Tơdrông Pơđơk 30 - Sơ̆p Hlabơar Nơ̆r 'Bok Kei-Dei

Tơdrong Agur pơma

¹ Nơ̆r pơma Agur, kon drŏ-nglo Jakê, tơdrong pơđơ̆k 'nâu sư khan kơ Ithiel păng Lukal;

² Tơpă inh kơtul hloh kơ đe nai, Păng kư̆m ưh kơ đei hlôh wao thoi kon bơngai hmă.

³ Inh ưh kơlah pơhrăm ôh tơdrong gơh hơgei, Păng kư̆m ưh kơ đei đon hlôh wao gah Yang 'Lơ̆ng Rơgoh.

⁴ Bu tŏk tơ plĕnh boih, na jur dơ̆ng? Bu pơpôi boih kial lăm tơpang ti sư? Bu 'nŭng boih đak lăm ao sư? Bu man pơjing bơih tôm kơ teh đak âu kơjăp. Anăn sư bu, păng anăn kon tơdăm sư bu? Tơdah ih băt roi bĕ kơ inh.

⁵ Dôm Nơ̆r Kră Yang 'Bok Kei-Dei đe đei rơ̆ pơlong lăng rơgoh sĭt tơpă. Kră Yang 'Bok Kei-Dei jơ̆ khêl pĕng lu bơngai mă Kơ'nơp lăm Sư.

⁶ 'Nĕ kơ thim kiơ lăm nơ̆r Sư. Kơnh Sư chrih kơ ih, păng jô̆ ih jing bơngai hơlĕnh.

⁷ Inh apinh Ih 'bar tơdrong, ơ Kră Yang, 'nĕ kơ sơngah kơ inh adrol kơ inh wă lôch:

⁸ Iŏk hŭt lê̆ ataih tơdrong pơma hơlĕnh đơ̆ng inh 'Nĕ ăn kơ inh dơnuh hin hnang, păng kư̆m 'nĕ ăn inh mơdrŏng; Kư̆ ăn kơ inh đei tơmam sa kăl yua tôm mah rim năr.

⁹ Hli kơ inh tôm mah kơnh sơngah kơ Ih, Păng khan: “Kră Yang Sư bu?” Păng hli kơ inh dơnuh hnang kơnh chă tơtông. Păng kơnh pơm kơnê̆ pơjăm anăn Kră Yang 'Bok Kei-Dei inh.

Tơdrong pơđơ̆k nai

¹⁰ 'Nĕ pơma kơnê̆ kơ đĭch 'bơ̆t anăp yŏng tơ'ngla sư, Hli kơnh sư hiap ih păng đe jô̆ ih bơngai yoch.

¹¹ Đei bơngai mơ'nah hiap 'bă lu sư, Păng kư̆m ưh kơ sơkat pŭn hiôk kơ mĕ lu sư.

¹² Đei bơngai mơ'nah tơchĕng khan lu sư rơgoh 'lơ̆ng. Mă-lei tam đei ôp mơgrĭ lu sư.

¹³ Đei khŭl bơngai muh măt lu sư pơm pơrŏ, Tưk kơnur pơang dêh.

¹⁴ Đei khŭl bơngai hơnĕnh sư thoi đao gưm. Hơnĕnh tơ'ngam sư thoi săng, Wă luăn sa lu bơngai dơnuh hoh đơ̆ng teh, păng đơ̆ng lăm adrĕch kon bơngai.

¹⁵ Rơtah đei 'bar 'nu kon drŏ-kăn, bre sư ôr “Ăn bĕ, Ăn bĕ”. Đei pêng tơdrong ưh kơ layơ hrăp. Puăn tơdrong kư̆m ưh kơ khan: Mah boih!

¹⁶ Dêh atâu, klak lu drŏ-kăn hơwŏng, Đak ưh kơmah kơ teh, păng ŭnh kư̆m ưh kơ khan: Mah boih.

¹⁷ Măt blei hiap 'bă, Kuă kơ chu yom nơ̆r mĕ sư, Sem ak đơ̆ng thŭng gô choh iŏk măt noh, Păng sem grơ̆ gô sa măt noh.

¹⁸ Đei pêng tơdrong pơm kơ inh hlĭch. Păng puăn tơdrong mă inh ưh kơ hlôh:

¹⁹ Noh trong sem klang păr tơ kơpal plĕnh. Trong 'bih hro rok tơmo, Đêl trong thŏng-nan rok lăm dơsĭ, Păng trong drŏ-nglo drŏ-kăn tơ'bơ̆p băl.

²⁰ 'Nâu tơdrong bơngai drŏ-kăn đi pơm: Sư sa bơih na sŭt 'bơ̆r, Păng khan: Inh đei pơm yoch kiơ?

²¹ Đei pêng tơdrong pơm ăn kơ teh tơdrŏ, Păng puăn tơdrong, sư ưh pă kĕ bơih,

²² Bơngai đĭch bu jing pơm pơtao. Bơngai kơwao bu đei tơmam sa phĭ rơkah.

²³ Minh 'nu drŏ-kăn đe 'blah tơdah sư đei hĭ klo, Păng đam drŏ-kăn tơplih kơ yŏng drŏ-kăn sư.

²⁴ Lăm teh đei puăn kon sem brem iĕ, Mă-lei lu sư đei đon hơgei dêh:

²⁵ Kon kơtu hmôch iĕ hloh ưh kơ pran. Mă-lei oei băt chă 'măn tơmam sa lăm bơyan phang;

²⁶ Tơpai bri mă khan pran kơtang ưh kơ đei; Mă-lei oei pơm tơpu lăm tơmo;

²⁷ Lep ưh kơ đei pơtao ră, Mă-lei lu sư oei hơdrŭm tơpôl;

²⁸ Chŭ-chă mă đe rôp hăm ti đĕch; Mă-lei lu sư oei lăm hnam pơtao.

²⁹ Đei pêng khŭl sem brem yak năm hơbŏ rŏ 'lơ̆ng. Păng đei puăn khŭl sem brem mă yak hơbŏ rŏ.

³⁰ Dăm-brang pran kơtang hloh kơ đĭ-đăng sem brem, Ưh kơdŭn tơ rŏng ôh 'bơ̆t anăp lu sem brem nai:

³¹ Iĕr tơmông bơbe bram yak nơnăm hăm pơrŏ jơ'nguơ̆ng; Păng thoi pơtao tơdah lu linh sư oei tăp dăr kơ sư.

³² Tơdah ih pơm kơnê̆ bơlŭk na pơang kơdih, Tơdah ih tơchĕng wă pơm kơnê̆, Iŏk tơpang ti chĭt bĕ 'bơ̆r ih.

³³ Yua kơ thoi đe chơpĕt, hmĕt đak toh lĕch đei rơmă, Thoi chơpĕt muh na pham lĕch. Kŭm thoi noh mơ̆n pơgreh na jing tơhil băl.