khăn, ao hrŭk. Sư hrŭk ao 'lơ̆ng brai se, đak 'brê jơk.

²³ Đe 'bôh kơnăl kơ klo sư 'bơ̆t 'măng jang, Sư ngôi hơdai hăm lu kră pơlei oei lăm dêh sư.

²⁴ Sư tanh ao lŏ na tĕch; Kŭm tanh tĕch tơlei tơ̆n kơ bơngai mơdro.

²⁵ Sư đei jơhngơ̆m pran kơtang, păng đe ang pơyom. Sư huay kơ hiơ̆k ôh 'bôh tơdrong truh dơning dơmônh oei hiĕk chơt hiôk đĕch.

²⁶ Sư pơih nơ̆r 'bơ̆r pơma hơgei đei đon hlôh wao; Đơ̆ng hơpiĕt sư bơtho nơ̆r phep đep yom.

²⁷ Sư pơnam wei gram hnam dơnŏ sư. Ưh kơ sŏng đơ̆ng hơlah ưh kơ tah sa đơ̆ng ngôi đĕch.

²⁸ Lu kon hơ'lơ̆p sơkat pŭn hiôk pôk pơư kơ sư. Klo sư kư̆m iung pơma ha 'bơ̆r khan bơnê kơ sư.

²⁹ Đei lơ drŏ-kăn jang pơnam. Mă-lei ih 'lơ̆ng hloh gloh loi kơ đĭ-đăng.

³⁰ Akâu 'lơ̆ng chă pơrŏ, akâu hơbŏ gô hiong răm, Mă-lei đei drŏ-kăn ayơ băt hli yom kơ Kră Yang noh đe gô bơnê pơyom.

³¹ Hơpah bĕ kơ sư trŏ thoi sư jang đơ̆ng tơpang ti kơdih, Ăn kơ tơdrong jang bơnê ư-ang kơ sư 'bơ̆t 'măng jang pơlei tih.